ဒေသခံပြည်သူ့ကာကွယ်ရေးတပ်ဖွဲ့နှင့် တိုင်းရင်းသားလက်နက်ကိုင်အဖွဲ့တို့၏ တိုက်ခိုက်မှုကြောင့် အောက်တိုဘာ ၁ရက်တွင် စစ်ကိုင်းနှင့် မကွေးတိုင်းအပါအဝင် ဒေသအသီးသီးရှိ မြို့နယ်များ၌ စစ်ကောင်စီတပ် လက်ပါးစေများ သေဆုံးထိခိုက်မှုများပြားခဲ့သည်။
စစ်ကိုင်းတိုင်း ကသာမြို့နယ်တွင် ယမန်နေ့က စစ်ကောင်စီတပ်ကို ကချင်လက်နက်ကိုင်အဖွဲ့(KIA) နှင့် ကသာ PDF တို့ ပူးပေါင်းအဖွဲ့မှ မိုင်းခွဲတိုက်ခိုက်ခဲ့ရာ စစ်ကောင်စီတပ်မှ ၃၀ဦးထက်မနည်း သေဆုံးခဲ့သည်ဟု အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ထုတ်ပြန်သည်။
အောက်တိုဘာ ၁ရက် နေ့လည် ၁နာရီခွဲခန့်က ကသာမြို့မှ အင်းတော်မြို့သို့ ထွက်ခွာလာသော စစ်ကောင်စီတပ်ကို ကသာမြို့နယ် ပင်းမလွတ်ရွာအကျော်တွင် မိုင်းခွဲတိုက်ခိုက်ခဲ့ခြင်းဖြစ်သည်ဟု ဆိုသည်။
စစ်ကိုင်းတိုင်း မြောင်မြို့နယ် ခေါင်းကွဲကျေးရွာနှင့် ဆယ်ရွာ ကျေးရွာကြားတွင်လည်း စစ်ကောင်စီတပ် မိုင်းဆွဲတိုက်ခိုက်ခံရ၍ ၁၀ဦးထက်မနည်းသေဆုံးခဲ့သည်ဟု ဒေသခံများ၏ ပြောကြားချက်ကို ကိုးကားပြီး DBV သတင်းဌာန၌ ဖော်ပြထားသည်။
Public Service Announcement
ထို့အပြင် ဂန့်ဂေါဘက်မှ ထိုးစစ်ဆင်လာသည့် စစ်ကောင်စီတပ်ကို မကွေးတိုင်း ဂန့်ဂေါ- ကလေးလမ်းပိုင်း တစ်နေရာတွင် အောက်တိုဘာ ၁ရက် မနက် ၁၀နာရီခန့်က မိုင်းခွဲတိုက်ခိုက်ခဲ့ရာ စစ်ကောင်ဏီတပ်ဖွဲ့ဝင် ၃၀ဦးခန့်သေဆုံးခဲ့သည်ဟု ဂန့်ဂေါပြည်သူ့ကာကွယ်ရေးတပ်ဖွဲ့(PDF)က ထုတ်ပြန်ထားသည်။
အဆိုပါတိုက်ခိုက်မှုကို ချင်းအမျိုးသားတပ်ဦး(CNF) နှင့် အနီးဝန်းကျင်ရှိ ပြည်သူ့ဘက်တော်သား အင်အားစုများနှင့်အတူ ပူးပေါင်း၍ စစ်ကောင်စီတပ်ကို တိုက်ခိုက်ခဲ့ခြင်းဖြစ်သည်ဟု ဂန့်ဂေါ PDFက ဆိုသည်။
မကွေးတိုင်း ဆောမြို့နယ် ဆော-ကျောက်ထုလမ်းပိုင်းတွင်လည်း စစ်ကောင်စီတပ်ကို ယောဒေသကာကွယ်ရေးတပ်ဖွဲ့(YDF)က မိုင်းဖြင့် တိုက်ခိုက်ခဲ့ရာ အနည်းဆုံး လေးဦးသေဆုံးပြီး ဒဏ်ရာရသူများလည်းရှိကြောင်း YDFက ထုတ်ပြန်သည်။ အဆိုပါဖြစ်စဉ်မတိုင်မီ စက်တင်ဘာ ၂၉ရက်ကလည်း ယင်းလမ်းပိုင်း၌ စစ်ကောင်စီတပ်ကို ချင်းကာကွယ်ရေးတပ်ဖွဲ့(CDF) နှင့် ယောဒေသခံကာကွယ်ရေးတပ်များ ပူးပေါင်း၍ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၁ဦးသေဆုံးခဲ့သည်ဟု ဒေသခံတစ်ဦးက ပြောသည်။
မကွေးတိုင်း ရေစကြို မြို့အဝင်တွင်လည်း စစ်ကောင်စီနောက်လိုက်များကို မိုင်းဖြင့် တိုက်ခိုက်ခဲ့ရာ တပ်ကြပ် ကြီးတစ်ဦး သေဆုံးပြီး စစ်သားနှစ်ဦး၊ ရဲနှစ်ဦး ဒဏ်ရာရခဲ့သည်ဟု ရေစကြို PDFက ထုတ်ပြန်သည်။
ကျွန်းလှမြို့တို့တွင် အောက်တိုဘာ ၁ရက်က ပေါက်ကွဲမှုများ ဖြစ်ခဲ့ပြီး ဗိုလ်မှူးတစ်ဦးနှင့် ပြည်သူတစ်ဦး သေဆုံးသကဲ့သို့ မုံရွာမြို့ရှိ စစ်ဆေးရေးဂိတ်တွင်လည်း အောက်တိုဘာ ၁ရက်က တိုက်ခိုက်ခံရ၍ ရဲနှစ်ဦးသေဆုံးခဲ့သည်။
ထို့အပြင် ခရမ်းမြို့နယ် ရိုးကြီးကျေးရွာတွင်လည်း အောက်တိုဘာ ၁ရက်က စစ်ကောင်စီလက်အောက်ခံ ရဲ နှစ်ဦး ပစ်ခတ်ခံရ၍ ဒုရဲအုပ်သေဆုံးပြီး တပ်သားမှ ဒဏ်ရာပြင်းထန်စွာ ရရှိခဲ့သည်။
ညောင်ဦး၊ရေစကြိုနှင့် မတ္တရာ၊ မြန်အောင် မြို့နယ်တို့မှ စစ်ကောင်စီသတင်းပေးအချို့လည်း အောက်တိုဘာ ၁ရက်က တိုက်ခိုက်ခံရ၍ သေဆုံးခဲ့သည်။
