▪️မဆုရည်လင်းမှာ ထောင်တွင်း၌ ကျန်းမာရေး စိုးရိမ်နေရဟုဆို
အလွတ်တန်းဓာတ်ပုံသတင်းထောက် ကိုဇော်လင်းထွဋ် (ခ)ဖိုးသား နှင့် ရန်ကုန်အခြေစိုက်တက္ကသိုလ် ကျောင်းသားသမဂ္ဂများမှ မဆုရည်လင်း (ခ) လင်းလင်း တို့ကို ယနေ့ (မတ်လ ၃၁)တွင် အကြမ်းဖက်စစ်တပ်၏ အင်းစိန်ထောင်တွင်းတရားရုံးက အလုပ်နှင့်ထောင်ဒဏ်သုံးနှစ် ချမှတ်ခဲ့ကြောင်း တကသ ကျောင်းသားဟောင်းများအင်အားစုက ထုတ်ပြန်သည်။
ကိုဖိုးသားနှင့် မဆုရည်လင်းတို့သည် ပြီးခဲ့သည့် ၂၀၂၁ ဒီဇင်ဘာလ ၁၉ ရက်က စစ်အာဏာရှင်ဆန့်ကျင်ရေးဆန္ဒပြပွဲတစ်ခုသို့အသွား လမ်းတွင် အကြမ်းဖက်စစ်တပ် ၏ အဓမ္မဖမ်းဆီးခံခဲ့ရခြင်းဖြစ်သည်။
၎င်းတို့နှစ်ဦးကို ဖမ်းဆီးပြီးနောက် ၃ လကျော်အကြာတွင် အာဏာသိမ်းစစ်ကောင်စီက ထောင်ဒဏ် မတရားချမှတ်ခံရခြင်း ဖြစ်သည်။
Public Service Announcement
ထိုသို့အမိန့်ချပြီးနောက် မဆုရည်လင်းအား မှတ်ပုံတင်အတု ကိုင်ဆောင်မှုဖြင့် ထပ်မံတရားစွဲဆိုနိုင်ရန်အတွက် သက်သေခံပစ္စည်းစာရင်းတွင် ၎င်းအား လက်မှတ်ရေး ထိုးစေခဲ့ကြောင်း တရားရုံးနှင့် နီးစပ်သည့်အသိုင်းအဝိုင်း မှတဆင့် ကြားသိခဲ့ရကြောင်း ရန်ကုန်အရှေ့ပိုင်းတက္ကသိုလ်ကျောင်းသားများသမဂ္ဂက ထုတ်ပြန်သည်။
ထို့အပြင် မဆုရည်လင်းသည် ထောင်တွင်း၌ ကျန်းမာရေး အခြေအနေစိုးရိမ်ရကြောင်း ရန်ကုန်အရှေ့ပိုင်းတက္ကသိုလ်ကျောင်းသားသမဂ္ဂက ထုတ်ပြန်ထားသည်။
” လွန်ခဲ့သော ၃ ပတ်အတွင်းက မဆုရည်လင်းဆီသို့ ပေးပို့သော ပါဆယ်ထုတ်များလည်း မရောက်ကြောင်းကိုလည်း မိသားစုဝင်များထံမှ သိရှိရပါတယ်။ ယခုအချိန်ထိ မိသားစုဝင်များနှင့် မတွေ့ဆုံရသေးဘဲ မိသားစုမှ ပါဆယ်ထုတ်သီးသန့်သာ ပို့ပေးနေရပါသေးတယ်။ မဆုရည်လင်းကို ရာဇသတ်ကြီး ပုဒ်မ ၅၀၅ က ဖြင့် တရားစွဲဆိုတဲ့အပြင် မှတ်ပုံတင်အတုကိုင်ဆောင်မှု ၄၂၀ပုဒ်မနဲ့ ထပ်ဆွဲဖို့ တရားရုံးက ကြိုးစားနေတယ်လို့ မိခင်သမဂ္ဂက သိရပါတယ်။ ဒါ့အပြင် နှလုံးမကောင်းတဲ့အတွက် ထောင်တွင်းမှာ နှလုံးဆေးတွေ သောက်နေရကြောင်းနှင့် ကုသရာတွင် အထူးကုနဲ့ စနစ်တကျတိုင်ပင်ပြသထားသကဲ့သို့မဟုတ်ဘဲ ဖြစ်သလိုနည်းလမ်းနဲ့ နှလုံးဆေးတွေအများကြီး တိုက်တဲ့အတွက် မိသားစုက အလွန်အမင်းစိုးရိမ်ပူပန်နေရပါတယ် “ ဟု ထုတ်ပြန်ချက်၌ ဖော်ပြထားသည်။
ကျောင်းသားများသမဂ္ဂအနေဖြင့် မဆုရည်လင်း၏ သတင်းအားမပြတ်နားစွင့်နေပြီး တစ်စုံတစ်ခုဖြစ်ခဲ့ပါက အကြမ်းဖက်စစ်အုပ်စု၏ တာဝန်သာဖြစ်ကြောင်း ထုတ်ပြန်သည်။
