▪️ရဲများက ရမ်းသမ်းပစ်ခတ်၍ အနီးရှိအမျိုးသားတစ်ဦး ကျည်ထိမှန်သေဆုံးပြီး အမျိုးသမီးတစ်ဦးဒဏ်ရာရ
▪️အပြစ်မဲ့ပြည်သူများ သေဆုံး၊ထိခိုက်မှုအတွက် လွန်စွာစိတ်မကောင်းဖြစ်ရပြီး ထပ်တူဝမ်းနည်းရသည်ဟု Dark Shadow ထုတ်ပြန်
ရန်ကုန်မြို့ ကမာရွတ်မြို့နယ်ရဲစခန်းကို လက်ပစ်ဗုံးများဖြင့် လေးကြိမ် ဖောက်ခွဲတိုက်ခိုက်ခဲ့ကြောင်း မြို့ပြပြောက်ကျားအဖွဲ့ Dark Shadowက ထုတ်ပြန်သည်။
ယနေ့(ဧပြီ ၂၁ ရက်) နံနက် ၄ နာရီ ၅၅မိနစ်နှင့် ၅ နာရီ ၄ မိနစ် အချိန်တွင် ကမာရွတ်မြို့နယ်၊လှည်းတန်းလမ်းနှင့် နာနတ်တောလမ်းထောင့်ရှိ အပြစ်မဲ့ပြည်သူများအားမတရားဖမ်းဆီးသတ်ဖျက်သော ကမာရွတ်ရဲစခန်းအား လက်ပစ်ဗုံးများဖြင့် တိုက်ခိုက်ခဲ့သည်ဟု ဆိုသည်။
Public Service Announcement
“လေးကြိမ်ဖောက်ခွဲတိုက်ခိုက်ခဲ့ပြီးထပ်မံရောက်ရှိလာသော စစ်ကောင်စီတပ်ဖွဲ့များအား ထပ်မံတိိုက်ခိုက်ခဲ့ရာ အထိခိုက်အပျက်ဆီးများစွာရှိနိုင်သည် “ဟု Dark Shadow အဖွဲ့က ပြောသည်။
ဖြစ်စဥ်အတွင်း အကြမ်းဖက်စစ်ကောင်စီတပ်၏ ရမ်းသမ်းပစ်ခတ်မှုများကြောင့် အပြစ်မဲ့ပြည်သူ လူငယ်အမျိုးသားတစ်ဦးသေဆုံးပြီး အမျိုးသမီးတစ်ဦး ဒဏ်ရာရရှိခဲ့သည့်အတွက်လွန်စွာစိတ်မကောင်းဖြစ်ရပြီး ထပ်တူဝမ်းနည်းရသည်ဟု Dark Shadow က အသိပေးသည်။
“ပစ်ခံရပြီး သေသွားတဲ့ အမျိုးသားက ကျွန်မတို့ (၆)ရပ်ကွက်ထဲကပါ ကုန်စိမ်းသွားကြိုပီး ရပ်ကွက်ထဲ ပြန်အဝင်မှာ ပစ်ခံရတာပါ”ဟု ကမာရွတ်မြို့နယ်နေသူတစ်ဦက People’s Springသို့ ပြောသည်။
သေဆုံးသွားသည့် လူငယ်သည် ယင်းပေါက်ကွဲမှုဖြစ်သည့်အချိန် မီးပွိုင့်၌ ရပ်နေသည့် တက္ကစီပေါ်တွင်လိုက်ပါလာသူဖြစ်ကြောင်း ယင်းဖြစ်စဉ်ကိုမျက်မြင်တွေ့ခဲ့ရသူတစ်ဦးက ပြောသည်။
” ရဲတွေက မနက် စျေးသွား၊စျေးလာတွေ ပစ်နေတာ၊ မနက် ၇နာရီကျော်လောက်အထိ လမ်းပေါ်က လူတွေပစ်နေတုန်း”ဟု ကမာရွတ်မြို့နယ်နေ ပြည်သူအမျိုးသမီးတစ်ဦးက ပြောသည်။
ထို့အပြင် အကြမ်းဖက်စစ်ကောင်စီ၏ ရမ်းသမ်းပစ်ခတ်မှုကြောင့် နောက်ထပ်သေဆုံးသူ အမျိုးသားတစ်ဦးရှိသေးသည်ဟု ထွက်ပေါ်နေသော်လည်း သီးခြားအတည် ပြုချက်မရသေးပေ။
လက်ရှိတွင် ကမာရွတ်မြို့နယ်အတွင်း အကြမ်းဖက်စစ်တပ်၏ DCခြောက်စီးပါ ယာဥ်တန်းဖြင့် ကင်းလှည့်နေသည်ဟု ဒေသခံများက ဆိုသည်။
