●ဒေါ်လာလိုနေသောစစ်ကောင်စီကလုပ်ငန်းရှင်များထံအတင်းအကြပ်လုနေခြင်းဟုလုပ်ငန်းရှင်များသုံးသပ်
အာရှနိုင်ငံများကို ပို့ကုန်တင်ပို့သည့် လုပ်ငန်းရှင်များအနေဖြင့် ပို့ကုန်ရငွေများကို သဘော်တင်သည့်နေမှတစ်လခွဲအတွင်း ပြည်တွင်းပြန်လည်ယူဆောင်လာရမည်ဟု စစ်ကောင်စီဗဟိုဘဏ်ယနေ့ ထုတ်ပြန်သည်။
ယခင်က ပို့ကုန်ရငွေများကို ပြည်တွင်းသို့ ၃လအတွင်းပြန်လည်ယူဆောင်လာ၍ ရမည်ဟု အာဏာသိမ်းစစ်ကောင်စီက ၂၀၂၁ နိုဝင်ဘာ ၁၁ ရက်တွင် သတ်မှတ်ခဲ့ရာမှ ယခုအခါအာရှနိုင်ငံများကို တစ်လခွဲအဖြစ် ထပ်မံကန့်သတ်လိုက်ခြင်းဖြစ်သည်။ အာရှနိုင်ငံများကို တစ်လခွဲဟု ပြောင်းလဲသတ်မှတ်ပြီးအခြားနိုင်ငံများကို ၃ လအဖြစ်သာ ဆက်လက်ထားရှိမည်ဟု စစ်ကောင်စီ ဗဟိုဘဏ်ကဆိုသည်။
လိုက်နာဆောင်ရန် ပျက်ကွက်ပါ နိုင်ငံခြားသုံးငွေစီမံခန့်ခွဲဥပဒေအရ အရေးယူမည်စစ်ကောင်စီကထပ်မံခြိမ်းခြောက်ထားသည်။
Public Service Announcement
ထိုအပြင်စစ်ကောင်စီထိန်းချုပ်ထားသည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနကလည်း ၂၀၂၁ ခုနှစ်အတွင်း ပြည်တွင်းကို ပို့ကုန်ရငွေများ သတ်မှတ်ချိန်တွင်း ပြန်လည် မယူဆောင်လာသည့် ကုမ္ပဏီ ၃၄၆ခုကို လိုင်စင်ပိတ်သိမ်းခဲ့သည်ဟု မေ၆ ရက်က ထုတ်ပြန်သည်။ ကျန်ကုမ္ပဏီများကိုလည်း ထိုသို့အရေးယူမည်ဟု ခြိမ်းခြောက်ထားသည်။
“စစ်တပ်က နိုင်ငံခြားငွေအရမ်းလိုနေလို့ အခုလို အတင်းအကြပ်တွေလုပ်နေတာ။ ပြန်ယူလာရင်လည်း ပေါက်ဈေးထက် ၁၀ ရာခိုင်နှုန်းလျှော့ပြီး ကျပ်ငွေပြောင်းခံရတယ်။ ပြီးတော့ ကျပ်ငွေလည်း အလွယ်တကူပြန်ထုတ်လို့မရဘူး”ဟု ပို့ကုန်လုပ်ငန်းရှင်တစ်ဦးကပြောသည်။
လုပ်ငန်းရှင်များကပို့ကုန်ရငွေကို စစ်ကောင်စီသတ်မှတ်ထားသောဘဏ်များသို့ပြန်ရောင်းပါက ပြင်ပတွင် ၁ ဒေါ်လာ ၂၀၀၀ ကျပ်ဝန်းကျင်ပေါက်သော်လည်း ၁၈၅၀ ကျပ်ဖြင့်မဖြစ်မနေ ပြန်ရောင်းရသည်။ထိုသို့မရောင်းပါက အရေးယူမည်ဟုခြိမ်းခြောက်ထားသည်။
စစ်ကောင်စီက တင်းကြပ်မှုများသည် ပို့ကုန်လုပ်ငန်းများ ရပ်တည်ရန်ခက်ခဲလာသည်ဟု ၎င်းကဆက်ပြောသည်။
အကြမ်းဖက်စစ်ကောင်စီသည် နိုင်ငံခြားငွေလိုအပ်ချက်အတွက် ပို့ကုန်လုပ်ငန်းရှင်များထံ အဓမ္မလုနေခြင်း သက်သက်သာဖြစ်သည်ဟုလည်း အခြားစီးပွားရေးလုပ်ငန်းရှင်တစ်ဦးကမှတ်ချက်ပြုသည်။
စစ်ကောင်စီသည် ဒေါ်လာရလိုသဖြင့် အာဏာသိမ်းထားသော ၁၅ လကျော်ကာလအတွင်း ဒေါ်လာနှင့်ပတ်သပ်သောမူဝါကို အကြိမ်ပေါင်းများစွာ အမျိုးမျိုးထုတ်ပြန် ကန့်သတ်၍ ဒေါ်လာရရန် နည်းမျိုးစုံဖြင့် လုပ်ကိုင်နေခြင်းဖြစ်သည်။
