လွတ်လပ်၍ တရားမျှတသော ရွေးကောက်ပွဲမှတဆင့် ပြည်သူတင်မြှောက်သော အရပ်သားအစိုးရ၏အုပ်ချုပ်မှုအောက်တွင်သာ ကာကွယ် ရေးတာဝန်များထမ်းဆောင်မည်ဟု ကရင်နီအမျိုးသားများကာကွယ်ရေးတပ် KNDF က ထုတ်ပြန်သည်။
ယနေ့(မေ ၃၁ ရက်)တွင် KNDF တည်ထောင်ခြင်းတစ်နှစ်ပြည့်တွင်ထုတ်ပြန်သည့်နိုင်ငံရေးမူဝါဒကြေညာစာတမ်း၌အထက်ပါအတိုင်း ဖော်ပြထားသည်။
အလားတူ အနာဂတ်ဖက်ဒရယ်ပြည်ထောင်စုတွင် ကရင်နီပြည်နယ်သည် ဖက်ဒရယ်ယူနစ်တစ်ခု၊ဖက်ဒရယ်ပြည်ထောင်စု၏ အဖွဲ့ဝင်တစ်ခုအဖြစ်တန်းတူရည်တူပါဝင်ရမည်ဟုလည်းပါရှိသည်။
ထိုအခြေအနေတွင် KNDFသည် ကရင်နီပြည်နယ်၏ ပြည်နယ်တပ်ဖွဲ့အဖြစ်သော်လည်းကောင်း နိုင်ငံတော်ဖွဲ့စည်းအုပ်ချုပ်ပုံ အခြေခံဥပဒေအရ သတ်မှတ်ထားမည့်အတိုင်း ဖက်ဒရယ်တပ်ဖွဲ့၊ပြည်ထောင်စုတပ်ဖွဲ့တွင် ကရင်နီပြည်နယ်ကို ကိုယ်စားပြု၍ အချိုးကျပါဝင်ပြီး တာဝန်ထမ်းဆောင်မည်ဟုအသိပေးသည်။
Public Service Announcement
“KNDF အနေဖြင့် ရင့်ကျက်တည်ငြိမ်ပြီးစံပြတော်လှန်ရေးတပ်ဖြစ်အောင်ရပ်တည်ပြရမှာဖြစ်တယ်။ရပ်ဝေးရပ်နီးရှိ PDF တပ်ဖွဲ့များအားလုံး မိမိတို့ KNDF နှင့်အတူ လက်တွဲ တိုက်ပွဲဝင်ကြရန် အထူးဖိတ်ခေါ်တိုက်တွန်းလိုပါတယ်”ဟု KNDF ဥက္ကဌ ခွန်းဘီထူးကပြော သည်။
KNDF သည် စစ်အာဏာရှင်ချုပ်ငြိမ်းရေး၊ဖက်ဒရယ်ဒီမိုကရေစီပေါ်ပေါက်ရေး၊ကိုယ်ပိုင်းပြ ဌာန်းခွင့်ရှိသောပြည်ထောင်စုအဖွဲ့ဝင် ကရင်နီပြည်နယ်ကို ဖော်ဆောင်သွားမည်ဟုလည်း ၎င်းက အသိပေးသည်။
KNDF၏ ရည်မှန်းချက် ရာနှုန်းပြည့်အောင်မြင်ရန်ဆက်လက်ကြိုးစားရမည်ဖြစ်ပြီး တပ်ပိုင်း ဆိုင်ရာ ဓာတ်ဓာတ်ရေးရာ၊တိုက်ပွဲနှင့် နယ်မြေ ထိန်စချုပ်မှုများအတွက်အစွမ်းကုန်ဆက်လက်ကြိုးပမ်းရဦးမည်ဟုလည်းပါရှိသည်။
ကရင်နီ(ကယား)ပြည်နယ်တွင် အာဏာသိမ်းစစ်ကောင်စီတပ်ကို ရင်ဆိုင်ရန် လက်နက်ကိုင်လမ်းစဥ်ကို ရွေးချယ်ခဲ့ပြီး နောက် ယမန်နှစ် မေလ ပထမပတ်တွင် Karenni state Army အမည်ဖြင့် တပ်ရင်း ၄ ခုဖွဲ့စည်းခဲ့သည်။
ကရင်နီပြည်နယ်တွင် တိုက်ပွဲများစတင်ခဲ့ပြီးနောက် လက်နက်ကိုင်အစုအဖွဲ့များစွာထွက်ပေါ်လာခဲ့သည့်အတွက် အမိန့်ပေးမှု ဗျူဟာ အခက်အခဲများစွာကြုံတွေ့ခဲ့၍ KSAအပါအဝင်အခြားသောအစုအဖွဲ့များစုပေါင်းကာ ကရင်နီအမျိုးသားများကာကွယ်ရေးတပ် KNDF ဟုအမည်ရွေးချယ်ကာ ယမန်နှစ် မေ ၃၁ ရက် တွင် ကရင်နီပြည်နယ် အတိုင်ပင်ခံကောင်စီ KSCC ၏ နိုင်ငံရေးလမ်းညွှန်မှုခံယူသည့်တပ်ဖွဲ့အဖြစ် ထုတ်ပြန်ကြေညာခဲ့သည်။
