စစ်ကိုင်းမှ မုံရွာမြို့သို့ တက်လာသည့် စစ်ကောင် စီယာဥ်တန်းကို မြောင်အမျိုးသမီးစစ်သည်တော် တပ်မှ ထုတ်လုပ်သော ပြင်းအားမြင့် မိုင်းလေးလုံးဖြင့် တိုက်ခိုက်ခဲ့ရာ ချက်ကောင်းထိမှန်သွားသည်ဟု မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ CDSOMက ထုတ်ပြန်သည်။
ယနေ့(စက်တင်ဘာလ ၂ရက်) နံနက် ၁၁နာရီခွဲခန့်က စစ်ကိုင်းဘက်မှ မုံရွာမြို့ဘက်သို့ ယာဉ်ငါးစီးဖြင့် တက်လာသော စစ်ကောင်စီယာဥ်တန်းကို မြောင်နှင့်မြင်းမူအခြေစိုက် ပြည်သူကာကွယ်ရေးမဟာမိတ်များက မိုင်းလေးလုံးဖြင့် ဖောက်ခွဲတိုက် ခိုက်ခဲ့ခြင်းဖြစ်သည်။
“စခတွေက သံချပ်ကာငါးစီးနဲ့ တက်လာမယ်လို့ သတင်းရတာ။ တကယ်တက်လာတော့ ဂျန်ပါနှစ်စီးနဲ့ စစ်ကားသုံးစီးနဲ့ ရောက်ချလာတာ။ လေးစီးမြောက်တည့်တည့်ကို ဖောက်ခွဲနိုင်ခဲ့တယ်”ဟု မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ CDSOM ၏ ပြောရေးဆိုခွင့်ရှ်ိသူ ကိုနွေဦးက ပြောသည်။
“အခု မိုင်းခွဲတဲ့နေရာရဲ့ ဟိုဘက်ဒီဘက်မှာ စခ တွေ တပ်ချထားတာ။ ငါးမိနစ်အတွင်းရောက်လာနိုင်တဲ့နေရာမို့ မိုင်းခွဲပြီးတာနဲ့ ပြန်ဆုတ်ခွာခဲ့ရတယ်။စစ်ခွေးတွေထိပေမယ့် အတိအကျ မသိရသေးပါဘူး”ဟုကိုနွေဦးက ဆိုသည်။
Public Service Announcement
အသုံးပြုခဲ့သည့် မိုင်းများမှာ မြောင်အမျိုးသမီးစစ်သည်တော်တပ်မှ ထုတ်လုပ်သော ပြင်းအားမြင့် မိုင်းများဟု ၎င်းက ရှင်းပြသည်။
ယနေ့ မိုင်းစစ်ဆင်ရေးကို မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ CDSOM၊ မြောင်အမျိုးသမီး စစ်သည်တော်တပ် M2W၊Black Eagle Defense Force မြင်းမူ၊ မြင်းမူ မြို့ပြပြောက်ကျားအဖွဲ့ CRF၊ People Defense Force MMU PDFနှင့်မြင်းမူလျှပ်စီးပြောက်ကျားအဖွဲ့တို့ ပူးပေါင်းလုပ်ဆောင်ကြခြင်းဖြစ်သည်။
