စစ်တပ်ပိုင် မိုင်တဲလ် ဆက်သွယ်ရေး ကုမ္ပဏီ အကြီးအကဲ ပစ်သတ်ခံရမှုမှာ ဖမ်းဆီးခံထားရတဲ့ အသက် ၂၆ နှစ်အရွယ် ကိုဗညားစိုးထက် ကို စစ်ကောင်စီက စုစုပေါင်း ထောင်ဒဏ် ၈၄ နှစ် ချမှတ်လိုက်ပါတယ်။
အဲဒီအမှုမှာ ကိုဗညားစိုးထက် အပါအဝင် အမျိုးသား ၃ ဦးနဲ့အမျိုးသမီး ၁ ဦးကို စစ်တပ်က စွပ်စွဲဖမ်းဆီးခဲ့ပါတယ်။
အဲဒီနောက် လူသတ်မှု ပုဒ်မတွေနဲ့ ကိုဗညားစိုးထက်နဲ့အမျိုးသား ၁ ဦးကို ထောင်ဒဏ် ၇၄ နှစ်စီ ၊ ကျန်အမျိုးသား ကို ထောင်ဒဏ် နှစ် ၄၀ နဲ့ အမျိုးသမီး ကို ထောင်ဒဏ် ၇ နှစ်ချခဲ့ပါတယ်။
ထောင်ဒဏ် နှစ် ၄၀ ချခံရတဲ့အမျိုးသားကလွဲရင် ကျန်တဲ့ ၃ ဦးဟာ ရန်ကုန်တော်လှန်ရေးအင်အားစု (YRF) အဖွဲ့ဝင်တွေဖြစ်တယ်လို့ YRF က အတည်ပြုထုတ်ပြန်ထားဖူးပါတယ်။
ဒီလို ဖမ်းဆီးထောင်ချထားသူ ၄ ဦးအနက် ကိုဗညားစိုးထက်ကို နောက်ထပ် ထောင်ဒဏ် ၁၀ နှစ် ထပ်ချလိုက်တာကြားသိရတယ်လို့ YRF က မနေ့က ထုတ်ပြန်ပါတယ်။
ဒါကြောင့် ကိုဗညားစိုးထက်ဟာ ထောင်ဒဏ် စုစုပေါင်း ၈၄ နှစ်ချခံထားရပြီး စစ်ကောင်စီက ဖမ်းဆီးထောင်ချထားသူတွေအနက် အမြင့်ဆုံးထောင်ဒဏ်ချခံထားရသူတွေထဲပါဝင်နေပါတယ်။