ဟန်နွေ/People’s Spring
ချင်းပြည်နယ် မင်းတပ်မြို့အခြေစိုက် ခလရ(၂၇၄) တပ်ရင်းသို့ စစ်ကောင်စီက လေယာဉ်ဖြင့် ခဲယမ်း၊ရိက္ခာထုပ်များ ထပ်မံချပေးနေကြောင်းမင်းတပ်ဒေသခံ သတင်းရင်းမြစ်က အသိပေးသည်။
မြေပြင်မှ စစ်အင်အားနှင့် ခဲယမ်းများဖြည့်တင်းရန် အခက်ကြုံနေသည့် စစ်ကောင်စီတပ်သည် ဩဂုတ်လကုန်ပိုင်းနှင့် ယခုလဆန်းတွင် လေကြောင်းမှ ရိက္ခာခဲယမ်းထုပ်များ ဖြည့်တင်းနေခြင်း ဖြစ်သည်။
Public Service Announcement
“ယခု Y-12 ကုန်တင်လေယာဉ်မှ မင်းတပ်မြို့ပေါ် ပျံဝဲနေပြီး (၂၇၄)တပ်ရင်းထဲ့သို့ လေထီးဖြင့် ခဲယမ်းနှင့် ရိက္ခာထုပ်များချနေတာ ၃ထုပ်ခန့် ရှိနေပါပြီ”ဟု မင်းတပ်ဒေသခံက ယနေ့ နေ့လည် ၁၂နာရီခန့်တွင် လူမှုကွန်ရက်တွင် ရေးသားအသိပေးထားသည်။
မြို့ပေါ် ပျံဝဲနေသည့် စစ်ကောင်စီ လေယာဉ်၏ မှတ်တမ်းဓာတ်ပုံကိုလည်း ဖော်ပြသည်။
စစ်ကောင်စီသည် ဩဂုတ် ၂၈ရက်နှင့် ဩဂုတ် ၃၁ရက်များကလည်း ယခုကဲ့သို့ လေယာဉ်ပေါ်မှ ခဲယမ်းရိက္ခာထုပ်များ လေထီးဖြင့်ချပေးခဲ့သည်ဟုဆိုသည်။ ယခင်က မင်းတပ်သို့ စစ်အင်အားနှင့် လက်နက်ခဲယမ်းများဖြည့်တင်းရာတွင် မကွေးတိုင်း ပခုက္ကူမြို့မှတဆင့် ယာဉ်တန်းများအသုံးပြု ခဲ့သော်လည်း စစ်တပ်အာဏာသိမ်းပြီးနောက် အဆိုပါ ဒေသများတွင် ဒေသကာကွယ်ရေးတပ်ဖွဲ့များ အားကောင်းလာပြီး စစ်ကောင်စီယာဉ်တန်းများအား ကြားဖြတ်တိုက်ခိုက်ခဲ့ခြင်းကြောင့် ယခုအခါ စစ်ယာဉ်တန်းများ သွားလာရန် အခက်ကြုံနေခြင်းဖြစ်သည်။
စစ်ကောင်စီသည် မင်းတပ်မြို့နယ်ကို လေကြောင်းတိုက်ခိုက်မှုများလည်း ဆက်တိုက်ပြုလုပ်လျက်ရှိသည်။ တိုက်ပွဲဖြစ်ပွားမှုမရှိဘဲ မင်းတပ်မြို့နယ်ရှိ ကျေးရွာများ အတွင်း လေကြောင်း၊ လက်နက်ကြီး၊ ဒရုန်းများ တိုက်ခိုက်မှုများ မကြာခဏ ပြုလုပ်နေခြင်းကြောင့် တိုက်ပွဲများအချိန်မရွေးဖြစ်ပွားလာနိုင်ကြောင်း မင်းတပ် ချင်းဒေသကာကွယ်ရေးတပ် (CDF)က ထုတ်ပြန်ထားသည်။
