ဟာနာဆန်/People’s Spring
မကွေးတိုင်း၊ မြိုင်မြို့နယ်ကို စစ်ကောင်စီကလေကြောင်းထပ်မံတိုက်ခိုက်ရာ သံဃာတစ်ပါးနှင့် ပြည်သူတစ်ဦး ထိခိုက်ဒဏ်ရာ ရရှိခဲ့ကြောင်း သတင်းရရှိသည်။
ယနေ့(စက်တင်ဘာ ၂၃ ရက်) နေ့လယ် ၁၂နာရီ ကျော်က မြိုင်မြို့မြောက်ဘက်၊ အင်းရောင်းရွာဘုန်းကြီးကျောင်းကို စစ်ကောင်စီက ဂျက်ဖိုက်တာနှစ်စီးဖြင့် ဗုံးကြဲတိုက်ခိုက်ခဲ့ရာ သံဃာတစ်ပါးနှင့် ပြည်သူတစ်ဦးထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။
Public Service Announcement
ထိခိုက်သူများ၏ အသေးစိတ်အချက်အလက်များအား လက်တလောမသိရသေးပေ။
ထို့အပြင် မြိုင်မြို့နယ် ကန်ကြီးတောကျေးရွာကိုလည်း စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့ပြီး အထိအခိုက်မသိရသေးကြောင်း ဒေသခံများက ပြောသည်။
“အင်းရောင်းရွာက မနေ့ညကကို နှစ်စီးနဲ့ လာကြဲသေးတယ်။ အထိအခိုက်ကတော့မသိရသေးဘူး။”ဟု မြိုင်ပကဖခေါင်းဆောင် ကိုလက်ယျာက ပြောသည်။
အလားတူ ယမန်နေ့ ညနေ ၅ နာရီခွဲခန့်ကလည်း မြိုင်မြို့နယ်၊ ကံကြီးတောရွာ
စာသင်ကျောင်းနှင့် အနီးကိုလည်း စစ်ကောင်စီက ဂျက်ဖိုက်တာဖြင့် လေကြောင်းတိုက်ခိုက်ရာ နေအိမ်တစ်လုံးပျက်စီးပြီး ဘုန်းကြီးကျောင်း အနည်းငယ်ပျက်စီးကြောင်း ဒေသခံများက ပြောသည်။
ထို့အပြင် ယမန်နေ့ကပင် ရေစကြိုနှင့် မြင်းခြံမြို့နယ်တွင် လေကြောင်းတိုက်ခိုက်မှုကြောင့် ကိုယ်ဝန်သည်တစ်ဦးအပါအဝင် အမျိုးသမီး ၇ ဦး ဒဏ်ရာရရှိခဲ့ပြီး ၃ဦး သေဆုံးခဲ့သေးသည်။
စစ်ရှုံးနေသော စစ်ကောင်စီတပ်သည် လေကြောင်းနှင့်လက်နက်ကြီးတိုက်ခိုက်မှုများ ဆက်တိုက်ပြု လုပ်နေပြီး စက်တင်ဘာ ၂၀ နှင့် ၂၁ရက်က ဖားကန့်၊ နောင်ချို၊ စဥ့်ကူး၊ မတ္တရာမြို့နယ်များတွင် စစ်တပ်၏ ပစ်ခတ်တိုက်ခိုက်မှုများကြောင့် အနည်းဆုံးပြည်သူ ၉ ဦးသေဆုံးကာ ၁၆ ဦးထက်မနည်း ထိခိုက်ဒဏ်ရာရရှိခဲ့သည်။
