ဟန်နွေ/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင်(ခလယ်လွီထူခရိုင်)အတွင်း စစ်ကောင်စီကဒရုန်း၊လက်နက်ကြီးများဖြင့်ပစ်ခတ်တိုက်ခိုက်ခဲ့၍ အရပ်သား သေဆုံးထိခိုက်မှုများ ထပ်မံ ဖြစ်ခဲ့ကြောင်း KNU ဗဟိုက ယနေ့(နိုဝင်ဘာ ၁၄ရက်)သတင်းထုတ်ပြန်သည်။
ညောင်လေးပင်ခရိုင်အတွင်းရှိ ကျောက်ကြီး(လယ်ဒို) မြို့နယ်နှင့် မုန်း(မူး)မြို့နယ်များအတွင်းစစ်ကောင်စီတပ်မှ ပြည်သူလူထုများအား ပစ်မှတ်ထားပြီး ရည်ရွယ်ချက်ရှိရှိ ဒရုန်းဖြင့်ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်း တို့ပြုလုပ်ခဲ့ခြင်းဖြစ်သည်ဟု ဆိုသည်။
ကျောက်ကြီးမြို့နယ်တွင် နိုဝင်ဘာ ၁၃ရက်နံနက်က ပိန်းဇလုပ်အခြေစိုက်ခလရ-၂၆၄ တပ်ရင်းမှ ကျောက်ကုန်း ကျေးရွာအတွင်း ဒရုန်းဖြင့် ဗုံးကြဲတိုက်ခိုက်ခဲ့ရာ နေအိမ်တစ်လုံးထိမှန်ကာ (၆)လနှင့် (၈)နှစ်အရွယ်ကလေးငယ် နှစ်ဦး ဒဏ်ရာရခဲ့သည်ဟု KNUက ထုတ်ပြန်သည်။
Public Service Announcement
နိုဝင်ဘာ၁၂ရက် ညကလည်း ခလရ-၂၆၄ တပ်ရင်းမှ ဒရုန်းဖြင့်ဗုံးကြဲတိုက်ခိုက်ခဲ့ရာ ဝမ်းချဲကျေးရွာ၊ မက်စလီကုန်း ကျေးရွာ နှင့်ကျောင်းကုန်း ကျေးရွာများသို့ ကျရောက်ပေါက်ကွဲခဲ့သည့်အပြင် ကညှင်ကြိုး ကျေးရွာ ချိန်းကြောင်း တံတားတွင် ကျရောက်ပေါက်ကွဲခဲ့သည်ဟု အသိပေးထားသည်။
မုန်းမြို့နယ်တွင်မူ စစ်ကောင်စီ၏ ဒရုန်းဖြင့်တိုက်ခိုက်မှုကြောင့် အသက် ၂၀နှစ်အရွယ် အမျိုးသမီးငယ် တစ်ဦးသေဆုံးခဲ့သည်ဟု KNUက ထုတ်ပြန်သည်။
နိုဝင်ဘာ ၁၂ရက်တွင် ခမရ-၄၃၉ တပ်ရင်းမှ မျက်နီကွင်းကျေးရွာတွင်းသို့ ဗုံးကြဲတိုက်ခိုက်ခဲ့ရာ အမျိုးသမီးတစ်ဦးသေဆုံးပြီး သက်ကြီးအမျိုးသမီး တစ်ဦး ဒဏ်ရာရရှိခဲ့သည်ဟု ဆိုသည်။
နိုဝင်ဘာ ၁၁ရက်ကလည်း စစ်ကောင်စီတပ်က ပစ်ခတ်သည့် လက်နက်ကြီးကြောင့် မုန်းမြို့နယ် ထွနီကုန်းကျေးရွာမှ အမျိုးသမီးတစ်ဦး ဒဏ်ရာရရှိခဲ့သည်ဟု ဖော်ပြသည်။
ညောင်လေးပင်ခရိုင်တွင် စစ်ကောင်စီတပ်က လက်နက်ကြီး၊ လေကြောင်း၊ ဒရုန်းများအသုံးပြုပြီး ပြည်သူနေထိုင်ရာနေရာများအား ပစ်မှတ်ထား တိုက်ခိုက်၍ အရပ်သားသေဆုံးထိခိုက်မှုများ မကြာခဏ ဖြစ်ပွားလျက်ရှိသည်။
