ဒီးဒီ၊မေ/People’s Spring
ပြည်သူများအား လေကြောင်းမှဗုံးကြဲတိုက်ခိုက်နေ၍ အလိုရှိစာရင်းတွင်ပါဝင်သော စစ်ကောင်စီလေတပ်မှ ဗိုလ်ကြီး ကြည်ဖေလင်းအား မန္တလေးတိုင်း၊ တောင်သာမြို့နယ်တွင် ပစ်ခတ်ရှင်းလင်းခဲ့ကြောင်း ပြည်သူ့လွတ်မြောက်ရေးတပ်မတော် – PLAက အသိပေးထုတ်ပြန်သည်။
တောင်သာမြို့နယ် အေးရွာတွင် လက်ဖက်ရည်ထိုင်သောက်နေသည့် လေတပ်မှ ဗိုလ်ကြီး ကြည်ဖေလင်းနှင့် ၎င်း၏ တပည့်ဖြစ်သူ တို့အား ဒီဇင်ဘာ ၂၉ရက် နံနက် ၇နာရီကျော်တွင် ပြည်သူ့လွတ်မြောက်ရေးတပ်မတော် – PLA၏ အမှတ် ၈၁၅ တပ်ဖွဲ့ (အနောက်မြောက်စစ်ဒေသ)က ပစ်ခတ်ရှင်းလင်းခဲ့ခြင်းဟု အသိပေးထားသည်။
တောင်သာမြို့နယ်က ဓာတ်ငွေ့ပိုက်လိုင်းစက်ရုံအနီး စစ်ကောင်စီတပ်၏ လုံခြုံရေးကင်းဘူခန်းရှိပြီး အဲဒီကင်းစခန်း၌ တာဝန်ကျနေသည့်လေတပ်ဗိုလ်ကြီးနှင့် ဒုအရာခံဗိုလ်တို့ ဖြစ်သည်။
Public Service Announcement
” လေတပ်ကဗိုလ်ကြီးပါ။ အနောက်မြောက်စစ်ဒေသအဖွဲ့က ရှင်းလင်းခဲ့တာပါ”ဟု ပြည်သူ့လွတ်မြောက်ရေးတပ်မတော် – PLA၏ ပြောရေးဆိုခွင့်ရှိသူက ပြောသည်။
လေတပ်ဗိုလ်ကြီး ကိုင်ဆောင်သည့် MA5 MK1 သေနတ်အား သိမ်းဆည်းရရှိခဲ့ကြောင်းလည်း အသိပေးထားသည်။
ပြည်သူလူထုအား လေကြောင်းမှ ဗုံးကြဲသတ်ဖြတ်နေရာတွင် အဓိက ထိန်းကြောင်းကွပ်ကဲနေသည့် စစ်ကောင်စီလက်အောက်ခံ လေတပ်အရာရှိများ၏ နေရပ်လိပ်စာများနှင့် အလိုရှိစာရင်းအား Operation Spitfireက ထုတ်ပြန်ထားရာ အခုအသတ်ခံရသည့် ဗိုလ်ကြီး ကြည်ဖေလင်းပါဝင်သည်။
ထိုစာရင်းတွင် လေတပ်ကို အဓိက ကွပ်ကဲ့နေသည့် ဗိုလ်ချုပ်အဆင့်မှစ၍ ဗိုလ်ကြီးအဆင့် အထိ ပါဝင်သည်။
၎င်းတို့သည် စစ်ရာဇဝတ်မူကျူးလွန်သူများဖြစ်ပြီး ၎င်းတို့၏ မိသားစုနှင့် ဆွေမျိုးများစာရင်းပါ ရရှိထားသောကြောင့် ပြည်သူဘက်မျက်နှာမူရန်လည်း Operation Spitfire က တိုက်တွန်းထားသည်။
စစ်ကောင်စီတပ်က မြေပြင်တိုက်ပွဲများတွင်အထိနာပါက တိုက်လေယာဥ်များ၊ရဟတ်ယာဥ်များဖြင့် ပြည်သူများကိုပါမရှောင် ဗုံးကြဲခြင်း၊ပစ်ခတ်တိုက်ခိုက်ခြင်းများကို နိုင်ငံတစ်ဝန်းပြုလုပ်နေသည်။
