ရဲခေါင်/People’s Spring
လွိုင်ကော်မြို့အရှေ့ခြမ်းရှိ စစ်ရှောင်စခန်းဗုံးကြဲတိုက်ခိုက်ခံရမှုတွင် ဒဏ်ရာရ(၁)နှစ်ကျော်အရွယ်ကလေးငယ်နှင့် အမျိုးသမီးတစ်ဦး ထပ်မံသေဆုံးခဲ့ကြောင်း စစ်ရှောင်အရေးကူညီနေသူအချို့ကပြောသည်။
ဒီဇင်ဘာ ၃၁ရက် ညနေ ၄ နာရီခန့်တွင် ဆင်စခန်း စစ်ဘေးရှောင်စခန်းကို စစ်ကောင်စီက တိုက်လေယာဥ်ဖြင့် ဗုံးသုံးကြိမ်ကြဲတိုက်ခိုက်ရာတွင် (၁)နှစ်ကျော်အရွယ် ကလေးငယ်၏မိခင် သေဆုံးပြီး သုံးထိခိုက်ဒဏ်ရာရရှိခဲ့သည်။
ထို့အပြင် (၁)နှစ်ကျော်အရွယ်ကလေးငယ်မှာလည်း ဗုံးစထိမှန်၍ ဒဏ်ရာရရှိရာ အဆိုပါ ဒဏ်ရာဖြင့် သေဆုံးခဲ့ခြင်း ဖြစ်သည်။
Public Service Announcement
“(၁)နှစ်ကျော် ကလေးငယ်တစ်ဦးနဲ့ အဒေါ်တစ်ဦး ကုသမှုခံယူနေရင်း ဒဏ်ရာပြင်းထန်တဲ့အတွက် ထပ်မံသေဆုံးသွားရတယ်လို့ သိရပါတယ်ဗျာ။ဆက်လက်ကုသမှုခံယူနေရတဲ့ ကျောင်းသူတစ်ဦး လည်း စိုးရိမ်ရတဲ့အနေအထားရှိနေပါတယ်”ဟု လွိုင်ကော်စစ်ရှောင်အရေးကူညီနေသူ တစ်ဦးကပြောသည်။
ထို့ကြောင့် ဗုံးကြဲတိုက်ခိုက်ခံရမှုအတွင်း သေဆုံးသူ သုံးဦးအထိရှိလာသည်။
စစ်ကောင်စီတပ်၏ အရပ်သားပြည်သူ စစ်ဘေးရှောင်များအပေါ် ရည်ရွယ်ချက်ရှိရှိ သတ်ဖြတ်ရက်စက်မှုနှင့် စစ်ရာဇဝတ်မှုများဟုလည်း ၎င်းက အသိပေးသည်။
နှစ်သစ်ကူးညကလည်း ဒီးမော့ဆိုမြို့နယ် အနောက်ဘက်ခြမ်းကို စစ်ကောင်စီက လေကြောင်းတိုက်ခိုက်မှုပြုလုပ်ခဲ့ပြီး ထိခိုက်မှုအခြေအနေမသိရသေးကြောင်း ဒေသတွင်းသတင်းရင်းမြစ်အချို့က ဆိုသည်။
ပြီးခဲ့သည့် ဒီဇင်ဘာ ၂၇ ရက်ကလည်း ရှမ်း – ကရင်နီပြည်နယ်အစပ် ဖယ်ခုံမြို့အနောက်ခြမ်း ပီကင်းကျေးရွာကို စစ်ကောင်စီက လေကြောင်းမှ ဗုံးကြဲတိုက်ခိုက်ရာ ပြည်သူသုံးဦးထိခိုက်ဒဏ် ရာရရှိခဲ့သည်။
ဖယ်ခုံ၊မိုးဗြဲမြို့အပါအဝင် ကရင်နီပြည်နယ်၌ စစ်တပ် အာဏာသိမ်းပြီးနောက်ပိုင်း ၂၀၂၄ နိုဝင်ဘာလကုန်အထိ သတ်ဖြတ်ခံရသည့် ပြည်သူ ၅၃၂ ဦးရှိပြီး စစ်ဘေးရှောင်စဥ်သေဆုံးသူ ၁၇၀ဦးရှိကြောင်း တိုးတက်သောကရင်နီပြည်သူ့အင်အားစုက ထုတ်ပြန်ထားသည်။
