ပခုက္ကူမှာ မြစ်ရေတိုက်စားလို့ ကျေးရွာ ၂ရွာ အရေးပေါ်ရွှေ့ပြောင်း

ဇွန် ၂၈၊ ၂၀၂၆။ ဇေအောင်/People’s Spring

မကွေးတိုင်း၊ ပခုက္ကူမြို့နယ်မှာ ဧရာဝတီမြစ်ရေတိုက်စားလို့ သိမ်ကုန်းနဲ့ မရိုးကုန်း ကျေးရွာ အရေးပေါ်ရွှေ့ပြောင်းနေရကြောင်း ဒေသခံတွေက ပြောပါတယ်။

ပခုက္ကူမြို့နယ်က ဧရာဝတီမြစ်ဘေးမှာ တည်ထားတဲ့ သိမ်ကုန်းရွာနဲ့ မရိုးကုန်းရွာဟာ နှစ်စဥ် ကမ်းပါးပြိုကျမှုဒဏ်ကြောင့် နေအိမ်တွေ၊ စာသင်ကျောင်းတွေ၊ ဘုန်းကြီးကျောင်းနဲ့စေတီတွေ၊ လယ်မြေတွေ ဆုံးရှုံးခဲ့ရပါတယ်။ ယခု ဇွန်လထဲမှာ ဧရာဝတီမြစ်ရေတက်လာချိန် ကမ်းပါးပြိုကျမှုတွေ ထပ်မံ ဖြစ်ပွားလာတာကြောင့် အဆိုပါကျေးရွာက အိမ်ခြေရာချီရှိတဲ့အနက် ၃ ပုံ ၂ ပုံ ရွှေ့ပြောင်းထားရကြောင်း ဒေသခံတွေက ပြောပါတယ်။

“ဖျက်ထားတဲ့အိမ်တွေကလည်း ပုံထားရတုန်း။ ရွှေ့တော့ရွှေ့နေပါပြီ။ သုံးပုံနှစ်ပုံလောက်တော့ ရွှေ့ပြီးကုန်ပြီ။ လက်ရှိ ရွာမှာတော့ သုံးပုံတစ်ပုံလောက်တော့ ကျန်ပါသေးတယ်။ ကျန်တဲ့အိမ်လေးတွေကလည်း ရေဝိုင်းလာပြီ”လို့ ဒေသခံတစ်ဦးက ပြောပါတယ်။

Public Service Announcement

အိမ်ဖျက် အပြောင်းအရွှေ့ကို ရွာသူရွာသားတွေစုပေါင်းလုပ်နေပေမဲ့ ကမ်းပါးပြိုကျမှုတွေ ဆက်တိုက်ဖြစ်နေတာကြောင့် အခက်အခဲရှိနေတယ်လို့ သိရပါတယ်။ ဒါ့အပြင် ကမ်းပါးပြိုကျတဲ့နေရာနဲ့ဝေးတဲ့နေရာမှာ ရွာအသစ်တည်ဖို့ကိုလည်း ကြိုးစားနေကြပြီး သောက်သုံးရေကအစ လိုအပ်မှုတွေရှိနေတယ်လို့ ဒေသခံတွေက ပြောပါတယ်။

လက်ရှိ ပခုက္ကူမြို့နယ်မှာ တိုက်ပွဲတွေလည်း ဖြစ်ပွားနေတာကြောင့် လမ်းပန်းဆက်သွယ်ရေးတွေ ခက်ခဲနေပြီး အိမ်သုံးကုန်မာပစ္စည်းတွေကအစ ဝယ်ယူရခက်ခဲနေကြောင်း ဒေသခံတွေက ပြောပါတယ်။

မန္တလေးတိုင်း၊ စစ်ကိုင်းတိုင်းနဲ့ မကွေးတိုင်းက မြစ်​ဘေးနေကျေးရွာတွေဟာ နှစ်စဥ် ရေ​ကြီးကာလမှာ မြစ်ကမ်းပါးပြိုကျမှုဒဏ် ရင်ဆိုင်နေရပြီး လုပ်စားမြေတွေ၊ နေအိမ်နေရာတွေ ဆုံဲဲးရှုံးနေပါတယ်။