ဇူလိုင်-၄၊၂၀၂၆။သုည/People’s Spring
ရန်ကုန်မြို့မှာ ဒီကနေ့ (ဇူလိုင် ၄) ရက် နံနက်အစောပိုင်းက ငလျင်လှုပ်ခတ်ခဲ့ပြီး မြို့နယ်အများစုရှိ အထပ်မြင့်တိုက်ခန်းနေသူတွေ သိသာစွာ ခံစားလိုက်ရကြောင်း ဒေသခံပြည်သူတွေက ပြောပါတယ်။
နံနက် ၆ နာရီ ၅၁ မိနစ်က ငလျင်လှုပ်ခတ်ခဲ့တာ ဖြစ်ပြီး အသံမြည်ကာ တိုက်ခန်းတစ်ခုလုံး ရမ်းခါသွားကြောင်း စမ်းချောင်းမြို့နယ်နေ ပြည်သူတစ်ဦးက ပြောပါတယ်။
“ဒီတခေါက်လှုပ်တာတော်တော်ကြမ်းတယ်။ အသံပါပါတယ်။အသံတချက်မြည်ပြီး တိုက်ခန်းတစ်ခုလုံးကို ဆွဲခါလိုက်သလိုပဲ။ အိပ်နေတဲ့လူတွေပါအကုန်လန့်နိုးတယ်။လှုပ်တာကတော့ တချက်ထဲ ဆိုပေမယ့် အရမ်းသိသာတယ်” လို့ စမ်းချောင်းမြို့နယ်နေ ပြည်သူတစ်ဦးက ပြောပါတယ်။
Public Service Announcement
တာမွေမြို့နယ်မှာနေတဲ့ ပြည်သူတစ်ဦးကလည်း “အထပ်မြင့်မှာ နေတဲ့သူတွေက တော်တော်ကို သိသာစွာ ခံစားလိုက်ရတယ်။ အသံအကျယ်ကြီးဒုန်းဆိုကြားပြီးမှတိုက်ခန်းတစ်ခုလုံး ဆွဲကိုင်လှုပ်လုပ်သလိုကို ဖြစ်သွားတာပါ။ ဒါပေမယ့် အိမ်ရှေ့ထွက်ကြည့်တော့ မြေပြင်ကသူတွေကတော့ပုံမှန်အတိုင်းလမ်းလျှောက်သွားလာနေပါတယ်” လို့ ပြောပါတယ်။
ပုဇွန်တောင်၊ အလုံ၊ မင်္ဂလာတောင်ညွှန့်၊ သာကေတ အစရှိတဲ့ မြို့နယ်တွေမှာလည်း ငလျင်လှုပ်တာကို သိသာစွာ ခံစားလိုက်ရကြောင်း ဒေသခံပြည်သူတွေက ပြောပါတယ်။
ငလျင်ဟာရန်ကုန်တိုင်းဘန့်ဘွေးကို အခြေပြုပြီးပြင်းအား၃.၅နဲ့လှုပ်ခတ်ခဲ့ခြင်းဖြစ်ကြောင်း Myanmar Earthquake Alert က ဖော်ပြထားပါတယ်။
