ဇူလိုင်-၈၊၂၀၂၆။မိထက်/People’s Spring
စစ်ကိုင်းတိုင်း၊ခန္တီးမြို့မှာ တောင်ယာတဲတစ်ခုကို မိုးကြိုးပစ်လို့ ဒေသခံတဦးသေဆုံးပြီး နှစ်ဦးဒဏ်ရာရခဲ့ပါတယ်။
ခန္တီးမြို့နယ်၊အောင်မြေကျေးရွာက တောင်ယာတဲတစ်ခုကို ဇူလိုင်လ ၇ရက် မနက် ၄နာရီခန့်မှာ မိုးကြိုးပစ်ခံရတာဖြစ်ပါတယ်။
” မိုးတွေသည်းသည်းမဲမဲရွာနေချိန်မှာ ဖြစ်တာဗျ။ တဲထဲမှာ သုံးယောက်ရှိတာ။ တစ်ယောက် ဆုံးတယ်။ နှစ်ယောက်ကဒဏ်ရာရလို့ ဆေးပြရတယ်” လို့ ဒေသခံတဦးကပြောပါတယ်။
Public Service Announcement
သေဆုံးသူဟာအသက် ၂၈နှစ်အရွယ်အမျိုးသားဖြစ်ပါတယ်။
ခန္တီးမြို့အပါအဝင် စစ်ကိုင်းတိုင်းကမြို့တွေမှာယခုရက်ပိုင်းမိုးသည်းထန်နေပြီး လေပြင်းတိုက်ခတ်တာနဲ့မိုးကြိုးပစ်တာတွေလည်းကြုံတွေ့နေရတယ်လို့ဒေသခံတွေကပြောပါတယ်။
ယခုနှစ် မိုးရာသီမှာ မိုးကြိုးပစ်လို့ လူနဲ့ တိရိစ္ဆာန် ထိခိုက်သေဆုံးမှုတွေမကြာခဏဖြစ်ပေါ်နေပါတယ်။ရှမ်းပြည်နယ်မှာ ပြီးခဲ့တဲ့မေလကလည်းမိုးကြီးပြီး လူနဲ့ အိမ်မွေးတိရိစ္ဆာန်တွေထိခိုက်သေဆုံးစေတဲ့အထိမိုးကြိုးထိမှန်တဲ့ဖြစ်စဉ်တွေရှိခဲ့ပါတယ်။အဆိုးရွားဆုံးဖြစ်စဉ်ကတော့ ပြီးခဲ့တဲ့မေလ၂၁ရက်မှာ ရှမ်းပြည်
နယ် ဆီဆိုင်မြို့နယ်အတွင်း မိုးကြိုးပစ်လို့ နွား၄၉ကောင်သေဆုံးခဲ့တာပါ။
အခုရက်ပိုင်း ဘင်္ဂလားပင်လယ်အော်မှာလေဖိအားနည်းရပ်ဝန်းဖြစ်နေပြီး မုတ်သုန်လေအားကောင်းနေတာကြောင့် လေထု မတည်မငြိမ်ဖြစ်စဉ် ရှိနေပါတယ်။ဇူလိုင်လ(၁၂)ရက်ခန့်မှာလည်း ဘင်္ဂလားပင်လယ်အော်မြောက်ပိုင်းမှာ လေဖိအားနည်းရပ်ဝန်းတစ်ခု ထပ်ဖြစ်နိုင်ပြီး မိုးကြီးလို့ဖြစ်နိုင်တဲ့ရေဘေးအပြင် လေပြင်းတိုက်ခတ်ခြင်း၊ လျှပ်တပြက် ရေလွှမ်းမိုးခြင်း၊ မိုးကြိုးပစ်ခြင်း၊ မြေပြိုခြင်း၊ တောင်ပြိုခြင်းနဲ့ကမ်းပါးပြိုခြင်းတွေ အထူးသတိပြု နေထိုင်ကြဖို့ အမျိုးသားညီညွတ်ရေးအစိုးရ(NUG)၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)ကသတိပေးထားပါတယ်။
