မြန်မာ-ထိုင်းနယ်စပ် အနီးရှိ အာဏာသိမ်းစစ်ကောင်စီ၏ သော်လဲထာတပ်စခန်းကို KNU/KNLA ကယနေ့နံနက် လေးနာရီခွဲတွင် တိုက်ခိုက်သိမ်းပိုက်ခဲ့ကြောင်း ကရင်အမျိုးသားအစည်းအရုံး(KNU) ကသတင်းထုတ်ပြန်သည်။
“စခန်းတော့ တကယ်ကျသွားတယ် အဲ့ဒါအမှန်ပဲ အခုလက်ရှိတင်ပြတာ မရှိသေးတော့ အသေးစိတ် အချက်အလက်မရသေးဘူးပေါ့နော်။ စခန်းတော့ သိမ်းပြီးသွားပြီ” လို့ KNU တပ်မဟာ ပြောရေးဆိုခွင့်ရှိသူ ဒုတိယဗိုလ်မှူးကြီး စောကလယ်ဒိုက ပြောပါတယ်။
အဆိုပါစခန်းသည် စစ်အုပ်စုက အာဏာသိမ်းပြီးနောက် ထိုင်းနိုင်ငံက နယ်စပ်ရှိ စစ်ကောင်စီတပ်ဖွဲ့ဝင်များအတွက် ဆန် နှင့်ဆီအပါအဝင် စားနပ်ရိက္ခာများကို ကုန်တင်ကားများဖြင့် လာရောက်ပို့ဆောင်ရာ KNU ကကန့်ကွက်တားဆီးသဖြင့် အခြေအနေတင်းမာခဲ့သော စခန်းတစ်ခုဖြစ်သည်။
KNU ၏တားဆီးမှုကြောင့် စစ်ကောင်စီတပ်ဖွဲ့ဝင်များမှာ အဆိုပါစားနပ်ရိက္ခာများကို မယူရဲတော့ဘဲ ၊ကုန်ပို့သူများက ကုန်များကို ကားဖြင့်ပြန်သယ်သွားခဲ့သည်။
သော်လဲထာ စခန်းကို ဧပြီ ၂၇ နံနက်တွင် သိမ်းယူပြီးနောက် KNU ကသတင်းထုတ်ပြန်ရာတွင် “မိဘပြည်သူများအတွက် အနှောက်အယှက်ဖြစ်စေသော၊ မိဘပြည်သူများကိုခြောက်လှန့်ပစ်ခတ်နေသော တပ်စခန်းများကိုလည်း ထပ်မံတိုက်ခိုက်သိမ်းယူမည် ဖြစ်ပါသည်” ဟုဖော်ပြထားသည်။