အမျိုးသားညီညွတ်ရေးအစိုးရ (NUG)အနေနဲ့ အမေရိကန်အစိုးရက ထိန်းသိမ်းပေးထားတဲ့မြန်မာနိုင်ငံရဲ့ အမေရီကန် ဒေါ်လာ ၁ ဘီလီယံ ပြန်လည်ရရှိရေးအတွက် ကြိုးပမ်းနေတယ်လို့ ပြည်ထောင်စုဝန်ကြီးချုပ် မန်းဝင်းခိုင်သန်းက ပြောပါတယ်။
အမျိုးသားညီညွတ်ရေးအစိုးရ(NUG)ရဲ့ ရက်ပေါင်း ၁၀၀ အတွင်း ဆောင်ရွက်ခဲ့မှုအခြေအနေကို ပြည်ထောင်စုဝန် ကြီးချုပ် မန်းဝင်းခိုင်သန်းက ပြည်သူလူထုကို ဗီဒီယိုရုပ်သံနဲ့ ဇူလိုင် ၃၀ ရင်မှာရှင်းလင်းအစီရင်ခံခဲ့ရာမှာထည့်သွင်းပြောကြားခဲ့တာပါ ။ ဒေါ်အောင်ဆန်းစုကြည် ဦးဆောင်တဲ့ ပြည်သူ့အစိုးရလက်ထက်မှာ အမေရိကန်ဒေါ်လာ ၁ ဘီလီယံကို အမေရီကန်ဘဏ်တွေမှာ အပ်နှံထားခဲ့ပါတယ် ။ ဖေဖော်ဝါရီ ၁ ရက် စစ်တပ်အာဏာသိမ်းခဲ့တာကြောင့် အမေရီကန်အစိုးရက အပြင်းအထန် ကန့်ကွက်ပြီး အမေရီကန် ဒေါ်လာ ၁ ဘီလီယံကို အမေရီကန် သမ္မတ ဂျိုးဘိုင်ဒန်အမိန့်နဲ့ မြန်မာနိုင်ငံအတွက်ထိန်းသိမ်းပေးထားတာဖြစ်ပါတယ်။
အမေရိကန် အစိုးရထိန်းသိမ်းပေးထားတဲ့ ဒေါ်လာ ၁ ဘီလီယံကို ပြန်လည်ရရှိရေးအတွက် ပြည်သူလူထုထောက်ခံမှု အပြည့်အဝရှိတဲ့NUG အစိုးရရဲ့ စီမံကိန်း၊ဘဏ္ဍာရေးနဲ့ ရင်းနှီးမြုပ်နှပ်မှု ဝန်ကြီးဌာနက ကော်မတီတစ်ရပ်ဖွဲ့ပြီးကြိုးစားနေတာဖြစ်ပါတယ် ။ အဲဒီငွေတွေသာပြန်ရခဲ့ရင် ပြည်သူတွေရဲ့ စစ်အာဏာရှင်ပြုတ်ကျရေး နွေးဦးတော်လှန်ရေးအတွက် များစွာအထောက်အကူဖြစ်နိုင်ပါတယ် ။အာဏာသိမ်းစစ်တပ်ကလည်း အဲဒီငွေတွေ လိုချင်လို့အမေရိကန်အစိုးရဆီတောင်းဆိုခဲ့ပေမယ့် အမေရီကန်အစိုးရက ငြင်းပယ်ခဲ့တာဖြစ်ပါတယ်။
ဒါအပြင် NUG အစိုးရက ရက်ပေါင်း ၁၀၀ အတွင်းမှာ စစ်ပွဲတွေဖြစ်ပွားနေတဲ့ဒေသတွေကစစ်ဘေးဒုက္ခသည်တွေအပါအဝင် လိုအပ်နေတဲ့ပြည်သူတွေထံ ကျပ်သိန်း ၇၁၅ သိန်းကျော်ဖိုး ကိုလူသားချင်းစာနာထောက်ထားမှုနဲ့ ဘေးအန္တရာယ်စီမံခန့်ခွဲမှုဝန်ကြီးဌာနက ထောက်ပံခဲ့ပါတယ် ။ဒါအပြင်စစ်အာဏာရှင်ကို အကြမ်းမဖက်ဘဲ ဖီဆန်နေတဲ့ CDM ဝန်ထမ်း ၆၆၀ ကျော်အတွက်ကျပ်သိန်း ၆၉၀ကျော် ထောက်ပံ့ခဲ့တယ်လို့ဆိုပါတယ်။ဒါအပြင် ကပ်ရောဂါတိုက်ဖျက်ရေးအတွက်လည်း ကြိုးပမ်းပေးနေပါတယ်။
ဧပြီ ၁၆ မှာ စတင်ဖွဲ့စည်းတဲ့ အမျိုးသားညီညွတ်ရေးအစိုးရကို ဝန်ကြီးဌာန ၁၁ ခုနဲ့ စတင်ခဲ့ပြီးလိုအပ်တဲ့ ဝန်ကြီးဌာနတွေကို တိုးချဲ့ခဲ့ရာ အခုအချိန်မှာ ဝန်ကြီးဌာန ၁၆ ခုရှိနေပြီဖြစ်ပြီး အကြမ်းဖက်စစ်အုပ်စု အပြီး ပြုတ်ကျစေရေးကို အန္တိမရည်မှန်းချက်ထား လုပ်ဆောင်နေတယ်လို့ မန်းဝင်းခိုင်သန်းက ရှင်းပြပါတယ်။
လက်ရှိနိုင်ငံအတွင်း ဆိုးရွားစွာရင်ဆိုင်နေရတဲ့ ကိုဗစ်-၁၉ ကပ်ရောဂါ ထိရောက်စွာထိန်းချုပ်နိုင်ဖို့ ကြိုးပမ်း ဆောင်ရွက်နေပြီး NUG ကို ကုလသမဂ္ဂနဲ့ နိုင်ငံတကာက အသိအမှတ်ပြုလာစေဖို့လည်းအစွမ်းကုန်လုပ် ဆောင်နေတယ်လို့ ဆိုပါတယ်။
အာဏာသိမ်းစစ်ကောင်စီကို နိုင်ငံတကာအသိအမှတ်မပြုဘဲ ထိရောက်စွာအရေးယူပိတ်ဆို့နိုင်ရေး၊ နိုင်ငံတကာ ဥပဒေနဲ့ နိုင်ငံတကာတရားရုံးတွေမှာ တရားစွဲဆိုနိုင်ရေးတို့ကိုလည်း လုပ်ဆောင်နေပြီး စစ်ကောင်စီကို စစ်ရေး၊ နိုင်ငံရေး၊ သံတမန်ရေးအရ အပြီးသတ်ချေမှုန်းနိုင်ဖို့ စီမံချက်ရေးဆောင်ရွက်နေတယ်လို့ ပြည်ထောင်စုဝန်ကြီး ချုပ်က ပြောပါတယ်။
ဒါအပြင် ကာကွယ်ရေးဝန်ကြီးဌာန အောက်မှာ စစ်လက်နက်ဝယ်ယူရေးကော်မတီဖွဲ့စည်းဆောင်ရွက်နေတယ်လို့လည်း ဆိုပါတယ်။
“အမျိုးသားညီညွတ်ရေးအစိုးရအနေဖြင့် လက်ရှိရင်ဆိုင်ကြုံတွေ့နေရသော ကပ်ရောဂါဘေးဆိုးကို အောင်မြင်စွာကျော်လွှားနိုင်ရေး ပြည်သူနှင့်အတူ ကြိုးပမ်းဆောင်ရွက်နေသလို ၊တိုင်းရင်းသားညီနောင်များနဲ့ ပြည်သူတစ်ရပ်လုံး၏ လိုလားတောင့်တမှုဖြစ်သောဖက်ဒရယ် ဒီမိုကရေစီပြည်ထောင်စု ထူထောင်နိုင်ရေးအတွက် ဆူးညှောင်သဖွယ်ဖြစ်နေသည့် အကြမ်းဖက်စစ်ကောင်စီအား အမြစ်ပြတ်ချေမှုန်နိုင်ရေးကို မျက်ခြေမပြတ်ဘဲပြည်သူ့ကာကွယ်ရေးတပ်များဖွဲ့စည်းပြင်ဆင်ခြင်း ၊တိုင်းရင်းသားညီနောင်များနှင့် လက်တွဲလုပ်ဆောင်ခြင်း ၊နိုင်ငံတကာနှင့်ချိတ်ဆက်ဆောင်ရွက်ခြင်း ပြုဖွယ်ကိစ္စအဝဝကို စနစ်တကျဖြင့် ၊ပြင်ဆင်စီမံခြင်းတို့ကို အချိန်နှင့်တစ်ပြေးညီ စီစဥ်ဆောင်ရွက်လျက်ရှိပါကြောင်း အစီရင်ခံတင်ပြအပ်ပါသည်။အရေးတော်ပုံအောင်ရမည် ” လို့ ဝန်ကြီးချုပ်က ပြောပါတယ်။