ကိုဗစ်လူနာကုသရေးမှာအသုံးပြုတဲ့ Favipiravir ဆေးကို အွန်လိုင်းမှာရောင်းနေတာတွေမှာ အတုတွေပါနိုင်လို့ မဝယ်သင့်ကြောင်းနဲ့ ဒီဆေးက ဆရာဝန်ညွှန်ကြားချက်နဲ့သာသုံးရတဲ့ဆေးဖြစ်တယ်လို့ ထိုင်းအစိုးရတာဝန်ရှိသူက ပြောလိုက်ပါတယ်။
ဒီဆေးကပိုးသတ်ဆေးတစ်မျိုးဖြစ်ပြီးတော့ ကနဦးကဂျပန်နိုင်ငံမှာ တုပ်ကွေးရောဂါအတွက်သုံးတဲ့ဆေးဖြစ်ပေမယ့် ကိုဗစ်လူနာတွေထဲမပြင်းထန်တဲ့သာမာန်ဖျားနာယုံလူနာတွေမှာ ပထမပတ်အတွင်းသုံးရင် ရောဂါခံစားရတဲ့ရက်ကိုတိုစေတယ်လို့ ကိုဗစ်ဆိုင်ရာကုသရေးသုံးသပ်ချက်တွေက ဆိုပါတယ်။
ဒါပေမယ့် ဒီဆေးကို ကိုဗစ်ကုသရေးမှာ သုံးဖို့ WHO အပါအဝင်ဘယ်အဖွဲ့အစည်းကမှ အတည်ပြုထုတ်ပြန်ထားတာမရှိသေးပါဘူး။
မြန်မာနိုင်ငံမှာလည်းအဲဒီဆေးကို ကိုဗစ်လူနာတွေအတွက်ဆရာဝန်အချို့သုံးနေတာရှိပြီးအွန်လိုင်းမှာရောင်းချနေတာတွေလည်းရှိပါတယ်။
လက်ရှိမြန်မာနိုင်ငံမှာ အသုံးများနေတဲ့ နောက်ဆေးတစ်မျိုး Remdesivir ဆေးကတော့ အိန္ဒိယဘက်မှာ ဆေးအတုဖမ်းမိတဲ့သတင်းတစ်ပုဒ်တွေ့ရပြီး ဖမ်းမိတဲ့ဆေးအတုက Remdesivir ထိုးဆေး အလုံးလေးရာကျော်ဖြစ်တယ်လို့သိရပါတယ်။
Remdesivir ဆေးက ဗိုင်းရပ်စ်ပြန့်ပွားနှုန်းကို ထိန်းချုပ်တဲ့ဆေးဖြစ်ပြီးတော့ ဆေးရုံ၊ ဆေးခန်း ဒါမှမဟုတ်ဆရာဝန်တစ်ဦးဦးအနီးကပ်ကုသမှုပေးနေတဲ့လူနာတွေမှာသာ အဆိုး၊ အပြစ် ချင့်ချိန်ပေးရတဲ့ဆေးဖြစ်ပါတယ်။
ကိုးကား- ဘန်ကောက်ပို့စ်/ အိန္ဒိယသတင်းဌာနများ