မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ရဲ့ဖခင်ကို မနေ့က သဂြိုဟ်လိုက်ပြီဖြစ်ပေမယ့် သားဖြစ်သူကတော့ အကျဥ်းထောင်ထဲမှာ ဆေးကုသမှုခံယူနေပြီး လိုက်ပါပို့ဆောင်ခွင့်မရခဲ့ပါဘူး။
ဒေါက်တာဇော်မြင့်မောင်ရဲ့ ဖခင်ဖြစ်သူဒေါက်တာချစ်မောင်ဟာ အသက် ၉၃ နှစ်အရွယ်ရှိပြီဖြစ်ပြီး ကိုဗစ်နောက်ဆက်တွဲရောဂါတွေနဲ့ ကွယ်လွန်သွားခဲ့တာပါ။
ဖခင်ကွယ်လွန်ချိန်မှာ အိုးဘိုထောင်ထဲရောက်နေတဲ့ ဒေါက်တာဇော်မြင့်မောင်ကတော့ ကင်ဆာရောဂါနဲ့ ကိုဗစ်နောက်ဆက်တွဲရောဂါတွေကို ထောင်တွင်းမှာပဲ ဆက်လက်ကုသမှုခံယူနေရတယ်လို့ သူ့ရှေ့နေတွေက ပြောပါတယ်။
“ကိုဗစ်ပျောက်ပေမဲ့ အရင်ကင်ဆာရော ကိုဗစ်နောက်ဆက်တွဲရော ကြည့်ရှုကုသပေးနေတယ်လို့သာသိရတာ။ ထောင်တွင်းဆေးရုံတော့မတက်ရဘူး” လို့ သူ့ ရှေ့နေတစ်ဦးကပြောပါတယ်။
စစ်ကောင်စီကတော့ ဝန်ကြီးချုပ်ရဲ့ကျန်းမာရေးအခြေအနေကတော့ အကောင်းကြီးမဟုတ်ဘူးလို့ ပြီးခဲ့တဲ့ရက်က လုပ်တဲ့သတင်းစာရှင်းလင်းပွဲမှာ ပြောထားပါတယ်။
ဒေါက်တာဇော်မြင့်မောင်ဟာ ကင်ဆာရောဂါကို ထောင်တွင်းမှာပဲ ကုသမှုခံယူနေစဥ် ကိုဗစ်ကူးစက်ခံရလို့ မန္တလေးပြည်သူ့ဆေးရုံကြီးမှာ တက်ရောက်ဆေးကုသမှုခံယူခဲ့ရပါသေးတယ်။
မန္တလေးပြည်သူ့ဆေးရုံကြီးမှာ သြဂုတ်လ ၆ ရက်ကနေ ၂၇ ရက်အထိ ဆေးကုသမှုခံယူခဲ့ပြီးနောက် အိုးဘိုအကျဥ်းထောင်ကိုပြန်ရွှေ့ခဲ့တယ်လို့ သိရပါတယ်။
ဒေါက်တာဇော်မြင့်မောင်ကို ပုဒ်မ ၅၀၅( ခ)၊ သဘာဝဘေးဥပဒေ ပုဒ်မ (၂၅)၊ (၃၀)တို့နဲ့ဖမ်းဆီးခဲ့တာပါ။
အဲဒီအမှုတွေကို စွဲချက်တင်ပြီးနောက် ပြန်ခေါ်သက်သေစစ်ဆေးမယ့်အဆင့်ကိုရောက်နေပြီဖြစ်တယ်လို့သိရပါတယ်။
ကိုဗစ်တတိယလှိုင်း စတင်ဖြစ်ပွားလာလို့ ရုံးချိန်းစစ်ဆေးမှုကိုရပ်ထားဆဲဖြစ်လို့ ရှေ့နေတွေနဲ့လည်းအဆက်အသွယ်တွေပြတ်နေတာဖြစ်ပါတယ်။