လုပ်ကြံမှုက​နေ အသက်ဘေး လွတ်မြောက်ခဲ့တဲ့ အီရတ် ဝန်ကြီးချုပ်

အီရတ် ဝန်ကြီးချုပ် မူစတာဖာ အယ်လ် ခက်ဒ်ဟီမီဟာ လုပ်ကြံမှု တစ်ခုနဲ့ ကြုံခဲ့ပေမယ့် အသက်ဘေးက လွတ်မြောက်ခဲ့ပါတယ်။

ဘဂ္ဂဒက် မြို့တော်က အစိမ်းရောင်ဇုန် သတ်မှတ်နယ်မြေမှာ ရှိနေတဲ့ ဝန်ကြီးချုပ် နေအိမ်ကို မသမာသူတွေက ဒရုန်းတစ်စီးနဲ့ တိုက်ခိုက်ခဲ့တာလို့ ရဲတွေက ပြောပါတယ်။ ဒရုန်းမှာ ဖောက်ခွဲရေး ပစ္စည်းတွေ အများအပြား ချိတ်ဆွဲ သယ်ယူလာပြီး ဝန်ကြီးချုပ် နေအိမ်ကို တိုက်ခိုက်ခဲ့တာပါ။

အစောပိုင်း သတင်းတွေက နိုဝင်ဘာ ၆ ရက် တိုက်ခိုက်မှုကြောင့် ဝန်ကြီးချုပ် ဒဏ်ရာရပြီး ဆေးရုံ ရောက်နေတယ်လို့ ဖော်ပြခဲ့ပါတယ်။ ဒါပေမဲ့ နောက်ပိုင်းမှာတော့ အယ်လ် ခက်ဒ်ဟီမီ ကိုယ်တိုင်က သူဟာ အထိအခိုက် မရှိဘဲ လွတ်မြောက်ခဲ့ကြောင်း အတည်ပြုသွားပါတယ်။

အစိမ်းရောင်ဇုန်မှာ အစိုးရ ဌာန အဆောက်အအုံတွေနဲ့ နိုင်ငံခြား သံရုံးတွေ အများအပြား ရှိနေပါတယ်။ ဒီတိုက်ခိုက်မှုကို ဘယ်အဖွဲ့အစည်းကမှ တာဝန်ခံ ကြေညာတာမျိုး မရှိသေးပါဘူး။ အမေရိကန် အစိုးရကတော့ အခုဖြစ်စဉ်ကို အပြင်းအထန် ရှုတ်ချပြီး နောက်ဆက်တွဲ စုံစမ်း ဖော်ထုတ်မှုတွေမှာ အကူအညီပေးဖို့ အီရတ် အစိုးရဆီ ကမ်းလှမ်းထားပါတယ်။

Public Service Announcement

ထောက်လှမ်းရေးဌာန အကြီးအကဲဟောင်း တစ်ဦးဖြစ်တဲ့ အယ်လ် ခက်ဒ်ဟီမီဟာ ပြီးခဲ့တဲ့နှစ်၊ မေလကမှ အီရတ် ဝန်ကြီးချုပ်သစ် ဖြစ်လာတာပါ။ မကြာသေးခင် သီတင်းပတ်တွေအတွင်း အီရန်ရဲ့ မဟာမိတ် နိုင်ငံရေး အင်အားစု တချို့က အစိမ်းရောင်ဇုန် အနားတဝိုက်မှာ ဆန္ဒပြတာမျိုးတွေ ရှိခဲ့ပေမယ့် ဝန်ကြီးချုပ်ကို တိုက်ခိုက်တာဟာ ဒီဆန္ဒပြမှုတွေနဲ့ ဆက်စပ်သလား ဆိုတာကိုတော့ အတည်မပြုနိုင်သေးပါဘူး။

ပြီးခဲ့တဲ့လက အီရတ်မှာ အထွေထွေ ရွေးကောက်ပွဲ ကျင်းပခဲ့ပြီး မဲမသမာမှုတွေ ရှိခဲ့တယ်ဆိုတဲ့ စွပ်စွဲချက်နဲ့ ဆန္ဒပြမှုတွေလည်း ပေါ်ပေါက်ခဲ့ပါတယ်။ အဲဒီ ဆန္ဒပြမှုတွေကနေ ပဋိပက္ခတွေ ပေါ်ပေါက်ခဲ့တာကြောင့်လည်း လူပေါင်း ၁၀၀ ကျော် ထိခိုက် ဒဏ်ရာ ရခဲ့ကြောင်း သိရပါတယ်။