တရုတ်ဟာ ဒေသတွင်းက အိမ်နီးချင်း နိုင်ငံငယ်တွေကို အနိုင်ကျင့် ဆက်ဆံတာမျိုး မရှိစေရဘူးလို့ တရုတ်-အာဆီယံ ထိပ်သီး ညီလာခံမှာ ရှီက ဆိုပါတယ်။ လက်တွေ့မှာတော့ တောင်တရုတ်ပင်လယ် ရပ်ဝန်းမှာ တရုတ်ရဲ့ ကြီးစိုးလိုမှုတွေကြောင့် အာဆီယံ အဖွဲ့ဝင်တွေ အပါအဝင် နိုင်ငံတချို့နဲ့ ရေပိုင်နက် အငြင်းပွားမှုတွေ ရှိနေပါတယ်။
တရုတ် အစိုးရက တောင်တရုတ်ပင်လယ် ရေပြင်တစ်ခုလုံးကို ပိုင်နက်အဖြစ် သတ်မှတ်ထားတဲ့ ကိစ္စဟာ အမေရိကန်နဲ့ ဂျပန်တို့ အတွက်ပါ အာရုံစိုက်ရတဲ့ ပြဿနာတစ်ခု ဖြစ်လာပါတယ်။ ရှီကတော့ တရုတ်ဟာ နိုင်ငံငယ်တွေအပေါ် အနိုင်အထက် ပြုကျင့်မှာ မဟုတ်ကြောင်းနဲ့ ဘေးပယောဂ စွက်ဖက်မှုတွေကို အာဆီယံနဲ့အတူ လက်တွဲ ဖယ်ရှားသွားလိုကြောင်း ပြောပါတယ်။
တရုတ်ဟာ အတိတ်မှာရော၊ ပစ္စုပ္ပန်မှာရော၊ အနာဂတ်မှာပါ အာဆီယံအတွက် အိမ်နီးချင်းကောင်း၊ လက်တွဲဖော်ကောင်းအဖြစ် ရပ်တည်နေမယ်လို့ ရှီက ဆိုပါတယ်။ မကြာသေးခင်က တောင်တရုတ် ပင်လယ်မှာ ဖိလစ်ပိုင်နဲ့ တရုတ် ရေယာဉ်တွေ ပဋိပက္ခ ဖြစ်ခဲ့ပြီး တရုတ် ကမ်းခြေစောင့်တပ် ရေယာဉ် သုံးစီးက ဖိလစ်ပိုင်ရဲ့ ထောက်ပံ့ ပို့ဆောင်ရေး လှေတွေကို မီးသတ်ပိုက်နဲ့ လှမ်းထိုးခဲ့ပါတယ်။ ဒီကိစ္စနဲ့ ပတ်သက်လို့ ဖိလစ်ပိုင်က တရုတ်ကို အတိအလင်း ကန့်ကွက်ကြောင်း အသိပေးခဲ့ပါတယ်။
ပြီးခဲ့တဲ့ လပိုင်းက ကျင်းပခဲ့တဲ့ အာဆီယံ ထိပ်သီး ညီလာခံလိုပဲ အခု ညီလာခံမှာလည်း မြန်မာရဲ့ အာဏာသိမ်း စစ်ကောင်စီ အကြီးအကဲ မင်းအောင်လှိုင်ကို မဖိတ်ကြားခဲ့ပါဘူး။ ရှီက မင်းအောင်လှိုင်ကို အစည်းအဝေး တက်ရောက်ဖို့ အဆိုပြုခဲ့ပေမယ့် အာဆီယံ အဖွဲ့ဝင် နိုင်ငံခေါင်းဆောင် တချို့က ကန့်ကွက်ခဲ့လို့ အထမမြောက်ခဲ့ကြောင်း သံတမန် အသိုက်အဝန်းနဲ့ နီးစပ်သူတွေက ပြောကြားသွားပါတယ်။
Public Service Announcement
