စစ်တပ်ရဲ့ရက်စက်ကြမ်းကြုတ်မှုများနဲ့ ပြည်သူတွေရဲ့ ခုခံတွန်းလှန်မှု ခေါင်းစဉ်နဲ့ ကရင်လူ့အခွင့်အရေးအဖွဲ့(KHRG)က အစီရင်ခံစာတစ်စောင်ကို ဒီကနေ့မှာ ထုတ်ပြန်လိုက်ပါတယ်။
ဒီအစီရင်ခံစာမှာ စစ်ကောင်စီက တိုင်းရင်းသားလက်နက်ကိုင်အဖွဲ့တွေကို ထိုးစစ်ဆင်ရာမှာ အရပ်သားတွေကိုပါ အဓိကပစ်မှတ်တစ်ခုအဖြစ် တိုက်ခိုက်လာတဲ့အတွက် ကျေးလက်ဒေသရှိ တိုင်းရင်းသားဒေသခံတွေအတွက် မလုံခြုံမှုတွေ ပိုမိုခံစားလာခဲ့ရတယ်လို့ ဖော်ပြထားပါတယ်။
ဒါ့အပြင် စစ်ကောင်စီရဲ့ ရက်စက်တဲ့အကြမ်းဖက်မှုတွေ ပိုမိုပြင်းထန်လာတာကြောင့် မြန်မာပြည်အရှေ့တောင်ပိုင်းမှာ စစ်ဘေးရှောင်တွေ ပိုမိုများပြားလာခဲ့ပြီး စစ်အာဏာသိမ်းပြီးကတည်းကနေ ဇွန်လ ၂၃ ရက်နေ့အထိ ကရင်ပြည်နယ်မှာရှိတဲ့ ဒေသခံပြည်သူ ၅၀၀၀၀ အပါအဝင် မြန်မာပြည်အရှေ့တောင်ပိုင်းမှာ ဒေသခံ ၁၇၇၀၀၀ နီးပါး နေရပ်စွန့်ခွာ ထွက်ပြေးနေခဲ့ကြရပါတယ်။
ဒီကနေ့ ကရင်လူ့အခွင့်အရေးအဖွဲ့(KHRG)က ထုတ်ပြန်လိုက်တဲ့ အစီရင်ခံစာနဲ့ပတ်သက်ပြီး KHRG အဖွဲ့ပြောရေးဆိုခွင့်ရှိသူတစ်ဦးဖြစ်တဲ့ စောလင်းထက်ကို ဆက်သွယ်မေးမြန်းထားပါတယ်။