အမေရိကန်ရဲ့ နျူကလီးယား ရေငုပ်သင်္ဘော တစ်စီးဟာ တောင်တရုတ် ပင်လယ်ထဲမှာ ခုတ်မောင်းနေတုန်း အမျိုးအမည်မသိ အရာဝတ္ထု တစ်ခုနဲ့ ဝင်တိုက်မိခဲ့ကြောင်း သိရပါတယ်။
USS Connecticutဟာ ပြီးခဲ့တဲ့ သီတင်းပတ်ကုန်က တောင်တရုတ်ပင်လယ် ရေပြင်အောက်မှာ ခုတ်မောင်းနေတုန်း အခုဖြစ်ရပ်နဲ့ ကြုံခဲ့ပြီး ရေတပ်သား ၁၅ ဦး ဒဏ်ရာ ရခဲ့တယ်လို့ ရေတပ် တာဝန်ရှိသူတွေက ပြောပါတယ်။ ရေငုပ်သင်္ဘောက ဘာနဲ့ ဝင်တိုက်ခဲ့သလဲ ဆိုတာကိုတော့ ရှင်းရှင်းလင်းလင်း မသိသေးဘူးလို့ ဆိုပါတယ်။
တရုတ်နဲ့ အမေရိကန်တို့ကြား တင်းမာမှုတွေ မြင့်တက်နေတဲ့ အချိန်မှာ အခုလို ကိစ္စမျိုး ကြုံလာတာပါ။ တရုတ်က ထိုင်ဝမ်ကျွန်း တဝိုက်ကို စစ်လေယာဉ်တွေ အလုံးအရင်း စေလွှတ်ပြီး အင်အားပြနေခြင်းကလည်း အခြေအနေတွေကို ပိုပြီး ဆိုးရွားလာစေပါတယ်။
ပြီးတော့ တရုတ် အစိုးရက တောင်တရုတ် ပင်လယ်ပြင် တစ်ခုလုံး နီးပါးကို နိုင်ငံပိုင်နက်အဖြစ် သတ်မှတ်ထားတာကြောင့် ဒေသတွင်း နိုင်ငံတွေနဲ့လည်း အငြင်းပွားမှုတွေ ဖြစ်ပေါ်နေပါတယ်။ တောင်တရုတ် ပင်လယ်ထဲမှာ တရုတ် ရေတပ်နဲ့ လေတပ် လှုပ်ရှားမှုတွေကလည်း ပြီးခဲ့တဲ့ နှစ်ပိုင်းတွေအတွင်း သိသိသာသာ မြင့်တက်လာပါတယ်။
လတ်တလောမှာတော့ ကိုယ်ထည် ထိခိုက်မိထားတဲ့ ရေငုပ်သင်္ဘောဟာ အမေရိကန် တပ်တွေ ဖြန့်ကျက်ထားရာ ဂူအမ်ကျွန်းဆီ ဦးတည် ခုတ်မောင်းနေကြောင်း ရေတပ် အရာရှိတွေက ပြောပါတယ်။ အမျိုးအမည်မသိ အရာဝတ္ထု တစ်ခုနဲ့ တိုက်မိခဲ့ပေမယ့် USS Connecticutရဲ့ နျူကလီးယား ဓာတ်ပေါင်းဖိုနဲ့ ဒလက်တွေက ထိခိုက်မှု မရှိခဲ့ဘဲ စွမ်းဆောင်ရည် ပုံမှန်အတိုင်း မောင်းနှင်နေနိုင်ဆဲလို့ ရေတပ်က ထုတ်ပြန်ပါတယ်။
တောင်တရုတ်ပင်လယ် နယ်နိမိတ် ပိုင်ဆိုင်ရေးနဲ့ ပတ်သက်လို့ တရုတ်ဟာ ဖိလစ်ပိုင်၊ ဘရူနိုင်း၊ မလေးရှား၊ ထိုင်ဝမ်၊ ဗီယက်နမ်တို့လို နိုင်ငံတွေနဲ့ အငြင်းပွားမှုတွေ ဖြစ်ပေါ်နေပြီး အမေရိကန်က အဲဒီ နိုင်ငံတွေဖက်က ထောက်ခံ ရပ်တည်ကြောင်း အတိအလင်း ပြောကြားထားပါတယ်။