ငြိမ်းချမ်းရေး အစီအမံ အကောင်အထည်ဖော်ရေးအတွက် အိန္ဒိယက ပါဝင် ကူညီပေးဖို့ မျှော်လင့်ကြောင်း ယူကရိန်း သမ္မတ ဗိုလိုဒီမာ ဇီလန်စကီးက အိန္ဒိယ ဝန်ကြီးချုပ် နာယန်ဒရာ မိုဒီကို ပြောကြားခဲ့ပါတယ်။
နိုင်ငံခေါင်းဆောင် နှစ်ဦးဟာ ဒီဇင်ဘာ ၂၆ ရက်က တယ်လီဖုန်းနဲ့ ဆက်သွယ်ပြီး ဆွေးနွေးခဲ့ကြတာ ဖြစ်ပါတယ်။ အိန္ဒိယဟာ ရုရှား-ယူကရိန်း စစ်ပွဲမှာ ကြားနေတဲ့ သဘောမျိုး ရပ်တည်နေပြီး တစ်ဖက်မှာတော့ ရုရှားနဲ့ ကုန်သွယ်မှုတွေကို မြှင့်တင်လာနေခဲ့ပါတယ်။ နောက်ပြီး ရုရှားဆီက ရေနံ ဝယ်ယူမှု အများဆုံး နိုင်ငံအဖြစ်လည်း အိန္ဒိယက ရပ်တည်နေပါတယ်။
မိုဒီဟာ ယူကရိန်းနဲ့ရော၊ အနောက်နိုင်ငံတွေနဲ့ပါ မိတ်မပျက်အောင် ဆက်ဆံရေးကို ထိန်းညှိထားပေမယ့် စစ်ပွဲနဲ့ ပတ်သက်လို့ ရုရှားအပေါ် အရေးယူ ပိတ်ဆို့မှုတွေကိုတော့ လိုက်လံ ကျင့်သုံးမှု မရှိခဲ့ပါဘူး။
ဇီလန်စကီးက သူ့အနေနဲ့ ငြိမ်းချမ်းရေး အစီအမံ တစ်ခုကို အတည်ပြု ကြေညာခဲ့ပြီး လက်တွေ့ အကောင်အထည် ဖော်ဖို့အတွက် အိန္ဒိယကို ယုံကြည် ကိုးစားချင်တယ်လို့ Twitterမှာ ရေးသားခဲ့ပါတယ်။
Public Service Announcement
ဇီလန်စကီးနဲ့ မိုဒီတို့ ဖုန်းပြောပြီးတဲ့နောက် အိန္ဒိယ အစိုးရက သီးခြား ထုတ်ပြန်ရာမှာ မိုဒီက စစ်ပွဲမှာ နှစ်ဖက်စလုံးက ရန်လိုတိုက်ခိုက်မှုတွေ အမြန်ဆုံး ရပ်တန့်ဖို့ သူ့ရဲ့ သဘောထားကို ထပ်မံ အသိပေး တောင်းဆိုခဲ့ကြောင်း ဖော်ပြထားပါတယ်။ မိုဒီက ရုရှား-ယူကရိန်း ပဋိပက္ခကို သံတမန်ရေး နည်းလမ်းတွေနဲ့ ဖြေရှင်းဖို့လည်း တိုက်တွန်းခဲ့တယ်လို့ ဆိုပါတယ်။
ဇီလန်စကီးဟာ အင်ဒိုနီးရှားနိုင်ငံ၊ ဘာလီကျွန်းမှာ နိုဝင်ဘာလတုန်းက ကျင်းပခဲ့တဲ့ G20 ထိပ်သီး ညီလာခံမှာ စစ်ပွဲ ရပ်ဆိုင်းရေးအတွက် အဆိုပြုချက် ၁၀ ခုပါတဲ့ ငြိမ်းချမ်းရေး အစီအမံ တစ်ရပ်ကို တင်ပြခဲ့ပါတယ်။ အိန္ဒိယဟာ လာမယ့်နှစ်မှာ G20ရဲ့ အလှည့်ကျ ဥက္ကဋ္ဌ နေရာကို တာဝန်ယူမှာ ဖြစ်ပါတယ်။
ဝန်ကြီးချုပ် မိုဒီက ယူကရိန်း-ရုရှား ပဋိပက္ခကြောင့် ဖွံ့ဖြိုးဆဲ နိုင်ငံတွေမှာ စားနပ်ရိက္ခာနဲ့ အရေးပေါ် လုံခြုံရေးလို ကဏ္ဍတွေမှာ အကျပ်အတည်းတွေ ဖြစ်ပေါ်လာတာကို စိုးရိမ်ကြောင်း ဇီလန်စကီးကို ပြောဆိုခဲ့တယ်လို့လည်း အိန္ဒိယ အစိုးရရဲ့ ထုတ်ပြန်ချက်မှာ ဖော်ပြထားပါတယ်။
အိန္ဒိယဟာ စစ်ပွဲနဲ့ ပတ်သက်လို့ ရုရှားကို တရားဝင် ရှုတ်ချတာမျိုး လုံးဝ မရှိပေမယ့် ဒီစစ်ပွဲကို လုံးဝ မလိုလားကြောင်းတော့ အခိုင်အမာ ရပ်တည်ပြခဲ့ပါတယ်။ စက်တင်ဘာလတုန်းကလည်း မိုဒီဟာ ရုရှား သမ္မတ ဗလာဒီမာ ပူတင်နဲ့ တွေ့ဆုံချိန်မှာ ငြိမ်းချမ်းရေး လမ်းကြောင်းပေါ် ပြန်ဦးတည်ဖို့ ဖိအားပေး တောင်းဆိုခဲ့ပါတယ်။
ပြီးခဲ့တဲ့ သီတင်းပတ်ကုန်မှာ ပူတင်က သူဟာ ယူကရိန်း အရေးနဲ့ ပတ်သက်ရင် လက်ခံနိုင်လောက်တဲ့ ကမ်းလှမ်းမှုတွေအတွက် ဆွေးနွေးဖို့ အသင့်ရှိနေကြောင်း ထုတ်ပြောခဲ့ပါတယ်။ ဒါပေမဲ့ ဇီလန်စကီးရဲ့ ကိုယ်ရေး အရာရှိ တစ်ဦးကတော့ ပူတင်ဟာ အမှန်တကယ် စစ်ပြေငြိမ်းလိုတာ မဟုတ်ဘဲ အရပ်သားတွေကို တိုက်ခိုက်နေတဲ့ သူ့ရဲ့ လုပ်ရပ်တွေကို ဖုံးကွယ်ဖို့ ကြိုးစားနေရုံသာ ဖြစ်ကြောင်း ဝေဖန်ထားပါတယ်။
