လျှို့ဝှက် အချက်အလက်တွေ ပေါက်ကြားစေမှုနဲ့ အမေရိကန် လေတပ်သားကို တရားရုံးတင် စစ်ဆေး

စစ်ရေးနဲ့ ထောက်လှမ်းရေးဆိုင်ရာ ထိပ်တန်း လျှို့ဝှက် အချက်အလက်တွေ ပေါက်ကြားစေမှုအတွက် အမေရိကန် လေတပ်သား တစ်ဦးကို တရားရုံးတင် စစ်ဆေးမှု စတင်ခဲ့ပါတယ်။

ဧပြီ ၁၄ ရက်မှာ အသက် ၂၁ နှစ်အရွယ် ဂျက်တိုင်စီရာကို ဘော်စတွန်မြို့မှာရှိတဲ့ တရားရုံး တစ်ခုမှာ စတင် ရုံးထုတ်ခဲ့ပါတယ်။ သူဟာ အကျဉ်းသား ဝတ်စုံကို ဝတ်ဆင်လာတယ်လို့ မျက်မြင်တွေက ပြောပါတယ်။ တိုင်စီရာဟာ ကာကွယ်ရေးဆိုင်ရာ အချက်အလက်တွေကို တရားမဝင် ဖော်ထုတ်မှု၊ လျှို့ဝှက်အဆင့် စာရွက်စာတမ်းတွေကို ပေါက်ကြားစေမှု စွပ်စဲချက် နှစ်ခုနဲ့ ရင်ဆိုင်နေရပါတယ်။

တကယ်လို့ စွဲချက် နှစ်ခုလုံးအတွက် ပြစ်မှုထင်ရှားခဲ့မယ် ဆိုရင်တော့ တိုင်စီရာဟာ ထောင်ဒဏ် ၁၅ နှစ်ထိ ချမှတ်ခံရမှာ ဖြစ်ပါတယ်။ ပြီးခဲ့တဲ့ လကစလို့ အမေရိကန်ရဲ့ စစ်ရေးနဲ့ ထောက်လှမ်းရေးဆိုင်ရာ လျှို့ဝှက် အချက်အလက် တော်တော်များများဟာ အွန်လိုင်းပေါ်ကို ပျံ့နှံ့လာခဲ့ပါတယ်။ အဲဒီထဲမှာ အမေရိကန်ရဲ့ ပြိုင်ဘက်နဲ့ ရန်သူ နိုင်ငံတွေဆီက ထောက်လှမ်းရေး ကိစ္စတွေအပြင် မဟာမိတ် နိုင်ငံတွေနဲ့ ပတ်သက်တဲ့ အချက်အလက်တွေကိုပါ ဖော်ပြထားတာ တွေ့ရပါတယ်။

အမေရိကန် စစ်တပ်အတွက်တော့ အခုပေါက်ကြားမှုဟာ အကြီးအကျယ် အရှက်ကွဲစရာ ဖြစ်ခဲ့ပါတယ်။

Public Service Announcement

အာဏာပိုင်တွေက နောက်ကြောင်းပြန် စုံစမ်းမှုတွေ ပြုလုပ်ခဲ့တဲ့နောက် ဒီအချက်အလက်တွေဟာ တိုင်စီရာက Administrator အနေနဲ့ တာဝန်ယူထားတဲ့ Discord Chat Roomကနေ စတင် ပေါက်ကြားလာကြောင်း စစ်ဆေး တွေ့ရှိခဲ့ပါတယ်။ အဲဒီ Chat Roomမှာ အဖွဲ့ဝင်တွေဟာ စစ်ရေးနဲ့ ပထဝီဝင် နိုင်ငံရေး ကိစ္စတွေကို ဆွေးနွေးလေ့ ရှိပါတယ်။ ပြီးတော့ တိုင်စီရာဟာ ထိပ်တန်း လျှို့ဝှက်အဆင့် အချက်အလက် တချို့ကို ဒီဇင်ဘာ လကတည်းက Chat Roomမှာ တင်ပေးနေခဲ့တယ်လို့ ယုံကြည်ရပါတယ်။

တိုင်စီရာကို FBI ထောက်လှမ်းရေး အဖွဲ့ရဲ့ လက်နက်ကိုင် အေးဂျင့်တွေက မက်ဆာချူးဆက် နေအိမ်မှာ ဧပြီ ၁၃ ရက်က ဝင်ရောက် ဖမ်းဆီးခဲ့တာပါ။ သူဟာ အာမခံ မရဘဲ အချုပ်နှောင် ခံထားရဆဲ ဖြစ်ပါတယ်။

တိုင်စီရာဟာ မက်ဆာချူးဆက် အမျိုးသား အစောင့်တပ် အခြေစိုက်ရာ အိုတစ် လေတပ်စခန်းရဲ့ ထောက်လှမ်းရေး ဌာနခွဲမှာ အိုင်တီ ပညာရှင်အဖြစ် တာဝန် ထမ်းဆောင်ခဲ့သူ ဖြစ်ပါတယ်။ သူဟာ အစိုးရရဲ့ ကွန်ပျူတာတွေကို အသုံးပြုပြီး အထူးလျှို့ဝှက်အဆင့် ထောက်လှမ်းရေး အစီရင်ခံစာတွေကို ရယူ စုဆောင်းပြီး ပေါက်ကြားစေခဲ့ကြောင်း အစိုးရ ရှေ့နေတွေက စွပ်စွဲ ပြောဆိုထားပါတယ်။