အနောက်ဖက် ကမ်းခြေဒေသက ဒုက္ခသည် စခန်းမှာ အစ္စရေးစစ်တပ်နဲ့ ပါလက်စတိုင်း စစ်သွေးကြွတွေ တိုက်ပွဲပြင်းထန်နေ

အနောက်ဖက် ကမ်းခြေဒေသမှာရှိတဲ့ ဒုက္ခသည် စခန်းတစ်ခုမှာ အစ္စရေး စစ်တပ်နဲ့ ပါလက်စတိုင်း စစ်သွေးကြွတွေကြား တိုက်ပွဲတွေ ပြင်းပြင်းထန်ထန် ဖြစ်ပွားနေပါတယ်။

အစ္စရေးက ထိန်းချုပ် ပိတ်ဆို့ထားတဲ့ အနောက်ဖက် ကမ်းခြေဒေသထဲက ဂျီနင် ဒုက္ခသည် စခန်းကို ပါလက်စတိုင်း စစ်သွေးကြွ အဖွဲ့တချို့က ပုန်းခိုရာ နေရာအဖြစ် အသုံးချပြီး အဖျက်လုပ်ငန်းတွေ ဆောင်ရွက်နေတယ်လို့ အစ္စရေးက စွပ်စွဲပါတယ်။ ဒီလုပ်ရပ်ကို အစ္စရေး အနေနဲ့ ဘယ်လိုမှ လက်သင့်ခံနိုင်စွမ်း မရှိတာကြောင့် လိုအပ်တဲ့ တုံ့ပြန်မှုမျိုး လုပ်ဆောင်တာဖြစ်ကြောင်း ကြေညာပြီး ပြီးခဲ့တဲ့ သီတင်းပတ်ကုန်က ထိုးစစ်စတင်လာခဲ့တာပါ။

ဇူလိုင် ၂ ရက် ညပိုင်းလောက်မှာ ဒုက္ခသည် စခန်းထဲက စစ်သွေးကြွတွေရဲ့ စစ်ဘက် အခြေစိုက် စခန်းတွေကို အစ္စရေးက လေကြောင်းကနေ တိုက်ခိုက်ခဲ့ပြီး ချက်ချင်းဆိုသလို အစ္စရေး စစ်သည်တွေဟာ သံချပ်ကာ ယာဉ်တွေနဲ့ ချီတက်လာကြပါတယ်။ အဲဒီစခန်းမှာ ဟားမားစ်၊ အစ္စလာမ်မစ် ဂျီဟတ်စတဲ့ ပါလက်စတိုင်း စစ်သွေးကြွ အဖွဲ့ဝင်တွေ ခိုအောင်းနေပြီး ကျူးကျော်လာတဲ့ အစ္စရေး တပ်တွေကို အစွမ်းကုန် တုံ့ပြန် ချေမှုန်းသွားမယ်လို့ ကြွေးကြော်ထားပါတယ်။

တိုက်ပွဲတွေ စတင်ပြီး ၃၆ နာရီအတွင်း ဂျီနင် ဒုက္ခသည် စခန်းမှာ ပါလက်စတိုင်း ၉ ဦးထက်မနည်း သေဆုံးပြီး ၁၀၀ ကျော် ဒဏ်ရာရခဲ့တယ်လို့ ဒေသခံ ကျန်းမာရေးဌာန တာဝန်ရှိသူတွေက ပြောပါတယ်။

Public Service Announcement

အစ္စရေးက ဂျီနင်ဟာ အကြမ်းဖက်သမားတွေရဲ့ ခိုအောင်းရာ နေရာ ဖြစ်လာကြောင်း စွပ်စွဲပြီး ပါလက်စတိုင်းကတော့ အစ္စရေးဟာ ဒုက္ခသည်တွေ ရှိနေတဲ့ နေရာကို တိုက်ခိုက်ပြီး စစ်ရာဇဝတ်မှု ပြောင်ပြောင်တင်းတင်း ကျူးလွန်နေတာလို့ တုံ့ပြန်ထားပါတယ်။

အသက်အရွယ် ကြီးရင့်ပြီး ရှေးရိုးစွဲ အမြင်ရှိတဲ့ ပါလက်စတိုင်း အာဏာပိုင်တွေကို စိတ်ပျက်လာတဲ့ မျိုးဆက်သစ် စစ်သွေးကြွတွေအတွက် ဂျီနင်ဟာ အင်အားစုစည်းရာ အခြေစိုက် နယ်မြေတစ်ခုလို ဖြစ်လာပါတယ်။ ဂျီနင်မှာရှိတဲ့ ပါလက်စတိုင်း တချို့ဟာ အစ္စရေး နိုင်ငံသားတွေကို ပစ်မှတ်ထားတဲ့ တိုက်ခိုက်မှုတွေ မကြာခဏ လုပ်ဆောင်ခဲ့တာကြောင့် မနှစ်ကတည်းက အစ္စရေး လုံခြုံရေး တပ်ဖွဲ့တွေက ဂျီနင်မှာ အသေးစား စီးနင်းမှုတွေ လုပ်ဆောင်ခဲ့ပါတယ်။ ဂျီနင်မှာ ပါလက်စတိုင်း တိုက်ခိုက်ရေးသမားတွေ အများအပြား ခိုအောင်းနေတယ်လို့ အစ္စရေးက ဆိုပါတယ်။

အနောက်ဖက် ကမ်းခြေဒေသ မြောက်ပိုင်းက ဂျီနင်မြို့မှာ တည်ရှိတဲ့ ဒုက္ခသည် စခန်းဟာ ၁၉၄၈ ခုနှစ် ပါလက်စတိုင်း စစ်ပွဲအပြီး နေရပ်စွန့်ခွာလာရတဲ့ ဒုက္ခသည်တွေအတွက် ရည်ရွယ်ပြီး ၁၉၅၃ ခုနှစ်မှာ စတင် ဖွင့်လှစ်ထားခဲ့တာ ဖြစ်ပါတယ်။ စခန်းထဲမှာ ခိုလှုံနေသူ ဦးရေဟာ ၁၃၀၀၀ နဲ့ ၂၂၀၀၀ ကြားလောက်ထိ များပြားမယ်လို့လည်း ခန့်မှန်းရပါတယ်။