ဘက်မလိုက်ဝါဒကို ရေရှည် လက်ကိုင်ပြုထားတဲ့ ဆွစ်ဇာလန်နဲ့ ဩစတြီးယားတို့ဟာ အနောက်ဥရောပ နိုင်ငံတွေရဲ့ လေကြောင်း ကာကွယ်ရေး မဟာဗျူဟာ အစီအမံသစ်ဖြစ်တဲ့ Sky Shieldမှာ ပါဝင်ဖို့ ဆုံးဖြတ်ခဲ့ကြပါတယ်။
ရုရှားက အိမ်နီးချင်း ယူကရိန်းကို ကျူးကျော်ခဲ့တဲ့ စစ်ပွဲကြောင့် ဥရောပ နိုင်ငံတွေဟာ လုံခြုံရေး ကဏ္ဍနဲ့ ပတ်သက်လို့ စိုးရိမ်လာပြီး မဟာဗျူဟာမြောက် စုပေါင်း လုပ်ဆောင်မှုတွေကို တုံ့ပြန် အကောင်အထည် ဖော်လာပါတယ်။ Sky Shieldကိုတော့ ဂျာမနီ အစိုးရက ဦးစီး အကောင်အထည်ဖော်ပြီး ဥရောပ၊ အမေရိကန်နဲ့ အစ္စရေးလုပ် လေကြောင်း ကာကွယ်ရေး စနစ်တွေကို ချိတ်ဆက် အသုံးပြုဖို့ လျာထားပါတယ်။
Sky Shieldရဲ့ စိတ်ကူးစိတ်သန်းအရ စီမံကိန်းမှာ ပါဝင်မယ့် အဖွဲ့ဝင် နိုင်ငံတွေဟာ လိုအပ်မယ့် လေကြောင်း ကာကွယ်ရေး စနစ်တွေကို အတူတကွ ငွေကြေးစိုက်ထုတ် ဝယ်ယူပြီး ဖြန့်ကျက်စေမှာ ဖြစ်ပါတယ်။ စစ်မှုရေးရာ ကိစ္စတွေနဲ့ ခပ်ကင်းကင်း ရှိခဲ့ဖူးတဲ့ ကြားနေနိုင်ငံ ဆွစ်ဇာလန် အတွက်တော့ Sky Shieldမှာ ပါဝင်လာခြင်းဟာ သမိုင်းဝင် ခြေလှမ်းတစ်ခု ဖြစ်တယ်လို့ လေ့လာ စောင့်ကြည့်သူတွေက ပြောပါတယ်။ တစ်ဖက်မှာလည်း ပြည်သူတချို့က နိုင်ငံရဲ့ ကာလရှည်ကြာ ဆုပ်ကိုင်လာတဲ့ ဘက်မလိုက်ဝါဒအပေါ် ထိခိုက် သက်ရောက်မှုတွေ ရှိလာမှာ စိုးရိမ်နေပါတယ်။
ဆွစ်ဇာလန် အစိုးရဟာ လွန်ခဲ့တဲ့ နှစ်ပိုင်းတွေမှာဆိုရင် ဥရောပ လေကြောင်းကာကွယ်ရေး ကွန်ရက်ထဲ ဝင်ရောက်ပူးပေါင်းဖို့ လုံးဝ စိတ်ဝင်စားခဲ့မှာ မဟုတ်ပေမယ့် ရုရှား-ယူကရိန်း စစ်ပွဲကြောင့် အတွေးအမြင် ပြောင်းလဲလာတာ ဖြစ်ပါတယ်။
Public Service Announcement
Sky Shieldမှာ တာတို၊ တာလတ်နဲ့ တာဝေးပစ် လေကြောင်းကာကွယ်ရေး စနစ်တွေ အဆင့်ဆင့် ချိတ်ဆက်ထားမှာဖြစ်ပြီး ၃၅ ကီလိုမီတာအောက် တာတိုပစ်မှတ်တွေအတွက် ဂျာမနီရဲ့ IRIS-T SLMလို စနစ်တွေကို အသုံးပြုမှာပါ။ ကီလိုမီတာ ၁၀၀ လောက်ထိ ကွာဝေးတဲ့ တာလတ်ပစ် စစ်လက်နက်တွေအဖြစ် အမေရိကန်လုပ် Patriotလို လေကြောင်းကာကွယ်ရေး စနစ်တွေကို ရွေးချယ်လာနိုင်ပြီး အရမ်းဝေးကွာတဲ့ နေရာက လေကြောင်းခြိမ်းခြောက်မှုတွေကိုတော့ အမေရိကန်နဲ့ အစ္စရေး ပူးပေါင်းထုတ်လုပ်တဲ့ Arrow 3လို ကာကွယ်ရေး စနစ်တွေနဲ့ တန်ပြန်ဖို့ လျာထားပါတယ်။
Sky Shieldမှာ NATO စစ်မဟာမိတ် အဖွဲ့ဝင် တစ်ဒါဇင်ကျော်လောက် ပါဝင်ဖို့သာ ကနဦး ညှိနှိုင်းထားပေမယ့် အခုအခါမှာတော့ ဘက်မလိုက် နိုင်ငံနှစ်ခုပါ လာရောက် ချိတ်ဆက်ခဲ့တာလည်း ဖြစ်ပါတယ်။
