ဂျပန် ဝန်ကြီးချုပ်ဟောင်း ရှင်ဇိုအာဘေးကို လုပ်ကြံ သတ်ဖြတ်ခဲ့သူက သူ့ရဲ့ ပြစ်ဒဏ်အတွက် အယူခံ ဝင်ခဲ့ကြောင်း သိရပါတယ်။
၂၀၂၂ တုန်းက အာဘေးကို သေနတ်နဲ့ ပစ်သတ်ခဲ့တဲ့ အသက် ၄၅ နှစ်အရွယ် တက်ဆူယာ ယာမာဂါမီဟာ ပြစ်မှုထင်ရှားတဲ့အတွက် လွန်ခဲ့တဲ့ နှစ်ပတ်မှာ ထောင်ဒဏ်တစ်သက် စီရင်ချက် ချမှတ် ခံခဲ့ရပါတယ်။
ဖေဖော်ဝါရီ ၄ ရက်မှာတော့ သူ့အတွက် အစိုးရက ခန့်အပ်ပေးထားတဲ့ ရှေ့နေဖြစ်သူ မာဆာကီ ဖူရူကာဝါက အမှုသည်ရဲ့ တောင်းဆိုမှုအရ ပြစ်ဒဏ်ကို အယူခံ ဝင်ခဲ့ကြောင်း ပြောကြားခဲ့ပါတယ်။
အောက်ရုံးရဲ့ စီရင်ချက်က မမျှတဘူးလို့ ယုံကြည်တဲ့အတွက် အဲဒါကို ပြောင်းလဲပစ်ဖို့ အခွင့်အလမ်းမျိုး ရှာဖွေသွားမယ်လို့ ဖူရူကာဝါက ဆိုပါတယ်။
Public Service Announcement
ယာမာဂါမီက သူ့မိသားစုကို စီးပွားပျက်တဲ့ထိ လိမ်လည်ခဲ့တဲ့ ဘာသာရေးဂိုဏ်း တစ်ခုနဲ့ ဆက်စပ်နေတဲ့ အာဘေးကို အငြှိုးထားပြီး လက်လုပ်သေနတ်နဲ့ ပစ်သတ်ခဲ့ကြောင်း တရားရုံးမှာ ဝန်ခံခဲ့ပါတယ်။ အခုတော့ အယူခံ ဝင်မှုအရ အိုဆာကာ ဗဟိုတရားရုံးမှာ အမှုကို ပြန်လည် စစ်ဆေးမှာ ဖြစ်ပါတယ်။
အဲဒီ ရှုပ်ထွေးတဲ့ ဘာသာရေးဂိုဏ်းကြောင့် ယာမာဂါမီရဲ့ မိခင်ဟာ ဒေဝါလီခံရတဲ့ထိ အခြေအနေ ဆိုးခဲ့ကြောင်း သိရှိရတဲ့နောက် တရားခံအပေါ် စာနာသူတွေလည်း ရှိခဲ့ပါတယ်။ အာဘေးဟာ အဲဒီဂိုဏ်းရဲ့ ခေါင်းဆောင်ပိုင်း တချို့က စီစဉ် ကျင်းပပေးခဲ့တဲ့ မဲဆွယ်ပွဲ တစ်ခုမှာ မိန့်ခွန်းပြောနေတဲ့အချိန် ပစ်ခတ်ခံခဲ့ရတာလို့လည်း သိရပါတယ်။
ကိုးကား: AFP
