ဇမ်ဘီယာ နိုင်ငံသား တစ်ဦးဟာ ဆင်တွေလိုက်လို့ ထွက်ပြေးရာကနေ မိကျောင်းကိုက်ခံရပြီး သေဆုံးသွားကြောင်း သိရပါတယ်။
ဒီကိစ္စဟာ ရယ်စရာလို ဖြစ်နေပေမယ့် အမှန်တကယ် ကြုံတွေ့ခဲ့တဲ့ အခြေအနေ တစ်ခုပါ။ အသက် ၅၂ နှစ်အရွယ် တံငါသည် အမျိုးသားဟာ ဇမ်ဘီယာနိုင်ငံ အရှေ့ပိုင်းမှာ တောဆင်ရိုင်းအုပ်က လိုက်လံ ရန်မူလို့ ထွက်ပြေးရင်း မိကျောင်းနဲ့ တည့်တည့်တိုးခဲ့တာလို့ ရဲတွေက ပြောပါတယ်။
ဖေဖော်ဝါရီ ၄ ရက်နေ့တုန်းက ဒင်း ညီရန်ဒါဟာ သူငယ်ချင်း နှစ်ဦးနဲ့အတူ ငါးဖမ်းပြီး ပြန်အလာမှာ ဆင်အုပ်နဲ့ တည့်တည့် တိုးခဲ့ပါတယ်။ သူတို့ သုံးယောက်လည်း ဆင်တွေလိုက်လို့ တကွဲတပြားစီ ထွက်ပြေးရင်း ညီရန်ဒါကတော့ လူယန်ဂါမြစ်ထဲ စီးဝင်တဲ့ ချောင်းတစ်ခုထဲ ဆင်းပြေးခဲ့ပါတယ်။
အဲဒီနေရာမှာ ညီရန်ဒါရဲ့ ညာဖက်ပေါင်ကို မိကျောင်းတစ်ကောင်က လှမ်းကိုက်ခဲ့တာလို့ ဒေသခံ ရဲတပ်ဖွဲ့ အကြီးအကဲ ရောဘတ်ဆန် မီယမ်ဘာက သတင်းထောက်တွေကို ပြောပြခဲ့ပါတယ်။ ညီရန်ဒါက အနီးမှာရှိတဲ့ တုတ်တစ်ချောင်းကို ကောက်ယူပြီး မိကျောင်းကို အကြိမ်ကြိမ် ရိုက်ရင်း လွတ်မြောက်ပြီး ချောင်းဘေးနားကို ပြန်တွားသွား တက်လာနိုင်ခဲ့ပါတယ်။
Public Service Announcement
ခပ်လှမ်းလှမ်းကနေ ကြောက်လန့်တကြား ကြည့်နေခဲ့တဲ့ တခြားတံငါသည် နှစ်ဦးလည်း အဲဒီကျမှ ညီရန်ဒါကို သွားကူပြီး သွေးတိတ်အောင် ကြိုးစားခဲ့ကြပါတယ်။ သူတို့ အစွမ်းကုန် ကြိုးစားကြပေမယ့် ကံဆိုးစွာနဲ့ပဲ ညီရန်ဒါ သေဆုံးသွားခဲ့တာ ဖြစ်တယ်လို့လည်း မီယမ်ဘာက ဆိုပါတယ်။
ရဲတွေက အခင်းဖြစ်တဲ့ နေရာကို ရောက်သွားပြီး သေမှုသေခင်း စစ်ဆေးမှုတွေ လုပ်ခဲ့တဲ့အခါ သေဆုံးသူရဲ့ ပေါင်မှာ ကြီးမားပြီး နက်ရှိုင်းတဲ့ ကိုက်ရာတွေကို တွေ့ရှိခဲ့ပါတယ်။
လူယန်ဂါမြစ်ဟာ ဇမ်ဘီယာ တောင်ပိုင်းမှာရှိတဲ့ လူယန်ဂါ အမျိုးသား ဥယျာဉ် သစ်တောဇုန်ကို ဖြတ်သန်း စီးဆင်းပါတယ်။ အဲဒီ မြစ်ထဲမှာတော့ ကမ္ဘာပေါ်မှာ ရန်အလိုဆုံး မိကျောင်းမျိုးစိတ်ဖြစ်တဲ့ နိုင်းလ်စ် မိကျောင်းတွေ အများအပြား ကျက်စားနေထိုင်ပါတတယ်။
အာဖရိက တောင်ပိုင်းမှာရှိတဲ့ ဇမ်ဘီယာ နိုင်ငံဟာ တောဆင်ရိုင်းတွေလည်း ပေါများပြီး ဆင်နဲ့ လူသားတွေကြား ထိပ်တိုက် ရင်ဆိုင် ပဋိပက္ခတွေလည်း မကြာခဏ ဖြစ်ပေါ်ခဲ့ပါတယ်။
