ဖိလစ်ပိုင် စာသင်ကျောင်းမှာ ပစ်ခတ်မှုဖြစ်ပြီး ၃ ဦးသေ၊ ၅ ဦး ဒဏ်ရာရ

ဖိလစ်ပိုင်နိုင်ငံက စာသင်ကျောင်း တစ်ခုမှာ ပစ်ခတ်မှု ဖြစ်ပွားခဲ့တဲ့နောက် ကျောင်းသား ၃ ဦး သေဆုံးပြီး ၅ ဦး ဒဏ်ရာရခဲ့ကြောင်း သိရပါတယ်။

ဖိလစ်ပိုင် အလယ်ပိုင်း၊ လေတေးပြည်နယ်ထဲက တက်လိုဘန်းမြို့မှာရှိတဲ့ ဆန်ဟိုဆေး အထက်တန်းကျောင်းမှာ ဖြစ်ပွားခဲ့တဲ့ ပစ်ခတ်မှုရဲ့ သံသယ တရားခံ လူငယ် ၂ ဦးကို ဖမ်းဆီးထားကြောင်း ရဲတွေက ပြောပါတယ်။ သံသယရှိသူ တစ်ဦးဟာ အခင်းဖြစ်ရာ ကျောင်းမှာ တက်ရောက်နေတဲ့ ကျောင်းသားတစ်ဦးလို့ ဆိုပါတယ်။

သူနဲ့ ကြံရာပါ နောက်ထပ်လူငယ် တစ်ဦးဟာ ပစ္စတိုသေနတ်တွေ ကိုင်ဆောင်ပြီး ဇွန်လ ၂၂ ရက် မနက်ပိုင်းက ကျောင်းထဲဝင်ရောက် ပစ်ခတ်ခဲ့တာ ဖြစ်ပါတယ်။ ပစ်ခတ်မှုမှာ ဒဏ်ရာရခဲ့သူတွေကို နီးစပ်ရာ ဆေးရုံတွေဆီ အရေးပေါ် ပို့ဆောင်ပေးထားပါတယ်။

အသက် ၁၅ နှစ်အရွယ် Grade 9 ကျောင်းသားနဲ့ သူ့ရဲ့ အသက် ၁၄ နှစ်အရွယ် အဖော်တို့ကိုတော့ ကျောင်းဝင်းထဲမှာပဲ ဖမ်းဆီးရမိခဲ့ပါတယ်။

Public Service Announcement

ကျောင်းသူကျောင်းသား ၁၅၀၀ ကျော် ပညာသင်ယူနေတဲ့ အစိုးရကျောင်းမှာ ဖြစ်ပွားခဲ့တဲ့ ပစ်ခတ်မှုရဲ့ အကြောင်းရင်းကို အာဏာပိုင်တွေက ဆက်လက် စုံစမ်းနေဆဲပါ။ ပြီးတော့ ကျောင်းတဝိုက်မှာလည်း လုံခြုံရေး တိုးမြှင့်ထားပါတယ်။

ပြည်သူတွေ အနေနဲ့ စိတ်အေးအေး ထားကြဖို့၊ အတည်မပြုနိုင်တဲ့ ကောလာဟလတွေကို မဖြန့်ဝေကြဖို့၊ အာဏာပိုင်တွေနဲ့ ပူးပေါင်း ဆောင်ရွက်ပေးကြဖို့လည်း ရဲတပ်ဖွဲ့က ထုတ်ပြန်ထားပါတယ်။

ဖိလစ်ပိုင်မှာတော့ လိုင်စင်မဲ့ တရားမဝင် လက်နက် ကိုင်ဆောင်မှုတွေကြောင့် သေနတ်ပစ်ခတ်တဲ့ မှုခင်းတွေ နေရာအနှံ့ ဖြစ်ပွားလေ့ရှိပါတယ်။ ဒါပေမဲ့ စာသင်ကျောင်းတွေမှာ ပစ်ခတ်မှု ဖြစ်စဉ်မျိုးကတော့ ရှားပါးတဲ့ အခြေအနေလို့ ဆိုနိုင်ပါတယ်။

၂၀၂၂ ခုနှစ်၊ ဇူလိုင်လတုန်းက အတီနီယိုဒီ မနီလာ တက္ကသိုလ်ရဲ့ ဥပဒေကျောင်း ဘွဲ့နှင်းသဘင် အခမ်းအနားမှာ ပစ်ခတ်မှုတစ်ခု ဖြစ်ပွားခဲ့ပြီး လာမီတန်မြို့တော်ဝန် အပါအဝင် ၃ ဦး သေဆုံးခဲ့ဖူးပါတယ်။

ကိုးကား: CNA