စစ်ကြောရေးမှာ ကျဆုံးသွားတဲ့ ဗိုလ်တထောင်မြို့နယ် က အသက် ၁၉ အရွယ် ကိုဘုန်းမြင့်အောင်ရဲ့ နာရေး ကို ဒီနေ့ ရေဝေးသုသာန်မှာပြုလုပ်ခဲ့ရာမှာ စစ်ကောင်စီတပ်ဖွဲ့ဝင်တွေ အနီးကပ်စောင့်ကြပ်ခဲ့တာတွေ့ရပါတယ်။
ဗိုလ်တထောင်မြို့နယ် ၅၄ လမ်းမှာနေတဲ့ ကိုဘုန်းမြင့်အောင် တို့သားအဖကို စစ်ကောင်စီဟာ နိုဝင်ဘာလ ၂၃ ရက်က စစ်ကား ၃ စီးနဲ့လာရောက်ဖမ်းဆီးသွားတာပါ။
အဲဒီနောက် ည ၁၂ နာရီလောက်မှာ ဖခင်ဖြစ်သူကို ပြန်လွှတ်ပေးခဲ့ပေမယ် နောက်တစ်နေ့ နေ့လယ်ပိုင်းမှာ တော့ ကိုဘုန်းမြင့်အောင် ဆုံးသွားတဲ့သတင်းကို စစ်ကောင်စီဟာ မိသားစုကိုအကြောင်းကြားလာပါတယ်။စစ်ကြောရေးမှာ ကျဆုံးသွားတဲ့ ကိုဘုန်းမြင့်အောင်ရဲ့ နောက်ဆုံးခရီးကို စစ်ကောင်စီတပ်ဖွဲ့ဝင်တွေဟာ အနီးကပ်စောင့်ကြပ်ခဲ့ပါတယ်။
နာရေးကိုသွားရောက်ခဲ့သူ ကိုဘုန်းမြင့်အောင်ရဲ့ မိတ်ဆွေတစ်ဦးက ဖေ့ဘွတ်ခ်မှာရေးသားရာမှာ ဓာတ်ပုံမရိုက်ရဆိုပြီး သေနတ်ကြီးတွေကိုင်ပြီး နာရေးမှာတောင်စစ်ကောင်စီတပ်ဖွဲ့ဝင်တွေဟာ ခြိမ်းခြောက်တယ်လို့ ဆိုထားပါတယ်။
Public Service Announcement
အသက် ၁၉ နှစ်အရွယ် ကိုဘုန်းမြင့်အောင်ဟာ တက္ကသိုလ် ပထမ နှစ်ကျောင်းသားဖြစ်ပြီး သားအဖ ၂ ဦးကို စစ်ကောင်စီဟာ ဘာကြောင့်ဖမ်းဆီးရလဲဆိုတာတော့မသိရသေးပါဘူး။
စစ်ကြောရေး မှာ နှိပ်စက်မှုဒဏ်ကြောင့် ကျဆုံးသွားသူတွေထဲ အချို့ဟာ အလောင်းပြန်ရသလို အလောင်းပြန်မရကြသူတွေလည်းရှိနေပါတယ်။
အလောင်းပြန်ရတဲ့မိသားစုဝင်တွေဟာလည်း နာရေးမှာ အလောင်းကို အနီးကပ်ကြည့်ရှုခွင့်မရကြဘူးလို့ သိရပါတယ်။
