မီးလောင်နေချိန်မှာ ကိုယ်လွတ်မရုန်းဘဲ ခွေးလေးတွေကို ခေါင်းအေးအေးနဲ့ ကယ်ထုတ်ခဲ့တဲ့ ဖိလစ်ပိုင် အမျိုးသမီးကိုချီးကျူး​နေကြ

ဒီဇင်ဘာ-၁၁၊၂၀၂၅။People’s Spring

မီးအကြီးအကျယ် လောင်ကျွမ်းနေချိန်မှာ ကိုယ်တိုင် လွတ်မြောက်ရေးထက် သူ့ရဲ့ ခွေးလေးနှစ်ကောင် ဘေးကင်းစေဖို့ ဦးစားပေးကယ်တင်ခဲ့တဲ့ ဖိလစ်ပိုင်အမျိုးသမီးတစ်ဦးဟာလူမှုကွန်ရက် မီဒီယာတွေမှာ ချီးကျူးခံနေရပါတယ်။

အွန်လိုင်းမှာ လူပြောများနေတဲ့ဗီဒီယိုထဲမှာတော့ အဆောက်အအုံကြီးတစ်ခု အကြီးအကျယ် မီးလောင်နေတဲ့အချိန် နှစ်ထပ် အမြင့်မှာ ပိတ်မိနေတဲ့ အမျိုးသမီးကို အောက်မှာ ရှိနေတဲ့သူတွေက လှေကားထောင်ပြီးကယ်ဆယ်ရွှေ့ပြောင်းပေးဖို့ ကြိုးစားနေတာကို တွေ့ခဲ့ရပါတယ်။

ဒါပေမဲ့ အလျံတညီးညီး မီးညွန့်တွေနဲ့ အရမ်းနီးနေတဲ့ အချိန်မှာတောင် အမျိုးသမီးဟာ အခြေအနေကို တည်တည်ငြိမ်ငြိမ် ကိုင်တွယ်ရင်း သူ့ရဲ့ ခွေးလေးနှစ်ကောင်ကို အောက်မှာရှိနေတဲ့ သူတွေ ဖမ်းမိနိုင်အောင် အရင်ဆုံးပစ်ချပေးနေခဲ့တာကို ဗီဒီယိုထဲမှာ မြင်ခဲ့ရပါတယ်။

Public Service Announcement

နောက်တော့ မီးက အရမ်းတောက်လောင်လာပြီး သူရှိနေတဲ့ နေရာထိ ကူးစက်လာချိန်မှာ အမျိုးသမီးဟာ ကွန်ကရစ် ဝရန်တာ လက်ရန်းကနေ ခိုဆင်းရင်း အောက်ဖက်ကနေ ထောင်ပေးတဲ့ လှေကားဆီ အောင်အောင်မြင်မြင် ရောက်သွားနိုင်ခဲ့ပါတယ်။ သူ့ကို မီးသတ်သမား တစ်ဦးက ကူညီပေးခဲ့ပါတယ်။

အဲဒီ အသည်းယားစရာအခြေအနေဟာ ဖိလစ်ပိုင်နိုင်ငံ၊ဆီဘူပြည်နယ်ထဲက မန်ဒူအီမြို့က မီးလောင်မှု တစ်ခုမှာ ကြုံခဲ့တာလို့ သိရပါတယ်။ ဒီဇင်ဘာ ၁၀ ရက်နေ့တုန်းက မြို့ထဲမှာရှိတဲ့ အဆောက်အအုံ မီးလောင်ချိန်မှာ အမျိုးသမီးက တုန်လှုပ်ချောက်ချားမနေခဲ့ဘဲ သူချစ်တဲ့ ခွေးလေးနှစ်ကောင်ကို တည်တည်ငြိမ်ငြိမ်နဲ့ အရင်ဆုံးကယ်ထုတ်ပေးခဲ့တာဖြစ်ပါတယ်။

ဖိလစ်ပိုင်မှာတော့အဲဒီအမျိုးသမီးကိုသူရဲကောင်းတစ်ဦးအဖြစ် လူမှုကွန်ရက် မီဒီယာ သုံးစွဲသူတွေက ချီးကျူးနေကြပါတယ်။ ဒါ့အပြင် ခွေးလေးတွေကို အောက်ကနေ ဆီးပြီး ဖမ်းပေးတဲ့ အိမ်နီးချင်းတွေနဲ့ အမျိုးသမီးကို ကယ်ဆယ် ရွှေ့ပြောင်းပေးခဲ့တဲ့မီးသတ်တပ်ဖွဲ့ဝင်တွေကိုလည်းလူမှုကွန်ရက် သုံးစွဲသူတွေက ချီးကျူးတဲ့ မှတ်ချက်တွေ ရေးခဲ့ကြပါတယ်။

သွေးပျက်လောက်စရာ အခြေအနေမျိုးမှာ ဒီမိန်းကလေးဟာ အော်ဟစ်မနေ၊ ဒရမ်မာတွေခင်းမနေ၊ ကြောက်ရွံ့မနေဘဲ လုပ်သင့်တာကို လုပ်သွားတာ တကယ့်ကို အံ့ဩစရာဖြစ်တယ်လို့ တစ်ဦးက ​ရေးသားချီးကျူးထားပါတယ်။

နောက်တစ်ဦးကလည်း ဒီအမျိုးသမီးဟာဘယ်ရှုထောင့်ကကြည့်ကြည့်မယုံနိုင်စရာကောင်းလောက်အောင်သတ္တိရှိခဲ့ကြောင်း၊ခက်ခဲပြီးအန္တရာယ်များလှတဲ့ အခြေအနေမှာ နည်းနည်းလေးတောင် တွေဝေမနေဘဲ လုပ်သင့်တာကို မှန်မှန်ကန်ကန်၊ တိတိကျကျ လုပ်ပြသွားခဲ့တာ ထူးကဲလွန်းကြောင်း ချီးကျူးခဲ့ပါတယ်။

မီးသတ်တပ်ဖွဲ့ကတော့ မီးစတင်လောင်ကျွမ်းတဲ့ အကြောင်းရင်းကို စုံစမ်းနေဆဲလို့ ထုတ်ပြန်ထားပါတယ်။

ကိုးကား: Free Press Journal