▪️ယနေ့မှစ၍ CDMပြုလုပ်ရန် ထပ်မံတိုက်တွန်းကြောင်းနှင့် စစ်ကောင်စီထောက်တိုင်များအား ချေမှုန်းမည်ဖြစ်ကြောင်းကြေညာ
အာဏာသိမ်း အကြမ်းဖက်စစ်ကောင်စီကို သစ္စာခံ၍ တာဝန်ထမ်းဆောင်နေသောကျန်ရှိနေသည့် ဝန်ထမ်းများအား ငြိမ်းချမ်းစွာပြည်သူ့အာဏာဖီဆန်ရေးလှုပ်ရှားမှု (CDM)ပြုလုပ်ခြင်းဖြင့် ပြည်သူနှင့်ပူးပေါင်းရန် တော်လှန်ရေး အင်အားစုများက စည်းရုံးဖိတ်ခေါ်ခဲ့ပြီး အချိန်ကာလအားဖြင့် တစ်နှစ်ကျော်ကြာလခဲ့ပြီဖြစ်၍ လုံလောက်သော အချိန်ဖြစ်သည်ဟု သတ်မှတ်ကြောင်း ကရင်နီပြည်နယ်အတိုင်ပင်ခံကောင်စီ(KSCC)က ယနေ့ ထုတ်ပြန်သည်။
သို့ဖြစ်၍ ကရင်နီပြည်နယ်အတွင်း CDMမပြုလုပ်ဘဲ စစ်ကောင်စီအား သစ္စာခံနေသောစစ်ဘက် အရပ်ဘက် ဝန်ထမ်းများအားလုံး ကြေညာစာထွက်သည့် ဖေဖော်ဝါရီ ၁၃ရက်မှစ၍ CDMပြုလုပ်ကြရန် လေးနက်စွာ ထပ်မံ တိုက်တွန်းကြောင်း ဖော်ပြထားသည်။
ပြည်သူလူထု၏ အသက်အိုးအိမ်များကို ထောက်ထားငဲ့ညှာခြင်းမရှိဘဲ အပြစ်မဲ့ပြည်သူများကို ဖမ်းဆီးသတ် ဖြတ်ခြင်း၊လက်နက်ကြီးငယ်များ လေကြောင်းတိုက်ခိုက်မှုများ အကြိမ်ကြိမ်ပြုလုပ်ခဲ့သည့် အာဏာသိမ်းစစ်ကောင်စီကို အမြစ်ဖြတ် ချေမှုန်းခြင်းမလုပ်နိုင်ပါက နောက်ထပ် နှစ်ပေါင်းများစွာ အာဏာရှင်စနစ်အောက်ကို ပြန်လည်ရောက်ရှိသွားမည်ဖြစ်ကြောင်း KSCCက ဆို သည်။
Public Service Announcement
ထို့ကြောင့် စစ်အာဏာရှင်စနစ်ဆိုးအောက် ထပ်မံမရောက်ရှိစေရန်အတွက် CDM၏ အခန်းကဏ္ဍသည်လည်းအလွန်အရေးကြီး၍ ပြည်သူ့ဝန်ထမ်းများ CDM တွင် ဆက်လက်ပါဝင်ပေးရန် လေးနက်စွာ တိုက်တွန်းကြောင်း ဖော်ပြထားသည်။
တော်လှန်ရေးအင်အားစုများအနေဖြင့်နှစ်ပေါင်း ၇၀ ကျော်ကြာ ကြီးစိုးလွှမ်းမိုးခဲ့သော စစ်အာဏာရှင်နှင့် အာဏာရှင်မှန်သမျှကို အမြစ်ပြတ် ချေမှုန်းရာ၌ ၎င်းတို့၏ ယန္တရားလည်ပတ်နိုင်အောင် ထောက်ကူပြုနေသည့်ထောက်တိုင်များအားလုံးကို ချေမှုန်းဖြိုလဲသွားမည်ဖြစ်ကြောင်းလည်း KSCCက ကြေညာခဲ့သည်။
အာဏာသိမ်းစစ်ကောင်စီ ဒုခေါင်းဆောင် စိုးဝင်းသည် ယခု ဖေဖော်ဝါရီလဆန်းက ကရင်နီပြည်နယ်ရှိမြို့နယ်အချို့သို့သွားရောက်ပြီး ဝန်ထမ်းများ ဖေဖော်ဝါရီ ၂၅ရက် နောက်ဆုံးထား၍ ပြန်လည်တာဝန်ထမ်းဆောင်ရန် ညွှန်ကြားခဲ့ရာ ယင်းညွှန်ကြားချက်ကို လက်မခံရန် နှင့်လက်ခံပါက အရေးယူသွားမည်ဖြစ်ကောင်း ကရင်နီအမျိုးသားတိုးတက်ရေးပါတီ(KNPP)၏ ကရင်နီပြည်အစိုးရ ပြည်ထဲရေးဝန်ကြီးဌာနက ထုတ်ပြန်ထားသည်။
