စစ်ရေးအခြေအနေ တင်းမာနေသည်ဖြစ်၍ နန့်ရင်းချောင်းတစ်ဖက်ကမ်း အရှေ့တောင်ဘက် တလျှောက်တွင် မိုင်းများထောင်ထားပြီးဖြစ်၍ ယနေ့ အမိန့်ထုတ်ပြန်သည့် နေ့မှစ၍ အမိန့်တစုံတရာမထုတ်ပြန်မီအထိ မည်သည့် အကြောင်းနှင့်မျှလာရောက်ခြင်းမပြုရဟု ဟိုပင်မြို့နယ်အတွင်းရှိ အများပြည်သူများ၊ တောင်ယာလုပ်ကိုင်သူများ၊ စီးပွားရှင်များအား ဟိုပင် PDFက အသိပေးထားသည်။
မလိုက်နာဘဲ လာရောက်ခဲ့ပါက ဖြစ်ပေါ်လာသည့် မည်သည့် အကြောင်းအရာကိုမျှ တာဝန်ယူမည်မဟုတ်ဟုလည်း ထုတ်ပြန်ခဲ့သည်။
အဆိုပါ နန့်ရင်းချောင်းဒေသတွင် မတ်လ ၁၉ရက်က ကချင်လွတ်လပ်ရေးတပ်မတော်(KIA)နှင့် ဟိုပင် PDF ပူးပေါင်း အဖွဲ့နှင့် အကြမ်းဖက်စစ်ကောင်စီတပ်တို့ တိုက်ပွဲဖြစ်ပွားခဲ့သည်။ စစ်ကောင်စီတပ်က စစ်ကြောင်းထိုးလာ၍ ထိတွေ့တိုက်ပွဲဖြစ်သည်ဟု KIA သတင်းနှင့် ပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
အဆိုပါ တိုက်ပွဲဖြစ်စဉ်တွင် နှစ်ဖက်ထိခိုက်ကျဆုံးမှုရှိသည်ဟု သတင်းဖော်ပြမှုများရှိသော်လည်း သီးခြားအတည်ပြုချက်မရသေးပေ။
