စစ်ကောင်စီနှင့် ရှမ်းနီ ပူးပေါင်းတပ်မှ သေဆုံးထိခိုက်များပြီး လက်နက်ခဲယမ်းများရဟုဆို
စစ်ကောင်စီနှင့် ရှမ်းနီ ပူးပေါင်းတပ်မှ သေဆုံးထိခိုက်များပြီး လက်နက်ခဲယမ်းများရဟုဆိုစစ်ကိုင်းတိုင်း ဟုမ္မလင်းမြို့နယ်ရှိ စစ်ကောင်စီနှင့် ရှမ်းနီတပ်(SNA) ပူးပေါင်းစခန်း နှစ်ခုကို ကချင် လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်(PDF) ပူးပေါင်းတပ်က ယနေ့ နံနက်တွင် တိုက်ခိုက်သိမ်းပိုက်ခဲ့သည်ဟု ဒေသခံတစ်ဦးက ပြောသည်။
“ဟုမ္မလင်း နောင်ပိုအောင်ဘက်မှာ ဒီနေ့ မနက် ၄နာရီကနေ ၇နာရီ ၅၀အထိ ထိတွေ့မှု တိုက်ပွဲဖြစ်တယ်။ နောင်ပိုအောင် နောက်ကြော တောင်ဦးနဲ့ တောင်ဘို့လှ စခန်းလို့ ခေါ်တယ်။ SNAနဲ့ စစ်ကောင်စီနဲ့ ပူးပေါင်းစခန်း အဲဒီစခန်းတွေကို PDFနဲ့ KIAက သိမ်းပိုက်နိုင်လိုက်ပြီ။ စခန်း နှစ်ခုကို သိမ်းပိုက်နိုင်လိုက်ပြီ”ဟု ၎င်းက ဆိုသည်။
အခြားဒေသခံတစ်ဦးကလည်း စစ်ကောင်စီတပ်စခန်းသိမ်းပိုက်ခံရသည့် သတင်းကို ကြားရကြောင်း ပြောသည်။
“လက်နက်ခဲယမ်းတွေလည်းရတယ်။ လက်နက် တွေလည်းရတယ်။ လက်ပစ်ဗုံးတွေလည်းရတယ်။ စာရင်းအတိအကျတော့ မသိသေးဘူး” ဟု ဒေသခံက ပြောသည်။
Public Service Announcement
အဆိုပါ တိုက်ခိုက်မှုအတွင်း KIA/PDF ပူးပေါင်းတပ်ဘက်က ထိခိုက်မှုမရှိကြောင်း၊ စစ်ကောင်စီတပ်ဘက်က အကျအဆုံးများသည်ဟု ကြားရကြောင်း ဒေသခံက ပြောသည်။
“ဟိုဘက်က အကျအဆုံးက ၃၅ယောက်လောက် ကျမယ်”ဟု ဒေသခံက ပြောသည်။
ယမန်နေ့ (မေလ ၃ရက်)ကလည်း ဟုမ္မလင်းမြို့နယ်ရှိ စစ်ကောင်စီတပ်စခန်းတစ်ခုကို KIA/PDF ပူးပေါင်းတပ်က တိုက်ခိုက်သိမ်းပိုက်နိုင်ခဲ့ကြောင်း ဒေသခံက ပြောကြားခဲ့သော်လည်း အသေးစိတ်အခြေအနေကို မသိရသေးပေ။
ဟုမ္မလင်းနယ်ရှိ စစ်ကောင်စီတပ်စခန်းများသိမ်းပိုက်မှုနှင့်ပတ်သက်ပြီး KIA သတင်းနှင့်ပြန်ကြားရေးဌာန တာဝန်ခံ ဗိုလ်မှူးကြီးနော်ဘူနှင့် ဟုမ္မလင်း PDF တာဝန်ရှိသူ အချို့ထံမေးမြန်းရန် ယနေ့နံနက်ပိုင်း၌ ဆက်သွယ်ခဲ့သော်လည်း အဆက်အသွယ်မရသေးပေ။
