People’s Spring
ရိုမန်ကက်သလစ် ခရစ်ယာန် ဘာသာရေးရဲ့ အထွဋ်အခေါင် ပုဂ္ဂိုလ်ကြီးက မြန်မာ၊ ယူကရိန်း၊ ပါလက်စတိုင်း၊ အစ္စရေး၊ လက်ဘနွန်နဲ့ ဆူဒန်တို့မှာ စစ်ရဲ့ ဆိုးကျိုးတွေကို ခံစားနေရသူတိုင်းအတွက် ကမ္ဘာကြီးက မမေ့လျော့ကြဖို့လည်း တိုက်တွန်း တောင်းဆိုသွားခဲ့ပါတယ်။
မြန်မာနိုင်ငံမှာတော့ ပဋိပက္ခတွေရဲ့ ဆိုးကျိုးကို ပိုပြီး ပြင်းပြင်းထန်ထန် သက်ရောက် ခံစားရနိုင်တဲ့ ကလေးတွေ၊ သက်ကြီးရွယ်အိုတွေ၊ နာမကျန်းသူတွေ၊ ရိုဟင်ဂျာ အနွယ်တွေ အပါအဝင် ဒုက္ခသည်တွေရဲ့ နာကျင်ခံစားရမှုတွေကို အလေးထား သတိရပေးဖို့ ဝတ်ပြုသူတွေကို ပုပ်ရဟန်းမင်းကြီး ဖရန်ဆစ်က တောင်းဆိုခဲ့ပါတယ်။
နိုဝင်ဘာ ၂၄ ရက်က ဆုတောင်းပွဲ အခမ်းအနားမှာ ပုပ်ရဟန်းမင်းကြီးဟာ နိုဝင်ဘာ ၂၅ ရက်နေ့မှာ ကျရောက်မယ့် မြန်မာ့ အမျိုးသားနေ့ကိုလည်း ထည့်သွင်း ရည်ညွှန်းသွားခဲ့ပါတယ်။ အဲဒီနေ့ဟာ မြန်မာနိုင်ငံကို လွတ်လပ်ရေး လမ်းကြောင်းဆီ ပို့ဆောင်ပေးမယ့် ကနဦး လှုပ်ရှားမှု တစ်ခုဖြစ်တဲ့ ၁၉၂၀ ပြည့်နှစ်၊ ပထမအကြိမ် တက္ကသိုလ်ကျောင်းသား သပိတ်ကို ဂုဏ်ပြုထားတာ ဖြစ်ကြောင်း၊ ဒါပေမဲ့ ငြိမ်းချမ်းပြီး ဒီမိုကရေစီ ပြည့်ဝတဲ့ အလားအလာမျိုးကို မြန်မာပြည်သူတွေ ပိုင်ဆိုင်လာဖို့ကတော့ မျက်မှောက်ကာလထိ ရုန်းကန် ကြိုးစားနေရဆဲဖြစ်ကြောင်း ပုပ်ရဟန်းမင်းကြီးက ဆိုပါတယ်။
Public Service Announcement
သူဟာ မြန်မာပြည်သူ တစ်ရပ်လုံးအတွက် ကရုဏာထား စာနာသလို အထူးသဖြင့် ကလေးတွေ၊ သက်ကြီးရွယ်အိုတွေ၊ နာမကျန်းသူတွေနဲ့ ရိုဟင်ဂျာတွေ အပါအဝင် ဒုက္ခသည်တွေအတွက် ပိုပြီး အလေးထား တွေးတောမိကြောင်း၊ ပဋိပက္ခမှာ ပါဝင်ပတ်သက်နေတဲ့ အဖွဲ့အစည်းတွေအားလုံး လက်နက်တွေကို ချထားခဲ့ပြီး ရေရှည်တည်မြဲတဲ့ ငြိမ်းချမ်းရေးကို ဖော်ဆောင်နိုင်စေဖို့ စစ်မှန်လေးနက်တဲ့၊ အားလုံး ပါဝင်နိုင်တဲ့ ဆွေးနွေးမှုဆီ ဦးတည်ကြဖို့လည်း လှိုက်လှိုက်လှဲလှဲ တောင်းဆိုလိုကြောင်း ပုပ်ရဟန်းမင်းကြီးက မိန့်ကြားသွားပါတယ်။
မြန်မာနည်းတူ တခြားစစ်ဒဏ်ခံ နိုင်ငံတွေ၊ ဒေသတွေဖြစ်တဲ့ ယူကရိန်း၊ ပါလက်စတိုင်း၊ အစ္စရေး၊ လက်ဘနွန်နဲ့ ဆူဒန်တို့ကိုလည်း မမေ့လျော့ဘဲ ပြည်သူတွေအတွက် ဆုတောင်းပေးကြဖို့ ပုပ်ရဟန်းမင်းကြီးက တိုက်တွန်း မေတ္တာရပ်ခံသွားခဲ့ပါတယ်။
ကိုးကား- Vatican News
