ကေအဲန်ယူထိန်းချုပ်နယ်မြေဖြစ်တဲ့ ဘားအံမြို့နယ်အတွင်းမှာ အခုရက်ပိုင်းတွေအတွင်း ကရင်အမျိုးသားလွတ်မြောက်ရေးတပ်မတော် KNLA နဲ့ စစ်ကောင်စီရဲ့ နယ်ခြားစောင့်တပ်(BGF)ပူးပေါင်းတပ်တို့ကြား စစ်ရေးပဋိပက္ခတွေ ဖြစ်ပွားနေခဲ့ပါတယ်။
ဘားအံမြို့နယ် ဟတ္တလိုက်ကျေးနယ်အုပ်စုမှာ BGF ဘက်က KNLA တပ်မဟာ ၁ နယ်မြေထဲ စစ်ရေးဝင်ရောက်လှုပ်ရှားမှုတွေလုပ်ခဲ့လို့ နှစ်ဖက်တိုက်ပွဲတွေဖြစ်ပွားခဲ့ပြီး BGF ဘက်က ထိခိုက်ကျဆုံးမှုများပြားခဲ့တာပါ။
နယ်ခြားစောင့်တပ် BGF တပ်ဖွဲ့တွေဟာ ဖလံတောင်တိုက်နယ်ဆေးရုံကို ဝင်ရောက်စီးနင်းတပ်စွဲခဲ့ပြီး ဆေးဝါးနဲ့ ဆေးရုံသုံးပစ္စည်းတွေကို ယူဆောင်သွားခဲ့ပြီး ဖျက်ဆီးမှုတွေ လုပ်ဆောင်သွားခဲ့တယ်လို့ ကေအဲန်ယူ ဘားအံမြို့နယ် သတင်းနဲ့ ပြန်ကြားရေးတာဝန်ခံက ပြောပါတယ်။
ဒီလို နှစ်ဖက်တိုက်ပွဲကြောင့် ရွာသားတွေတိမ်းရှောင်ပြေးနေခဲ့ရပြီး အခုလက်ရှိမှာတော့ BGF တပ်ဖွဲ့တွေက ဖလံတောင်ရွာကနေ ပြန်လည်ရုတ်သိမ်းလာခဲ့လို့ တိမ်းရှောင်နေရတဲ့ရွာသားတွေဟာ နေအိမ်ကိုပြန်လည်ရောက်ရှိလာကြတာဖြစ်ပါတယ်။
Public Service Announcement
KNLA တပ်မဟာ ၁ နယ်မြေထဲ BGF တပ်ဖွဲ့တွေက စစ်ရေးဝင်ရောက်လှုပ်ရှားမှုပြုလုပ်နေစဉ်အတွင်း ဒေသခံတွေကို ဖမ်းဆီးခေါ်ဆောင်ပြီး ပေါ်တာခိုင်းစေတာ၊ လူသားဒိုင်းကာအဖြစ် အသုံးပြုတာစတဲ့ လူ့အခွင့်အရေးချိုးဖောက်မှုတွေကို ပြုလုပ်ခဲ့တယ်လို့ ကေအဲန်ယူက သတင်းထုတ်ပြန်ထားပါတယ်။
ကေအဲန်ယူ တပ်မဟာ ၁ ထိန်းချုပ်နယ်မြေဖြစ်တဲ့ ဘားအံမြို့နယ်အတွင်းက တိုက်ပွဲတွေအခြေအနေနဲ့ ပတ်သက်ပြီး ကေအဲန်ယူ-ဘားအံမြို့နယ် သတင်းနဲ့ပြန်ကြားရေးတာဝန်ခံကို ဆက်သွယ်မေးမြန်းထားပါတယ်။
