မြန်မာနိုင်ငံရဲ့ အခြေအနေဟာ ဒုက္ခတွင်းထဲ နက်နက်ရှိုင်းရှိုင်း ကျဆင်းနေပြီလို့ အမေရိကန် နိုင်ငံခြားရေး ဝန်ကြီး အန်တိုနီ ဘလင်ကန်က ပြောကြားခဲ့ပါတယ်။
အာဏာသိမ်း မြန်မာစစ်တပ်ဟာ ပြည်သူတွေအပေါ် ရက်ရက်စက်စက် ဖိနှိပ်မှုတွေ၊ အကြမ်းဖက်မှုတွေ နှစ်ဆတိုးပြီး ကျူးလွန်နေကြောင်း၊ အမေရိကန် သမ္မတ ဂျိုးဘိုင်ဒန် အနေနဲ့ အာဆီယံ အဖွဲ့ဝင် နိုင်ငံ ခေါင်းဆောင်တွေနဲ့ တွေ့ဆုံတဲ့ အချိန်မှာ ဒီအရေးကိစ္စကို အလေးထား ဆွေးနွေးသွားဖို့ ရှိနေကြောင်း ဘလင်ကန်က ဆိုပါတယ်။
မြန်မာနိုင်ငံရဲ့ အနေအထားဟာ ဒုက္ခတွင်းထဲ နက်သထက်နက်အောင် ကျဆင်းနေတာ မြင်ရခြင်းက တကယ့်ကို နာကျင်စရာ ဖြစ်တယ်လို့ ဩစတြေးလျနိုင်ငံ၊ မဲလ်ဘုန်းမှာ ပြုလုပ်တဲ့ သတင်းစာ ရှင်းလင်းပွဲမှာ ဘလင်ကန်က ပြောကြားသွားပါတယ်။ သူဟာ အမေရိကန်၊ ဩစတြေးလျ၊ အိန္ဒိယနဲ့ ဂျပန်တို့ စုစည်းထားတဲ့ Quad မဟာမိတ် အစည်းအဝေး တစ်ခုအတွက် ဩစတြေးလျကို ရောက်နေတာပါ။
အာဏာရှင် စစ်ကောင်စီဟာ ဖိနှိပ်မှုတွေ၊ အကြမ်းဖက်မှုတွေကို နှစ်ဆတိုး အရှိန်မြှင့်တင် ကျူးလွန်လာနေတာကိုလည်း သူတို့ တွေ့မြင်နေကြောင်း ဘလင်ကန်က ဆိုပါတယ်။ သူက အမေရိကန် အစိုးရ အနေနဲ့ မြန်မာ့ အရေးကို ဖြေရှင်းဖို့ အာဆီယံက ချမှတ်ထားတဲ့ မူဝါဒ ၅ ချက် အထမြောက်ရေးအတွက် ထောက်ခံ အားပေးသွားမယ်လို့လည်း ကတိပြုခဲ့ပါတယ်။
Public Service Announcement
သိပ်မကြာခင်မှာ သမ္မတ ဘိုင်ဒန်က အာဆီယံ ခေါင်းဆောင်တွေကို ဝါရှင်တန် ဖိတ်ခေါ်ပြီး တွေ့ဆုံ ဆွေးနွေးဖို့ စီစဉ်ထားကြောင်း၊ အဲဒီအခါ မြန်မာနိုင်ငံ ပြဿနာကလည်း သမ္မတ ဘိုင်ဒန် အာရုံစိုက်ထားတဲ့ ကိစ္စတစ်ခု အနေနဲ့ ပါဝင်လာမှာဖြစ်ကြောင်း ဘလင်ကန်က ပြောကြားသွားပါတယ်။1h
