ဖိလစ်ပိုင်က ကလေးငယ် တစ်ဦးဟာ မုန်တိုင်းကြောင့် မြေပြိုမှုတွေအတွင်း ရေခဲသေတ္တာ တစ်လုံးထဲ ခိုအောင်းနေရင်း အသက်ရှင်သန် လွတ်မြောက်လာခဲ့ကြောင်း သိရပါတယ်။
ဖိလစ်ပိုင် မီဒီယာတွေက အသက် ၁၁ နှစ်အရွယ် ကလေးငယ်ရဲ့ အံ့ဩ ထိတ်လန့်စရာ စွန့်စားခန်းကို အခု သီတင်းပတ်မှာ အကျယ်တဝင့် ရေးသား ဖော်ပြလာခဲ့ပါတယ်။ လက်တေး ဒေသက ကျေးရွာတစ်ခုမှာ နေထိုင်တဲ့ ကလေးငယ်ဟာ ဧပြီ ၁၁ ရက်က အပူပိုင်းမုန်တိုင်း မက်ဂီ ဝင်ရောက် တိုက်ခတ်ချိန်မှာ ဆိုးရွားတဲ့ မြေပြိုမှုတွေနဲ့ မျက်ဝါးထင်ထင် ကြုံတွေ့ခဲ့ရပါတယ်။
မုန်တိုင်းကြောင့် ရေကြီးမှုတွေ၊ မြေပြိုမှုတွေ ဖြစ်ပွားခဲ့ပြီး လက်တေးက ကျေးရွာတချို့မှာ အိမ်ခြေ ၂၁၀ ကျော် ပျက်စီးခဲ့ပါတယ်။ အများစုကတော့ မြေပြိုရာက ရွှံ့နွံတွေ ဖုံးလွှမ်းသွားတာ ခံခဲ့ရတာပါ။ ကယ်ဆယ်ရေး အဖွဲ့တွေဟာ ကန်တန်နော့စ် ကျေးရွာကို ရောက်ရှိလာပြီး အသက်ရှင် ကျန်ရစ်သူတွေကို ရှာဖွေတဲ့အချိန်မှာ ရွှံ့နွံတွေအောက် ရေခဲသေတ္တာ အဟောင်း တစ်လုံးထဲ ခိုအောင်းနေတဲ့ ယောက်ျားလေး တစ်ယောက်ကို တွေ့ရှိခဲ့ကြပါတယ်။
မီဒီယာတွေက ကလေးရဲ့ နာမည်ကိုတော့ မဖော်ပြခဲ့ကြပါဘူး။ ကလေးဟာ ကယ်ဆယ်ရေးတွေ တွေ့ရှိချိန်မှာ အတော်လေး ကြောက်ရွံ့ တုန်လှုပ်နေပြီး အရိုးအက်တဲ့ ဒဏ်ရာတချို့ ရထားပေမယ့် ဆေးရုံ ရောက်သွားချိန်မှာ အခြေအနေ တည်တည်ငြိမ်ငြိမ် ရှိခဲ့တယ်လို့ ဆိုပါတယ်။ သူ့ကို ဧပြီ ၁၆ ရက်မှာ မိဘတွေ လက်ထဲ ဘေးမသီ ရန်မခ ပြန်လည် အပ်နှံပေးနိုင်ခဲ့ကြောင်း သိရပါတယ်။
Public Service Announcement
ရွာထဲမှာ မြေပြိုနေတဲ့အချိန် ဆွေမျိုးတစ်ဦးက ကလေးကို သွားကယ်ဖို့ ကြိုးစားခဲ့ပေမယ့် အကြောက်လွန်နေတဲ့ ကလေးက ငြင်းဆန်ပြီး ရေခဲသေတ္တာထဲ ဝင်ပုန်းနေခဲ့တာလို့ သိရပါတယ်။ သူ့အိမ်ကိုပါ ရွှံ့နွံတွေ ဖုံးလွှမ်းသွားပြီး ကလေးဟာ ရေခဲသေတ္တာထဲမှာ ရက်ပိုင်းလောက် ပုန်းခိုနေခဲ့ရတာပါ။
မက်ဂီမုန်တိုင်းကြောင့် ဖိလစ်ပိုင်မှာ လူပေါင်း ၂၄၀ ကျော် သေဆုံးပြီး ၁၅၀ ဝန်းကျင်လောက် ပျောက်ဆုံးနေဆဲပါ။ အရှေ့တောင်အာရှ ဒေသက ကျွန်းစုနိုင်ငံ ဖိလစ်ပိုင်ဟာ တစ်နှစ်ကို ပျမ်းမျှ မုန်တိုင်း အခု ၂၀ လောက် ဝင်ရောက်တိုက်ခတ်တာ ကြုံတွေ့နေကျ ဖြစ်ပါတယ်။
