အိန္ဒိယကနေ ရောက်ရှိလာတဲ့ ဘတ်စ်ကား တစ်စီးဟာ နီပေါနိုင်ငံမှာ လျှိုထဲထိုးဆင်းပြီး မြစ်ထဲကျသွားရာက လူ ၃၀ နီးပါး သေဆုံးခဲ့ပါတယ်။
ဩဂုတ် ၂၃ ရက်နေ့က လူပေါင်း ၄၀ ကျော်ကို တင်ဆောင်လာတဲ့ ဘတ်စ်ကားဟာ နီပေါရဲ့ မြို့တော် ခတ္တမန္ဒူနဲ့ ကီလိုမီတာ ၁၁၀ လောက်အကွာ တာနာဟွန် ခရိုင်ထဲမှာ ဆိုးရွားတဲ့ မတော်တဆမှုနဲ့ ကြုံခဲ့တာပါ။
ဘတ်စ်ကားပေါ် ပါလာသူတွေဟာ အိန္ဒိယနိုင်ငံသားတွေ ဖြစ်ကြောင်း၊ ဘတ်စ်ကားက လမ်းဘေးကို ချော်ထွက်သွားပြီး လျှိုအောက်ထဲက မြစ်ထဲ ကျသွားခဲ့ရာက လိုက်ပါလာသူ ၄၃ ဦးအနက် ၂၇ ဦး သေဆုံးခဲ့ကြောင်း တာနာဟွန် ခရိုင် အုပ်ချုပ်ရေးမှူး ဂျနာဒန် ဂွာတမ်က ပြောပါတယ်။
Public Service Announcement
အဲဒီအိန္ဒိယ နိုင်ငံသားတွေဟာ စင်းလုံးငှား ဘတ်စ်ကားနဲ့အတူ ပေါ့ခါရာမှာ တစ်ညအိပ်ခဲ့ပြီး ခတ္တမန္ဒူကို အလည်အပတ် ခရီးဆက်လာချိန်မှာ ဖြစ်ရပ်ဆိုး ကြုံခဲ့ရတာပါ။
မြစ်ရဲ့ ရေစီးသန်လွန်းတဲ့ အခြေအနေကြောင့် ကယ်ဆယ်ရေး လုပ်ငန်းတွေ ဆောင်ရွက်ရာမှာ အခက်အခဲတွေနဲ့ ရင်ဆိုင်ခဲ့ရပါတယ်။ ဒဏ်ရာရထားသူတွေကိုတော့ စစ်တပ် ရဟတ်ယာဉ်တွေကို အသုံးပြုပြီး ခန္တမန္ဒူ ဆေးရုံတွေဆီ တင်ပို့ခဲ့ရပါတယ်။
ဘတ်စ်ကားက လမ်းချော်ပြီး လျှိုထဲ ထိုးဆင်းသွားရတဲ့ အကြောင်းရင်းကိုတော့ မသိရသေးပါဘူး။ ဥရောပကို နိုင်ငံတော်ခရီးစဉ် သွားရောက်နေတဲ့ အိန္ဒိယ ဝန်ကြီးချုပ် နာယန်ဒရာ မိုဒီက ထိခိုက်သေဆုံးသူတွေအတွက် စာနာဝမ်းနည်းကြောင်း ပြောကြားခဲ့ပြီး လိုအပ်သမျှ အကူအညီတွေ ပေးအပ်သွားမယ်လို့ ကတိပြုခဲ့ပါတယ်။
ပြီးခဲ့တဲ့ လတုန်းကလည်း နီပေါရဲ့ ချစ်ဝမ်ခရိုင်မှာ မြေပြိုမှု တစ်ခု ဖြစ်ပွားရာက ဘတ်စ်ကားနှစ်စီးဟာ ရွှံ့ရေတွေနဲ့အတူ မျောပါသွားခဲ့ပြီး အိန္ဒိယ နိုင်ငံသား ၅ ဦး သေဆုံးခဲ့ဖူးပါတယ်။
ကိုးကား: NDTV
