NATOဟာ မြောက်အမေရိကနဲ့ အနောက်ဥရောပ နိုင်ငံတွေ စုပေါင်းထားတဲ့ ကာကွယ်ရေး မဟာမိတ် အဖွဲ့တစ်ခုဖြစ်ပြီး မူအားဖြင့် အဖွဲ့ဝင် နိုင်ငံတစ်ခု စစ်ပြုကျူးကျော် ခံရတဲ့အခါ NATO တစ်ဖွဲ့လုံးက စုပေါင်းတုံ့ပြန်ဖို့ ကတိထားရှိပါတယ်။
အရှေ့တောင်အာရှ အပါအဝင် အာရှတိုက်ရဲ့ အစိတ်အပိုင်း တချို့မှာလည်း NATOနဲ့ အလားတူ ဒေသတွင်း ကာကွယ်ရေး အင်အားစုတွေ ပေါ်ထွန်းလာသင့်ကြောင်း ထောက်ပြမှုတွေ ရှိခဲ့ပေမယ့် လက်တွေ့မှာတော့ ဘယ်တုန်းကမှ အကောင်အထည် မပေါ်ခဲ့ပါဘူး။
အရှေ့တောင်အာရှ နိုင်ငံတွေ စုစည်းထားတဲ့ အာဆီယံ အသိုက်အဝန်းမှာရော NATOပုံစံ မဟာမိတ် အင်အားစုမျိုး ပေါ်ထွန်းလာမလားလို့ အခုသီတင်းပတ်၊ မနီလာမြို့တော်မှာ ကျင်းပတဲ့ လုံခြုံရေး ဖိုရမ်တစ်ခုမှာ မေးမြန်းတဲ့အခါ ဝန်ကြီး ဂီလ်ဘာတို တီယိုဒိုရိုက လက်တွေ့မကျတဲ့ စိတ်ကူးလို့ မှတ်ချက်ပေး တုံ့ပြန်သွားခဲ့ပါတယ်။
အာဆီယံ အဖွဲ့ဝင် နိုင်ငံတွေရဲ့ နောက်ခံအခြေအနေတွေက ကွဲပြားသလို အကျိုးစီးပွားဆိုင်ရာ ရှုထောင့်တွေကလည်း စုံလင် များပြားလွန်းကြောင်း၊ အဲဒီအခြေအနေမျိုးမှာ စုစည်းညီညွတ်တဲ့ စစ်မဟာမိတ်မျိုး ဖွဲ့စည်းဖို့ ဆိုတာက အင်မတန် စိန်ခေါ်မှု ကြီးမားကြောင်း တီယိုဒိုရိုက ထောက်ပြခဲ့ပါတယ်။
Public Service Announcement
ဥပမာ အနေနဲ့ ဖိလစ်ပိုင်ဟာ အမေရိကန်နဲ့ မဟာမိတ်ဆန်တဲ့ ဆက်ဆံရေး ရှိကြောင်း၊ နောက်ထပ် စိတ်တူသဘောတူ နိုင်ငံတွေနဲ့လည်း မဟာမိတ် ဆက်ဆံရေးကို ထူထောင်နေကြောင်း၊ တစ်ဖက်မှာတော့ တခြားအာဆီယံ အဖွဲ့ဝင် နိုင်ငံတွေကတော့ တရုတ်နဲ့ မဟာမိတ် ဆက်ဆံရေးကို တည်ဆောက်နေကြောင်း ဝန်ကြီးက ပြောပါတယ်။
အရှေ့အာရှ အင်အားကြီး နိုင်ငံတစ်ခုဖြစ်တဲ့ ဂျပန်ရဲ့ ဝန်ကြီးချုပ်သစ် ရှီဂီရူ အီရှီဘာက အာရှတိုက်ရဲ့ NATO အင်အားစုမျိုး ရှိသင့်ကြောင်း အယူအဆကို ပြန်လည် ဖော်ဆောင်လာတဲ့နောက် မနီလာ လုံခြုံရေး ဖိုရမ်မှာ အရှေ့တောင်အာရှ NATO ဖြစ်နိုင်ခြေကို ဆွေးနွေးခဲ့တာပါ။
ကမ္ဘာ့အရေး လေ့လာသုံးသပ်သူတွေက အရှေ့တောင်အာရှ ဒေသဟာ တရုတ်နဲ့ အမေရိကန်တို့ကြား ပထဝီဝင် နိုင်ငံရေးဆိုင်ရာ ဩဇာလွှမ်းမိုးဖို့ အားပြိုင်ကြတဲ့ နယ်မြေတစ်ခု ဖြစ်လာနေကြောင်း သုံးသပ်ပြထားကြပါတယ်။
ကိုးကား: Reuters
