တစ်လမပြည့်ခင် ကာလအတွင်း ကြုံတွေ့ရမယ့် ၅ ခုမြောက် မုန်တိုင်းအတွက် ဖိလစ်ပိုင်မှာ ရာသီဥတု သတိပေး ကြေညာချက်တွေ ထုတ်ပြန်နေရပြီ ဖြစ်ပါတယ်။
နိုဝင်ဘာ ၁၂ ရက်နေ့မှာ အမျိုးသား မိုးလေဝသ အေဂျင်စီက အူဆာဂီ မုန်တိုင်းဟာ နိုင်ငံရဲ့ အရှေ့မြောက် ကမ်းရိုးတန်းဆီ ဦးတည် ရွေ့လျားနေပြီး ၂ ရက်အတွင်း ကုန်းတွင်းဝင်ရောက် တိုက်ခတ်နိုင်တယ်လို့ ထုတ်ပြန် ကြေညာခဲ့ပါတယ်။
ပြီးခဲ့တဲ့ ရက်ပိုင်းတုန်းကလည်း ဖိလစ်ပိုင်ဟာ တိုင်ဖွန်းမုန်တိုင်း တိုရာဂျီ ဝင်ရောက် တိုက်ခတ်မှုနဲ့ ကြုံတွေ့ခဲ့ပြီး လူပေါင်း ၃၂၀၀၀ ကျော်ကို အရေးပေါ် ရွှေ့ပြောင်းပေးခဲ့ရပါတယ်။ အခုတော့ တိုရာဂျီဟာ အပူပိုင်း မုန်တိုင်းငယ်အဆင့် အားပျော့သွားပြီဖြစ်ပြီး ဖိလစ်ပိုင်မှာ ဆိုးဆိုးရွားရွား ထိခိုက်ပျက်စီးမှုတွေ မရှိခဲ့ပါဘူး။
တိုရာဂျီ မတိုင်ခင် သီတင်းပတ်တွေတုန်းက အင်အားပြင်းထန်တဲ့ အပူပိုင်းမုန်တိုင်း ထရာမီ၊ တိုင်ဖွန်း ယင်ရှင်းနဲ့ စူပါတိုင်ဖွန်း ကောင်ရေးတို့ဟာ ဖိလစ်ပိုင်ကို ဖြတ်သန်းတိုက်ခတ်ခဲ့ပြီး စုစုပေါင်း လူ ၁၅၉ ဦး သေဆုံးစေခဲ့ပါတယ်။ အသေအပျောက် အများစုဟာ ထရာမီ မုန်တိုင်းကြောင့် ဖြစ်ပွားခဲ့တာပါ။ ထရာမီကြောင့် ဖိလစ်ပိုင် အနှံ့မှာ မိုးသည်းသည်းထန်ထန် ရွာသွန်းပြီး ရေကြီး မြေပြိုမှုတွေလည်း ပေါ်ပေါက်ခဲ့ပါတယ်။
Public Service Announcement
လောလောဆယ် ဖိလစ်ပိုင်ကို ချဉ်းကပ်လာနေတဲ့ အူဆာဂီ မုန်တိုင်းဟာ တစ်နာရီ လေတိုက်နှုန်း ၇၅ ကီလိုမီတာလောက် ရှိနေပြီး နိုဝင်ဘာ ၁၄ ရက်နေ့ကျရင် ဖိလစ်ပိုင် ကမ်းရိုးတန်းကို ဝင်ရောက်မယ်လို့ ခန့်မှန်းထားပါတယ်။ အဲဒီအချိန်မှာ မုန်တိုင်းဟာ တိုင်ဖွန်းအဆင့်ထိ အားကောင်းလာနိုင်ခြေလည်း ရှိပါတယ်။
အာဏာပိုင်တွေက မုန်တိုင်းဝင်ရောက်မယ့် ကာလအတွင်း ပင်လယ်ပြင်ကို လှေငယ်တွေ စွန့်စားထွက်ခွာတာမျိုး လုံးဝမလုပ်ဖို့ သတိပေး တိုက်တွန်းထားပါတယ်။
ဖိလစ်ပိုင်ဟာ နှစ်စဉ်နှစ်တိုင်း တိုင်ဖွန်းမုန်တိုင်း ရာသီတွေရောက်တိုင်း ပြင်းအားမတူညီတဲ့ မုန်တိုင်းပေါင်း ၂၀ ဝန်းကျင်နဲ့ ကြုံတွေ့ရလေ့ ရှိပါတယ်။ ကမ္ဘာ့ရာသီဥတု ပြောင်းလဲမှုရဲ့ အကျိုးဆက်အဖြစ် နောက်ပိုင်း ကာလတွေမှာ မုန်တိုင်းတွေဟာ ကမ်းရိုးတန်းနဲ့ ပိုနီးနီးကပ်ကပ် ဖွဲ့စည်းပေါ်ပေါက်လာတတ်ပြီး ခပ်မြန်မြန် အင်အားကောင်းလာတာ၊ သာမန်ထက်ပိုပြီး သက်တမ်းရှည်ကြာတာတွေ တွေ့လာရတယ်လို့ ပညာရှင်တွေက သတိပေး ပြောကြားထားပါတယ်။
ကိုးကား: Straits Times
