သံလွင်မြစ်ရေ ဟာ ဘားအံမြို့ မှာ နောက်ရက်တွေအတွင်း မြို့ရဲ့စိုးရိမ်ရေမှတ်ထက်ကို ရောက်ရှိသွားနိုင်လို့ မြို့နယ်အတွင်း မြစ်ကမ်းအနီးနဲ့ မြေနိမ့်ပိုင်းနေထိုင်သူတွေအနေနဲ့ အထူးသတိပြုနေထိုင်ကြဖို့ မိုးလေ၀သနဲ့ ဇလညွှန်ကြားမှုဦးစီးဌာနက သတင်းထုတ်ပြန်ပါတယ်။
မိုးဇလရဲ့ ဒီကနေ့ ၁ နာရီခွဲအချိန်က တိုင်းထွာချက်အရ သံလွင်မြစ်ရေဟာ ဘားအံမြို့မှာ မြို့ရဲ့စိုးရိမ်ရေမှတ်အောက် ၁ ပေခွဲခန့် ရောက်ရှိနေပြီး နောက် ၂ ရက်အတွင်းမှာ စိုးရိမ်ရေမှတ်ကို ရောက်ရှိနိုင်တယ်လို့ မိုးဇလက ခန့်မှန်းထားတာပါ။
ဒါကြောင့် ဘားအံမြို့နယ်အတွင်းရှိ မြစ်ကမ်းအနီးနဲ့ အနိမ့်ပိုင်းမှာ နေထိုင်သူတွေအနေနဲ့ အထူးသတိပြုနေထိုင်ကြဖို့ မိုးဇကလ သတိပေးထားပါတယ်။
“ဒါပေမဲ့ ရေသေရက်က ဖြစ်နေတော့ အများကြီးတော့ အမြန်ကြီးတော့ မတက်ပါဘူး။ စိုးရိမ်ရေမှတ်လောက်တော့ ရောက်သွားနိုင်တယ်လို့ ရုံးချုပ်က ခန့်မှန်းထားတာ။ အခုဟာက မိုးက နောက်ရက်တွေ မိုးလျော့သွားမယ်။ မိုးကလျော့ဖို့ရှိတော့ သိပ်အများကြီးတော့ စိုးရိမ်စရာမရှိ။ အခုဟာက ရှမ်းကရွာတဲ့ရေကျလာတော့ ဒီ ကယားဘက်က ဖားဆောင်းလည်းတက်လာတယ်။ ဒီဘက်လည်းတက်လာတယ်” လို့ ကရင်ပြည်နယ်မိုးဇလတာ၀န်ရှိသူတစ်ဦးက ပြောပြပါတယ်။
Public Service Announcement
ပြီးခဲ့တဲ့ ဇူလိုင်လက ဘားအံမြို့မှာ မိုးရွာသွန်းမှုများပြီး သံလွင်မြစ်ရေတက်လာခဲ့တာကြောင့် မြို့ရဲ့ အနိမ့်ပိုင်းနေရာတွေမှာ ရေ၀င်ရောက်ပြီး လူဦးရေ ထောင်ချီခန့် ရေဘေးသင့်ခဲ့ရတယ်လို့ သိရပါတယ်။
