ဂျာမဏီနိုင်ငံ Oldenburg မြို့မှာ ကျင်းပနေတဲ့ နိုင်ငံတကာရုပ်ရှင်ပြပွဲမှာ ဒါရိုက်တာဏကြီး ရိုက်ကူးတဲ့ What happened to the wolf? ဇာတ်ကားနဲ့ အိန္ဒြာကျော်ဇင်ဟာ Seymour Cassel Award for Best Performance ဆုကို ရရှိသွားပါတယ်။
အဓိကသရုပ်ဆောင် ၂ ဦးဖြစ်တဲ့ အိန္ဒြာကျော်ဇင်နဲ့ ပိုင်ဖြိုးသုတို့ဟာ မြန်မာနိုင်ငံက အကယ်ဒမီမင်းသမီးတွေဖြစ်ပြီးတော့ ကြည့်ရှုသူပရိသတ်ကို မှင်သက်ငေးမော၊ အသက်ရှုမှားစေအောင် သရုပ်ဆောင်နိုင်ခဲ့ပါတယ်လို့ ဆုပေးပွဲမှာကြေညာခဲ့ပါတယ်။
ဒါ့အပြင်သရုပ်ဆောင်ရဲ့ ရိုးရှင်းလှပမှု၊ ပင်ကိုယ်စိတ်ထား၊ တန်ဖိုးဖြတ်မရတဲ့ ရုပ်ရှင်လောကအတွက် သူမရဲ့ပါရမီကို အသိအမှတ်ပြုတဲ့အနေနဲ့ ဆုကို ချီးမြှင့်တာလို့လည်းဆိုပါတယ်။
ဒီဆုကို ချီးမြှင့်တဲ့အချိန်မှာတော့ အိန္ဒြာကျော်ဇင်ဟာ စစ်အာဏာသိမ်းတာကို ဆန့်ကျင်တဲ့အတွက် အင်းစိန်အကျဉ်းထောင်မှာ ဖမ်းဆီးချုပ်နှောင်ခံထားရချိန်လည်းဖြစ်ပါတယ်။
ဒါအပြင် ဒါရိုက်တာဏကြီးတို့ဇနီးမောင်နှံကိုလည်း စစ်ကောင်စီက အမှုဖွင့်ဝရမ်းထုတ်ထားပါသေးတယ်။
အာဏာရှင်တွေဟာ လူတွေကို အကျဥ်းချထားလို့ရပေမယ့် အနုပညာကိုတော့ အကျဥ်းချထားလို့မရပါဘူးဆိုတာ “what happened to the wolf?” ဇာတ်ကားမှာပါဝင်ထားတဲ့ အိန္ဒြာကျော်ဇင် ကသက်သေပြလိုက်တာဖြစ်ပါတယ်။
Oldenburg Film Festival ဟာ ဥရောပ အင်ဒီရုပ်ရှင်ပွဲတော်တွေထဲ အထင်ကရပွဲတစ်ပွဲ ဖြစ်ပြီး ၂၈ နှစ်သက်တမ်းရှိပြီလည်းဖြစ်ပါတယ်။