❝ ခင်ပွန်းသည်အတွက် ပါရမီဖြည့်ဖက်၊ ပြည်သူတွေအတွက် သမ္မတကတော် ❞

ဖေဖော်ဝါရီ ၂၄ ရက်မှာ ရုရှားက အင်အား အလုံးအရင်းနဲ့ ကျူးကျော်စစ်ပွဲကို အစပြုလိုက်တဲ့ အခါမှာ ယူကရိန်း ပြည်သူတွေအားလုံး ထိတ်လန့် တုန်လှုပ်ခဲ့ကြပါတယ်။ အဲဒီထဲမှာမှ အိုလီနာ ဇီလန်စကာကတော့ စိတ်အချောက်ချားဆုံး ပူပန်သောကရောက်ရသူတစ်ယောက် ဖြစ်နေခဲ့မှာ သေချာပါတယ်။ လက်နက်အင်အား အကြီးဆုံး နိုင်ငံကြီး တစ်ခုရဲ့ အဓိက ပစ်မှတ်ဟာ သူချစ်မြတ်နိုးရတဲ့ သူ့မိသားစုနဲ့ သူကိုယ်တိုင် ဖြစ်နေမှန်း သိနားလည်ထားတဲ့ မိန်းမသား တစ်ဦးအတွက် ဘယ်လောက်တောင် စိုးရိမ် စိတ်ပူခဲ့ရမလဲဆိုတာ အလွယ်တကူ နားလည်နိုင်ပါလိမ့်မယ်။ စစ်ပွဲ စဖြစ်တဲ့ နေ့မှာတင် ရာနဲ့ချီ များပြားတဲ့ ရုရှား လေထီးဆင်း စစ်သားတွေဟာ ကိယက်ဗ်မြို့တော် ဆင်ခြေဖုံးကို ဆင်းသက်လာပြီး သူရယ်၊ သူ့ခင်ပွန်းဖြစ်တဲ့ ယူကရိန်း သမ္မတ ဗိုလိုဒီမာ ဇီလန်စကီးရယ်၊ ကလေး ၂ ယောက်ရယ်ကို အသည်းအသန် မြေလှန် ရှာဖွေနေချိန်မှာ အိုလီနာတစ်ယောက် ဆောက်တည်ရာမရ ကြောက်လန့်နေခဲ့ပါလိမ့်မယ်။

ဒါပေမဲ့ ဒီအခြေအနေတွေဟာ အတိတ်မှာ ကျန်ခဲ့ပါပြီ။ စစ်ပွဲရဲ့ ထုဆစ်မှုကြောင့် ပိုမို မာကျောလာတဲ့ ယူကရိန်း နိုင်ငံသားတွေနည်းတူ အိုလီနာဟာလည်း ပိုမိုရင့်ကျက်၊ ပိုမို တည်ငြိမ်လာပါတယ်။ အခုအခါမှာတော့ ခင်ပွန်းဖြစ်သူ သမ္မတ ဇီလန်စကီးက စစ်ပွဲကို ကြီးကြပ်ဖို့ ယူကရိန်း နိုင်ငံကနေ တစ်ဖဝါးမှမခွာ ရှိနေချိန်မှာ အိုလီနာဟာ ခင်ပွန်းသည်ကိုယ်စား နိုင်ငံတကာ ထိတွေ့ ဆက်ဆံမှုတွေမှာ အရေးပါတဲ့ တာဝန်တွေကို ယူနေရပါပြီ။ ပုံမှန်ဆိုရင် ရှက်တတ်တဲ့၊ အနေအေးတဲ့၊ သိုသိုသိပ်သိပ် နေတတ်တဲ့ အသက် ၄၄ နှစ်အရွယ် အမျိုးသမီးဟာ သူ့ဘ​ဝရဲ့ တစ်ဆစ်ချိုး တောင်းဆိုမှုတွေအရ ရဲရင့်တဲ့၊ ထက်မြက်တဲ့၊ စမတ်ကျတဲ့ သမ္မတကတော် တစ်ဦးအဖြစ် ပြောင်းလဲလာခဲ့ပြီ ဖြစ်ပါတယ်။

အိုလီနာအကြောင်းကို ပြောမယ်ဆိုရင် သူနဲ့ ဇီလန်စကီးတို့ရဲ့ စတင် တွေ့ဆုံမှုကနေ စတင် မြစ်ဖျားခံရပါလိမ့်မယ်။ သူတို့နှစ်ယောက်ဟာ ကျောင်းနေဖက်တွေ ဆိုပေမယ့် ငယ်စဉ်တုန်းကတော့ မသိကျွမ်းခဲ့ကြပါဘူး။ တက္ကသိုလ်ရောက်မှ နီးစပ်လာပြီး ချစ်ကျွမ်းဝင် လက်ထပ်ခဲ့ကြတယ်။ ဇီလန်စကီးက ပြည်တွင်းမှာ လူသိများတဲ့ ဟာသ သရုပ်ဆောင်တစ်ဦး ဖြစ်လာတဲ့အခါ ဗိသုကာ တစ်ဦးဖြစ်တဲ့ အိုလီနာက ဇာတ်ညွှန်းရေး ဆရာမ အလုပ်ကိုပါ လုပ်ပြီး ခင်ပွန်းသည်အတွက် တတ်နိုင်သလောက် ပါရမီဖြည့်ပြီး ကူညီခဲ့တယ်။ ဇီလန်စကီးက နိုင်ငံရေး လောကထဲဝင်ဖို့ ဆုံးဖြတ်လိုက်ပြန်တော့လည်း သူက ကိုယ်စွမ်းဉာဏ်စွမ်း ရှိသလောက် ပံ့ပိုးခဲ့ပြန်တယ်။ အဲဒီအချိန်တွေ တောက်လျှောက် ဇီလန်စကီးရဲ့ မျက်နှာကို လူတွေက ရင်းနှီးနေကြပေမယ့် အိုလီနာကတော့ လူမြင်ကွင်း နောက်ကွယ်မှာ သိုသိုသိပ်သိပ်ပဲ နေထိုင်ခဲ့တယ်။ နောက်တော့ ဇီလန်စကီး သမ္မတဖြစ်လာတယ်။
You sent
သမ္မတကတော် အိုလီနာကတော့ ထုံးစံအတိုင်း ရိုးရိုးကုတ်ကုတ် နေထိုင်ပြီး ပွဲလမ်းသဘင် အခမ်းအနားတွေကို တတ်နိုင်သမျှ ရှောင်နေခဲ့တယ်။

နောက်တော့ ရုရှားရဲ့ ကျူးကျော်စစ်ပွဲ စလာတယ်။ အလွန်ဆုံး တစ်ပတ်၊ နှစ်ပတ်လောက် ကာလအတွင်း ကိယက်ဗ်မြို့တော် ကျဆုံးသွားလိမ့်မယ်ဆိုတဲ့ အများစုက ထင်ကြေးပေးခဲ့တယ်။ အနောက်မဟာမိတ် နိုင်ငံတွေကလည်း သမ္မတ ဇီလန်စကီးကို ထွက်ပြေး တိမ်းရှောင်ပြီး နိုင်ငံရေး ခိုလှုံလာဖို့ပါ စီစဉ်ပေးထားခဲ့ကြတယ်။ ဒါပေမဲ့ ဇီလန်စကီးက ခေါင်းမာမာနဲ့ ငြင်းဆန်ခဲ့တယ်။ သမ္မတ အနေနဲ့၊ နိုင်ငံရဲ့ ကာကွယ်ရေး ဦးစီးချုပ် အနေနဲ့ ယူကရိန်းကို ဒုက္ခတောထဲမှာ လက်လွတ်စပယ် ပစ်မထားဖို့ ရွေးချယ်ခဲ့တယ်။ ကျူးကျော်စစ် အစောပိုင်း ကာလတွေမှာ ဖရိုဖရဲ ခုခံနေရတဲ့ ယူကရိန်း တပ်တွေကို ဇီလန်စကီးက ပြန်စုစည်းတယ်။ သူတို့ခေါင်းဆောင်ဟာ အားကိုးထိုက်သူ တစ်ယောက်မှန်း သိလာတဲ့အခါ စိတ်ဓာတ် တက်ကြွလာတဲ့ ယူကရိန်း နိုင်ငံသားတွေက ရုရှားရဲ့ အစောပိုင်း ထိုးစစ်တွေကို ရရာလက်နက်တွေနဲ့ ခုခံကြတယ်။ အဲဒီ အခြေအနေကပဲ ရုရှား သမ္မတ ဗလာဒီမာ ပူတင်ရဲ့ စစ်ဆင်ရေး ရည်မှန်းချက်တွေကို ကမောက်ကမ ဖြစ်စေပြီး လက်ရှိလိုမျိုး အကျဉ်းအကျပ် အခြေအနေတွေဆီ ဦးတည်လာစေခဲ့တာပါ။ ဒီတော့ ပူတင်တစ်ယောက် ဇီလန်စကီးကို အစိမ်းလိုက် ဝါးစားချင်လောက်အောင် မုန်းတီးနေတာ မဆန်းပါဘူး။

Public Service Announcement

နောက်ပိုင်းကျတော့ ဇီလန်စကီးက စစ်ပွဲ အစပိုင်းမှာ ရုရှားစစ်သားတွေဟာ သူနဲ့ သူ့မိသားစု ရှိနေတဲ့ နေရာနား မီတာ ရာဂဏန်းလောက်သာ ကွာဝေးတော့တဲ့ထိ ချဉ်းကပ်လာဖူးတဲ့ အတွေ့အကြုံကို ဖွင့်ဟခဲ့ပါတယ်။ ဒီအခြေအနေဟာ ဇီလန်စကီးတို့ရဲ့ မိသားစုအတွက်၊ အထူးသဖြင့် မိန်းမသား တစ်ယောက်၊ သားသည်မိခင် တစ်ယောက်ဖြစ်တဲ့ အိုလီနာကို အကြီးအကျယ် ထိတ်လန့်စေခဲ့မှာ အမှန်ပါပဲ။ ဇီလန်စကီးဟာ မိသားစုရဲ့ လုံခြုံရေး ထိခိုက်လာနိုင်တာကို သိပေမယ့် ယူကရိန်းကို မစွန့်လွှတ်ဖို့ စိတ်ပိုင်းဖြတ်ခဲ့တယ်။ ဒီဆုံးဖြတ်ချက်ဟာ အရမ်းခက်ခဲခဲ့မယ်ဆိုတာ သေချာပါတယ်။ အိုလီနာ ကိုယ်တိုင်လည်း ဒွိဟတွေကြား နစ်မွန်းခဲ့ပေမယ့် ပါရမီဖြည့်ဖက်ကောင်းပီပီ ခင်ပွန်းနဲ့အတူ မခွဲမခွာ ရပ်တည်ခဲ့ပါတယ်။ အဲဒီအချိန်ကစလို့ ရှက်တတ်တဲ့၊ သိုသိုသိပ်သိပ် နေတတ်တဲ့၊ လူတွေနဲ့ စကားပြောဖို့ ယုံကြည်မှု နည်းတတ်တဲ့ ဝိသေဟဟောင်းတွေကို အိုလီနာတစ်ယောက် မြွေအရေခွံ လဲသလို ချွတ်ချထားလိုက်ပါတယ်။

ပြီးခဲ့တဲ့ လပိုင်းတွေအတွင်း သူဟာ ခင်ပွန်းသည်ကိုယ်စား နိုင်ငံတချို့ရဲ့ အရေးပါတဲ့ အခမ်းအနားတွေ၊ အစည်းအဝေးတွေကို တက်ရောက်ခဲ့တယ်။ အရေးပါတဲ့ ပုဂ္ဂိုလ်တွေကို တွေ့ဆုံခဲ့တယ်။ မိန့်ခွန်းတွေ ပြောခဲ့တယ်။ အဲဒီအချိန်တွေမှာ အိုလီနာရဲ့ ကိုယ်နေဟန်ထား၊ မျက်နှာပေး အားလုံးဟာ အရင်ကလို အိမ်တွင်းပုန်းပြီး မိသားစုအတွက်ပဲ အာရုံစိုက် ပျော်မွေ့နေတတ်တဲ့ သာမန် အိမ်ရှင်မ တစ်ဦးနဲ့ လုံးဝ မတူတော့ပါဘူး။ သူဟာ သမ္မတကတော် တစ်ဦးဆိုတာထက် သမ္မတ တစ်ဦးနဲ့တောင် ပိုတူလာတယ်လို့ ချီးကျူး ခံရတယ်။ စစ်ပွဲစတင်ပြီး လပိုင်းလောက်အကြာမှာ ယူကရိန်းမြေကို အမေရိကန် သမ္မတကတော် ဂျီလ်ဘိုင်ဒန်က အားပေး ခရီးစဉ်အဖြစ် လာရောက်တဲ့အခါ အိုလီနာက ဧည့်ခံခဲ့တယ်။ အဲဒီအချိန်ကစလို့ အိုလီနာရဲ့ ပြောင်းလဲလာမှုတွေကို ယူကရိန်း ပြည်သူတွေ စတင် သတိထားမိလာတယ်။

နောက်ပိုင်းမှာတော့ အိုလီနာဟာ ခင်ပွန်းသည်ကိုယ်စား အမေရိကန် ပြည်ထောင်စုကိုလည်း သွားရောက်ခဲ့တယ်။ ကုလသမဂ္ဂ ညီလာခံကိုလည်း တက်ရောက်ခဲ့တယ်။ ဗြိတိန်က နိုင်ငံတော် ဈာပန အခမ်းအနားဆီလည်း ရောက်ခဲ့ပြန်တယ်။ အခြေအနေတိုင်းမှာ သူဟာ ခန့်ထည်တဲ့၊ စိတ်ဓာတ် မာကျောတဲ့၊ ဂုဏ်ကျက်သရေ ပြည့်စုံတဲ့ သမ္မတကတော် တစ်ဦးအဖြစ် လိုက်လျောညီထွေ ရပ်တည်ပြခဲ့တယ်။ စစ်ပွဲ မစခင်တုန်းက ယူကရိန်းမှာ ကလေးငယ်တွေရဲ့ အာဟာရဖွံ့ဖြိုးရေး၊ ပညာသင်ကြားရေး ကိစ္စတွေကိုပဲ အားစိုက် ကူညီပေးနေရာကနေ အခုအချိန်မှာတော့ အိုလီနာဟာ နိုင်ငံရေး၊ သံတမန်ရေး ကဏ္ဍတွေအပေါ် ပြောင်းလဲ အာရုံစိုက်လာတယ်။

ဇူလိုင် လလယ်တုန်းက သူဟာ အမေရိကန် အစိုးရရဲ့ ဖိတ်ကြားမှုအရ ဝါရှင်တန်ကို သွားရောက်ခဲ့တယ်။ အမေရိကန် နိုင်ငံခြားရေး ဝန်ကြီး အန်တိုနီ ဘလင်ကန်စ်လို ပုဂ္ဂိုလ်မျိုးက အိုလီနာကို တလေးတစား တွေ့ဆုံခဲ့တယ်။ နောက်တော့ အိမ်ဖြူတော်မှာ အမေရိကန် သမ္မတ ဘိုင်ဒန်နဲ့ ဇနီး၊ ဒုတိယ သမ္မတ ကာမာလာ ဟားရစ်တို့နဲ့ပါ ဆွေးနွေးခဲ့တယ်။ နောက်ပြီး အမေရိကန် လွှတ်တော်မှာလည်း အိုလီနာကို မိန့်ခွန်းပြောဖို့ ဖိတ်ကြားခဲ့ပါတယ်။ ဒါကြောင့် သူဟာ အမေရိကန် လွှတ်တော်သမိုင်းမှာ ပထမဆုံး မိန့်ခွန်းပြောခွင့်ရတဲ့ ပြည်ပနိုင်ငံ တစ်ခုရဲ့ သမ္မတကတော် အနေနဲ့ သမိုင်းမှတ်တမ်းသစ် ရေးထိုးနိုင်ခဲ့တယ်။ အဲဒီမိန့်ခွန်းမှာ အိုလီနာက ယူကရိန်းအတွက် စစ်လက်နက်တွေ ပိုမို ထောက်ပံ့ပေးဖို့၊ ရုရှားရဲ့ ကျူးကျော်မှုကို ပိုပြီး ပြင်းပြင်းထန်ထန် တုံ့ပြန် အရေးယူပေးဖို့ အမေရိကန် လွှတ်တော် အမတ်တွေကို တောင်းဆိုခဲ့တယ်။

စက်တင်ဘာလမှာတော့ အိုလီနာဟာ ခင်ပွန်းသည်ကိုယ်စား ကုလသမဂ္ဂ အထွေထွေ ညီလာခံကို တက်ရောက်ခဲ့ပါတယ်။ ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ကိုယ်တိုင် အိုလီနာနဲ့ တွေ့ဆုံပြီး အားပေးစကား ပြောကြားခဲ့တယ်။ ကုလသမဂ္ဂ အစည်းအဝေးတွေမှာတော့ အိုလီနာဟာ ရုရှားရဲ့ ရန်လို ကျူးကျော်မှုတွေကြောင့် ယူကရိန်းက ကလေးငယ်တွေရဲ့ ဘဝအခြေအနေတွေ ကြမ်းတမ်း ခက်ခဲလာတာကို အဓိက အသားပေးပြီး တင်ပြ ဆွေးနွေးသွားခဲ့ပါတယ်။

သူ့ရဲ့ ခရီးစဉ်တွေ၊ နိုင်ငံရေး လှုပ်ရှားမှုတွေကြောင့် အိုလီနာဟာ မီဒီယာတွေရဲ့ အာရုံစိုက်ခြင်းကိုလည်း ပိုပြီး ခံလာရတယ်။ လဆန်းပိုင်းလောက် CBS သတင်းဌာနဟာ CBS သတင်းဌာနရဲ့ 60 Minutes အင်တာဗျူး အစီအစဉ်ကို လက်ခံခဲ့ပြီး စစ်ပွဲနဲ့ ပတ်သက်တဲ့ သူ့အမြင်တွေကို မျှဝေခဲ့တယ်။ ဇာတ်ညွှန်းရေး ဆရာမ တစ်ဦးပီပီ သူဟာ စစ်ပွဲကြောင့် ထိခိုက်မှုတွေကို အားကောင်းတဲ့ စကားလုံး အသုံးအနှုန်းတွေနဲ့ ပုံဖော် မျှဝေပြနိုင်ခဲ့တယ်။

ဒီစစ်ပွဲဟာ ခေတ်သစ် အတွေးအမြင်တွေနဲ့ အစပြုခဲ့တာဖြစ်ကြောင်း၊ ဒါပေမဲ့ ကျင့်ဝတ်ပိုင်း၊ လုပ်ဆောင်မှုပိုင်းတွေမှာတော့ အလယ်ခေတ် ဆန်နေတုန်းပဲလို့ သူက ပြောတယ်။ ဒါဟာ စစ်ပွဲကို အကြောင်းပြုပြီး ယူကရိန်း ပြည်သူတွေအပေါ် ရက်ရက်စက်စက် ဖိနှိပ်ချိုးနှိမ်နေတဲ့ ရုရှား စစ်တပ်တွေရဲ့ လုပ်ရပ်ကို ရည်ညွှန်းခဲ့တာ ဖြစ်ပါတယ်။

စစ်ပွဲက လနဲ့ချီ ကြာမြင့်လာချိန်မှာ ယူကရိန်း ပြည်သူတွေဟာ စစ်ပွဲနဲ့ အတူယှဉ်တွဲ နေထိုင်ဖို့ သင်ယူတတ်လာပါတယ်။ ရှေ့တန်း စစ်မျက်နှာနဲ့ ဝေးကွာတဲ့ ဒေသတွေမှာ ကျောင်းတွေလည်း ပြန်ဖွင့်နေပါပြီ။ ဒါပေမဲ့ ကလေးတွေဟာ အစောဆုံး အခြေအနေတွေမှာ ဗုံးခိုကျင်းတွေထဲကနေ ကျောင်းတက်ခဲ့ရတာကို မမေ့သင့်ကြောင်း အိုလီနာက ပြောပါတယ်။ ယူကရိန်းမှာ ကလေးဦးရေ ၆ သန်းလောက် ရှိတဲ့ထဲက ၂.၈ သန်းလောက်ဟာ စစ်ဒဏ်ကြောင့် နေရပ်ကနေ စွန့်ခွာ ထွက်ပြေးနေရပြီး ပညာသင်ယူခွင့် ဆုံးရှုံးနေတယ်လို့လည်း သူက ဆိုတယ်။

CBS က စစ်ပွဲဟာ ဘယ်လိုပုံစံနဲ့ အဆုံးသတ်သွားမလဲလို့ မေးတဲ့အခါ အိုလီနာက ယူကရိန်း အစိုးရကို ကိုယ်စားပြုပြီး ဖြေဆိုဖို့ ငြင်းဆန်တယ်။ အဲဒီအစား သာမန် ယူကရိန်း ပြည်သူ တစ်ယောက်အနေနဲ့ပဲ ကိုယ်ပိုင် အတွေးအမြင်ကို မျှဝေခဲ့တယ်။ ကိုယ့်မိသားစုကို မသမာသူ လူရမ်းကားတွေက အနိုင်ကျင့် ရိုက်နှက် ခြိမ်းခြောက်လာချိန်မှာ တစ်ယောက်ယောက်က အဲဒီ လူရမ်းကားတွေနဲ့ ညှိနှိုင်းဖို့ အကြံပေးလာရင် လက်ခံနိုင်ကြမလားလို့ အိုလီနာက တုံ့ပြန် မေးခွန်းထုတ်ခဲ့တယ်။ အခုအချိန်မှာတော့ စေ့စပ်ဆွေးနွေးရေး ကိစ္စဟာ မဖြစ်နိုင်သလောက် နီးပါးပဲလို့ သမ္မတကတော်က သုံးသပ်ခဲ့ပါတယ်။

လောကဓံတရားဟာ လူသားတွေကို ကြီးကြီးမားမား သက်ရောက် ပြောင်းလဲစေတတ်ကြောင်း အိုလီဟာက အကောင်းဆုံး သက်သေတစ်ခုပါပဲ။ သူပျော်မွေ့တဲ့ ဘဝမျိုးကို စွန့်ခွာလာရပေမယ့် ဒီအမျိုးသမီးဟာ နိုင်ငံနဲ့ သမိုင်းကြောင်းက ပေးအပ်တဲ့ တာဝန်အသစ်တွေကို ကျေကျေပြွန်ပြွန် ထမ်းဆောင်နေပုံပါပဲ။ အတိတ်တုန်းကတော့ သမ္မတ ဇီလန်စကီးဟာ သိပ်ကို ကောင်းမွန်တဲ့ အိမ်ထောင်ဖက်၊ ပါရမီဖြည့်ဖက် တစ်ယောက်ကို ပိုင်ဆိုင်ခွင့် ရခဲ့ပါတယ်။ ယူကရိန်း ပြည်သူတွေရဲ့ ရှုထောင့်က ကြည့်ရင်တော့ လက်ရှိ အကျပ်အတည်း ကာလမျိုးမှာ သူတို့အတွက် အကောင်းဆုံး ကိုယ်စားပြု ရပ်တည်ပေးတဲ့ သမ္မတ ကတော် တစ်ဦးကို ပိုင်ဆိုင်ထားကြောင်း အပြည့်အဝ ယုံကြည်မှု ရှိနေကြမှာ ဖြစ်ပါတယ်။