ကင်ညာနိုင်ငံမှာ အမျိုးသမီး ၄၀ ကျော်ကို သတ်ဖြတ်ခဲ့တယ်ဆိုတဲ့ ကွင်းဆက် လူသတ်သမားကို ရဲတပ်ဖွဲ့က ဖမ်းဆီးရမိခဲ့ပါတယ်။
အသက် ၃၃ နှစ်အရွယ် ဂျူမိုင်ဆီ ခါလူရှာက လွန်ခဲ့တဲ့ ၂ နှစ်တာအတွင်း သူဟာ အမျိုးသမီး ၄၂ ဦးလောက်ကို သတ်ဖြတ်ခဲ့ပါတယ်လို့ အာဏာပိုင်တွေဆီ ဖြောင့်ချက်ပေးခဲ့ပါတယ်။ သူဟာ အမျိုးသမီးတွေကို စည်းရုံးသိမ်းသွင်း၊ သတ်ဖြတ်ပြီးတဲ့နောက် အလောင်းတွေကို ဖျောက်ဖျက်ပစ်ခဲ့တယ်လို့ ခါလူရှာက ဆိုပါတယ်။
လက်ရှိ အချိန်ထိ သူသတ်ဖြတ်ခဲ့တယ်ဆိုတဲ့ အမျိုးသမီးတွေထဲက စုစုပေါင်း ၉ ဦးရဲ့ အလောင်းတွေကိုသာ ရှာတွေ့ခဲ့ပါတယ်။
ခါလူရှာဟာ အင်္ဂလန်နဲ့ စပိန်တို့ ယှဉ်ပြိုင်ကစားတဲ့ ဥရောပ တံခွန်စိုက်ဖလား ဘောလုံးပြိုင်ပွဲကို နိုင်ရိုဘီ မြို့တော် အရှေ့ဖက် ဆိုဝီတာမှာရှိတဲ့ ကလပ်တစ်ခုမှာ ကြည့်ရှုပြီးတဲ့အချိန် ရဲတွေရဲ့ ဖမ်းဆီးမှုကို ခံခဲ့ရတာပါ။
Public Service Announcement
ပထမဆုံး စစ်ဆေးမှုတွေမှာတင်ပဲ ခါလူရှာက သူဟာ အမျိုးသမီး ၄၂ ဦးကို သတ်ဖြတ်ပြီး အလောင်းဖျောက်ခဲ့တယ်လို့ ဝန်ခံခဲ့ပါတယ်။ ၂၀၂၂ ခုနှစ်ကနေ ၂၀၂၄ ခုနှစ်၊ ဇူလိုင် ၁၁ ရက်ထိ အတောအတွင်း အဲဒီ အမျိုးသမီးတွေကို သူက သတ်ဖြတ်ခဲ့တာလို့ ခါလူရှာက ဆိုပါတယ်။
သူ့ရဲ့ လူသတ်မှု ကျူးလွန်ပုံ အသေးစိတ် အချက်အလက်တွေကို ရဲတွေက ဆက်လက် စစ်ဆေး မေးမြန်းနေဆဲပါ။ သူက အလောင်းတွေကို အမှိုက်စွန့်ပစ်ရာ လျှိုတစ်ခုထဲမှာ ဖျောက်ဖျက်ထားပြီး အဲဒီနေရာက ရဲစခန်း တစ်ခုနဲ့ နီးနီးကပ်ကပ် တည်ရှိနေတာကြောင့် ရဲတွေပါ အမှုအခင်းနဲ့ ပတ်သက်သလားဆိုတဲ့ ထင်ကြေးပေး မေးခွန်းထုတ်မှုတွေ ကြုံခဲ့ရပါသေးတယ်။
ရဲတွေဟာ မှုခင်းတွေထဲက တစ်ခုနဲ့ မီတာ ၁၀၀ လောက်သာ ကွာဝေးတဲ့ နေရာမှာ ခါလူရှာ တစ်ဦးတည်း နေထိုင်တဲ့ အိမ်ကို ခြေရာခံမိရာက ကွင်းဆက်လူသတ်သမားကို ဖော်ထုတ်နိုင်ခဲ့တာ ဖြစ်ပါတယ်။ သူ့ရဲ့ ငှားရမ်းနေထိုင်ရာ အိမ်မှာ လူသတ် အလောင်းဖျောက်မှုတွေနဲ့ ဆက်စပ်တဲ့ ကိုင်းခုတ်ဓား၊ စက်မှုလုပ်ငန်းသုံး လက်အိတ်တွေ၊ စမတ်ဖုန်း ၈ လုံး၊ နိုင်လွန်အိတ် ၁၂ လုံးတို့ကို ရဲတွေက သိမ်းဆည်း ရမိခဲ့ပါတယ်။
ခါလူရှာက သူ့ရဲ့ ပထမဆုံး သားကောင်ဟာ ဇနီးဟောင်း ဖြစ်တယ်လို့လည်း ဝန်ခံခဲ့ပြီး လည်ပင်းညှစ် သတ်ပြီးတဲ့နောက် အလောင်းကို ခုတ်ထစ်ဖြတ်တောက်ပြီး အမှိုက်စွန့်တဲ့ လျှိုမှာ ပစ်ထားခဲ့တယ်လို့ ထွက်ဆိုသွားပါတယ်။
အမျိုးသမီးတွေကို ပစ်မှတ်ထား သတ်ဖြတ်တဲ့ ကွင်းဆက် လူသတ်မှုတွေရဲ့ အကြောင်းက တစ်နိုင်ငံလုံးကို လှုပ်ခတ်သွားစေခဲ့တဲ့နောက် ကင်ညာ အမျိုးသမီး အဖွဲ့အစည်းတွေက ပိုမို ထိရောက်တဲ့ အကာအကွယ်ပေးမှုတွေအတွက် ဆန္ဒပြ တောင်းဆိုမှုတွေလည်း ရှိခဲ့ကြောင်း သိရပါတယ်။
ကိုးကား: CNN
